သတင်းအချက်လက် စုဆောင်းခြင်းနှင့် သုတေသနလုပ်ငန်းများ

မိမိတို့အေအေပီပီ၏ အဓိကလုပ်ဆောင်ချက်မှာ မြန်မာပြည်တွင်း၌ ဆက်လက်ဖြစ်ပေါ်နေသည့် လူအခွင့်အရေး ချိုးဖောက်မှုများကို စောင့်ကြည့် မှတ်တမ်းတင်ထားရန်ဖြစ်သည်။  မိမိတို့ အေအေပီပီ၏ သတင်းအချက်အလက်နှင့် သုတေသန မှတ်တမ်းပြုသည့်အဖွဲ့မှ မြန်မာနိုင်ငံအတွင်းရှိ နိုင်ငံရေးဖြစ်စဉ် ပြောင်းလဲမှုများကို အစဉ်တစိုက် စောင့်ကြည့်အကဲခတ်နေရုံသာမက နိုင်ငံရေးတက်ကြွလှုပ်ရှားသူများ ဖမ်းဆီးခံရမှုနှင့် လူ့အခွင့်အရေး ချိုးဖေါက်ခံရမှုများကိုလည်း စောင့်ကြည့်လျက်ရှိပါသည်။ အဓိကတာဝန် နောက်ထပ်တစ်ခုမှာ  တရားရင်ဆိုင်နေရသော နိုင်ငံရေးတက်ကြွလှုပ်ရှားသူများ၏ စာရင်းများကို ပြုလုပ်ခြင်းနှင့် ထိုစာရင်းများအား အပတ်စဉ် လစဉ် အတိုးအလျှော့ စာရင်းသစ်များ ပြုလုပ်ခြင်း၊ နိုင်ငံရေးတက်ကြွလှုပ်ရှားသူများ မည်မျှဖမ်းဆီးခံရသည်၊ ထောင်ချခံရသည်၊ လွတ်မြောက်သည်ဆိုသည့် လစဉ်စာရင်းများအား ပြုလုပ်ခြင်းနှင့် ကျမ္မာရေးမကောင်းသော လက်ရှိနိုင်ငံရေးအကျဉ်းသားများ စာရင်းကိုပါ  မိမိတို့အေအေပီပီမှ ပြုလုပ်လျက်ရှိပါသည်။

မိမိတို့အေအေပီပီ၏ လစဉ်ထုတ် chronology များသည် သတင်းဌာန အသီးသီးမှ နိုင်ငံရေးအကျဉ်းသားနှင့် ပတ်သက်သော သတင်းများအား စုဆောင်းတင်ပြထားခြင်းဖြစ်ပြီး ပြည်တွင်းရှိ နိုင်ငံရေးအကျဉ်းသားနှင့်ပတ်သက်သော သတင်းအချက်အလက်များ ပိုမိုရှင်းလင်းတိကျစေရန်အတွက် အေအေပီပီ၏ ပြည်တွင်းကွန်ရက်များနှင့် ထပ်မံစစ်ဆေးလေ့ရှိပါသည်။ ထိုသတင်းအချက်အလက် စုဆောင်းခြင်းနှင့် သုတေသနအဖွဲ့မှ  မြန်မာနိုင်ငံအတွင်းရှိ နိုင်ငံရေးအကျဉ်းသားများနှင့်စပ်လျဉ်းပြီး အဓိကအရေးပါသည့် အခြေအနေအချက်အလက်များကို မှတ်တမ်းပြုထားသည့် စာတမ်းများ ပြုလုပ်ကာ နိုင်ငံရေးအကျဉ်းသားအရေး လှုံ့ဆော်သည့် မှတ်တမ်းများကိုလည်း ပြုလုပ်လျက်ရှိပါသည်။ မြန်မာနိုင်ငံတွင် လူ့အခွင့်အရေးများကို ကာကွယ်ပေးနိုင်ရန်အတွက် ထောက်ခံကူညီ လုပ်ကိုင်ပေးနေကြသည့် နိုင်ငံတကာမှ သုတေသီများ၊ အကြံပေးပုဂ္ဂိုလ်များ၊ အဖွဲ့အစည်းများ၊သတင်းထောက်များအား အေအေပီပီမှ ယုံကြည်စိတ်ချရသည့် သတင်းအရင်းအမြစ်၊ အဖိုးမဖြတ်နိုင်သော အကြံညဏ်ကောင်း များနှင့် သဘောထားအမြင်များကိုလည်း ဝေမျှပေးပါသည်။

အကျဉ်းချုပ်အားဖြင့် သတင်းအချက်လက်နှင့် သုတေသနအဖွဲ့၏ လုပ်ဆောင်ချက်တွင် အောက်ဖေါ်ပြပါ အချက်များ ပါဝင်သည်။

  • လစဉ် chronology အစီရင်ခံစာနှင့် နှစ်ပတ်လည် အစီရင်ခံစားများ ရေးသား ထုတ်ပြန်ခြင်း။
  • တရားရင်ဆိုင်နေရသော နိုင်ငံရေးတက်ကြွလှုပ်ရှားသူများ၊ လက်ရှိနိုင်ငံရေးအကျဉ်းသားများနှင့် နိုင်ငံရေးအကျဉ်းသားဟောင်းများ၏ စာရင်းများကို စီစစ်ပြုလုပ်ခြင်း။
  • နိုင်ငံရေးအကျဉ်းသားအရေးကိစ္စအား ထောက်ခံအားပေးရန် တိုက်တွန်းလှုံ့ဆော်ရန်အတွက် မှတ်တမ်းများ ရေးသားထုတ်ဝေခြင်း။
  • သုတေသန စာတမ်းများ ရေးသားထုတ်ဝေခြင်း။
  • ပြည်တွင်း၊ ပြည်ပသတင်းဌာနများ၊ လူထုအခြေပြုအဖွဲ့အစည်းများနှင့် နိုင်ငံတာ အဖွဲ့အစည်းများ၏ စုံစမ်းမေးမြန်းမှုများ မေးခွန်းများကို ဖြေကြားပေးခြင်း။