လူ့အခ ွင့်အ ရေးနှင့် အကျဉ်းထောင် ပြုပြင်ပြောင်းလဲရေး အလားအလာ အလုပ်ရုံဆေ ွးနွေးပွဲ

၁။ မြန်မာနိုင်ငံ အမျိုးသားလူ့အခွင့်အရေးကော်မရှင် နှင့် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) တို့ ပူးပေါင်း၍ လူ့အခွင့်အရေးနှင့် အကျဉ်းထောင် ပြုပြင်ပြောင်းလဲရေး အလားအလာ အလုပ်ရုံဆွေးနွေးပွဲကို ၉-၃-၂၀၁၉ ရက်နေ့တွင် နေပြည်တော်ရှိ မန်းမြန်မာ ဟိုတယ်၌ စတင်ကျင်းပပြုလုပ်ခဲ့ပါသည်။
၂။ အဆိုပါ အလုပ်ရုံဆွေးနွေးပွဲသို့ မြန်မာနိုင်ငံအမျိုးသား လူ့အခွင့်အရေးကော်မရှင်မှ ကော်မရှင်အဖွဲ့ဝင်များ၊အမျိုးသားလွှတ်တော်နှင့် ပြည်သူ့လွှတ်တော်မှ ကိုယ်စားလှယ်များ၊ နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) မှ တာဝန်ရှိသူများ၊ အကျဉ်းဦးစီးဌာနမှ အငြိမ်းစား အရာထမ်းများ၊ ICRC မှ ကိုယ်စားလှယ်များ၊ အရပ်ဘက်အဖွဲ့အစည်းများမှ ကိုယ်စားလှယ်များ စုစုပေါင်း ၄၉ ဦး တက်ရောက်ခဲ့ကြပါသည်။
၃။ အလုပ်ရုံဆွေးနွေးပွဲ ပထမနေ့ အစီအစဉ်အရပြည်သူ့လွှတ်တော်၊ ပြည်သူ့ရေးရာစီမံခန့်ခွဲမှု ကော်မတီဥက္ကဌ ဒေါက်တာအောင်ထွန်းခိုင်က အဖွင့်အမှာစကား ပြောကြားခြင်း၊ မြန်မာနိုင်ငံအမျိုးသား လူ့အခွင့်အရေးကော်မရှင် အဖွဲ့ဝင် ဦးယုလွင်အောင်က အမှာစကားပြောကြားခြင်း၊ နိုင်ငံရေး
အကျဉ်းသားများ ကူညီစောင့်ရှောက်ရေးအသင်း (AAPP) မှ အတွင်းရေးမှူး ဦးတိတ်နိုင်က အလုပ်ရုံဆွေးနွေးပွဲ ကျင်းပပြုလုပ်ရခြင်းရည်ရွယ်ချက်ကို ရှင်းလင်းပြောကြားခြင်းတို့ကို ဆောင်ရွက်ခဲ့ကြပါသည်။
၄။ ဆက်လက်၍ အစီအစဉ်အရ မြန်မာနိုင်ငံ အမျိုးသား လူ့အခွင့်အရေးကော်မရှင်မှ ကော်မရှင် အဖွဲ့ဝင် ဦးယုလွင်အောင်က အကျဉ်းထောင်နှင့် အကျဉ်းစခန်းများ စစ်ဆေးမှု အခြေအနေကို ရှင်းလင်းပြောကြားခဲ့ပြီး အကျဉ်းထောင်ပြုပြင်ပြောင်းလဲရေး အကြံပြုချက်များကို တင်ပြဆွေးနွေးခဲ့ရာ တက်ရောက်လာသူများက အစုအဖွဲ့အလိုက် ဆွေးနွေးခြင်းနှင့် ဆွေးနွေးချက်များကို ပြန်လည်တင်ပြခြင်းများ ဆောင်ရွက်ခဲ့ပါသည်။
၅။ ညနေပိုင်းတွင် နိုင်ငံရေးအကျဉ်းသားများ ကူညီစောင့်ရှောက်ရေးအသင်း၊ တွဲဖက်အတွင်းရေးမှူး ဦးဘိုကြည်မှ အကျဉ်းထောင်ပြုပြင်ပြောင်းလဲရေး အကြံပြုချက်များကို တင်ပြဆွေးနွေးခြင်း၊ အစုအဖွဲ့အလိုက်
ဆွေးနွေးခြင်းနှင့် ဆွေးနွေးချက်များကို ပြန်လည်တင်ပြခြင်းများ ၊ ဦးဇော်ထွန်း(ဒုတိယညွှန်ကြားရေးမှူးချုပ်(ငြိမ်း)၊ အကျဉ်းဦးစီးဌာန) မှ အကျဉ်းထောင်ပြုပြင်ပြောင်းလဲရေးနှင့် ပတ်သက်၍ အတွေ့အကြုံများကို ရှင်းလင်းတင်ပြခြင်းတို့ကို ဆောင်ရွက်ခဲ့ပါသည်။ ၁၀-၃-၂၀၁၉ ရက်နေ့တွင် အလုပ်ရုံဆွေးနွေးပွဲကို ဆက်လက်ကျင်းပ ဆောင်ရွက်သွားမည်ဖြစ်ပါသည်။