၂၅ နှစ်မြောက် ကမ္ဘာ့စာနယ်ဇင်းလွတ်လပ်ခွင့်နေ့ ထုတ်ပြန်ချက်
ရက်စွဲ။ ။ မေလ ၃ ရက်၊ ၂၀၁၈ ခုနှစ်
၂၅ နှစ်မြောက် ကမ္ဘာ့စာနယ်ဇင်းလွတ်လပ်ခွင့်နေ့တွင် နိုင်ငံရေးအကျဉ်းသားများ ကူညီ စောင့်ရှောက်ရေးအသင်း(အေအေပီပီ)သည် မြန်မာနိုင်ငံအတွင်း စာနယ်ဇင်းလွတ်လပ်ခွင့်ကျဆင်းလာခြင်း နှင့်အတူ နိုင်ငံသားနှင့်နိုင်ငံရေးအခွင့်အရေးများလျော့နည်းလာခြင်းအပေါ် စိုးရိမ်မှုများပိုမိုမြင့်တက်လာပါသည်။ ပြီးခဲ့သည့် ၂၀၁ရ ခုနှစ် ကမာ္ဘ့သတင်းလွတ်လပ်ခွင့်နေ့မှ တစ်နှစ်အတွင်း သတင်းသမားများသည် မတရား ဖမ်းဆီးဖိနှိပ်မှုများနှင့် နှောင့်ယှက်မှုများအား ဆက်လက်ရင်ဆိုင်နေကြရသည်ကို ရိုက်တာ(Reuters) သတင်းဌာနမှ သတင်းထောက် နှစ်ဦးဖြစ်သည့် ကိုသက်ဦးမောင် ခေါ် ကိုဝလုံး၊ ကိုကျော်စိုးဦး ခေါ် ကိုမိုးအောင်နှင့် ယနေ့မြန်မာ (Myanmar Now) သတင်းဌာနမှ သတင်းထောက်ချုပ် ကိုဆွေဝင်းတို့ ဖမ်းဆီးခံခဲ့ရခြင်း၊ အလွတ်တန်းသတင်းထောက် ကိုအောင်နိုင်စိုး ပြစ်ဒဏ်ချမှတ်ခံခဲ့ရခြင်းတို့မှ ထင်ရှားစွာ မြင်တွေ့နိုင်ပါသည်။
သတင်းမီဒီယာနှင့် နိုင်ငံရေးတက်ကြွလှုပ်ရှားသူများသည် ဒီမိုကရေစီ၏ အဓိကကျသောအခန်းကဏ္ဍတစ်ခု ဖြစ်ပြီး လူမှုအသိုင်းအဝိုင်းအတွင်းတွင်လည်း အရေးပါသောအခန်းကဏ္ဍမှ ပါဝင်ဆောင်ရွက်လျှက်ရှိသည်။ နိုင်ငံသားနှင့် နိုင်ငံရေးအခွင့်အရေးများကိုဖိနှိပ်ပါက လူမှုအသိုင်းအဝိုင်းတစ်ခုလုံး ထိခိုက်နစ်နာမည်ဖြစ်သည်။ အာဏာရှိသူများမှ ကျူးလွန်သောချိုးဖောက်မှုများကို ထုတ်ဖော်ပြောဆိုခြင်းနှင့် ကျူးလွန်သူများကို တာဝန်ခံရန် တောင်းဆိုခြင်းတို့မရှိပါက ကျူးလွန်သူများအနေဖြင့် ပြစ်ဒဏ်မှကင်းလွတ်ခွင့်ရနေခြင်းနှင့် တရားမျှတမှုမရှိခြင်း တို့သည် ဆက်လက်ရှိနေမည်ဖြစ်သည်။
လက်ရှိတွင် မြန်မာနိုင်ငံတွင်း လက်ကျန်နိုင်ငံရေးအကျဉ်းသား ၁၃ ဦးရှိပြီး ထိုထဲမှအများစုသည် နှစ်ရှည် ထောင်ဒဏ်ကျခံနေရသူများဖြစ်သည်။ ထို့အပြင် နိုင်ငံရေးလှုပ်ရှားမှုများအတွက် တက်ကြွလှုပ်ရှားသူ ၇၄ ဦး သည် ထောင်တွင်းမှနေ၍ တရားရင်ဆိုင်နေကြရပြီး ၁၂ဝ ဦးသည် ထောင်ပြင်ပမှနေ၍ တရားရင်ဆိုင်နေကြရ သည်ကိုလည်း မေ့ပျောက်ထား၍မရပါ။
ယနေ့ကျရောက်သောစာနယ်ဇင်းလွတ်လပ်ခွင့်နေ့တွင် အမှန်တရားကိုထုတ်ဖော်ခဲ့ခြင်းအတွက် ထိခိုက်နစ်နာ ခဲ့ကြရသော သတင်းသမားများအားလုံးကို မိမိတို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ)မှ အသိအမှတ်ပြုမှတ်တမ်းတင်ပါသည်။ ထို့အပြင် အစိုးရအား အခြေခံကျသော စာနယ်ဇင်း လွတ်လပ်ခွင့် အခန်းကဏ္ဍကို လေးစားရန်၊ လက်ကျန်နိုင်ငံရေးအကျဉ်းသားများကို အမြန်ဆုံးပြန်လွှတ်ပေးရန် နှင့် သတင်းလွတ်လပ်ခွင့် ကန့်သတ်ခြင်းခံနေရသော သတင်းသမားများကို ကူညီပံ့ပိုးပေးရန် အလေးအနက် တောင်းဆိုပါသည်။
နိုင်ငံရေးအကျဉ်းသားများကူညီစောင့်ရှောက်ရေးအသင်း
