အေအေပီပီမှ ဩဂုတ်လအတွက် နိုင်ငံရေးအကျဉ်းသားအခြေအနေပြ လစဉ်အစီရင်ခံစာနှင့် လက်ကျန်နိုင်ငံရေးအကျဉ်းသားစာရင်း
လက်ရှိအခြေအနေ အကျဉ်းချုပ်
၂၀၁၆ ခုနှစ်၊ ဩဂုတ်လကုန်တွင် မြန်မာနိုင်ငံ အကျဉ်းထောင်များ အတွင်း နိုင်ငံရေးအကျဉ်းသား စုစုပေါင်း ၈၆ ဦး အကျဉ်းကျခံ နေရသည်။ တက်ကြွလှုပ်ရှားသူ ၁၂ဝ ဦးသည် နိုင်ငံရေး လှုပ်ရှားမှု များကြောင့် လက်ရှိအချိန်တွင် တရားရင်ဆိုင်နေရပြီး ထိုထဲမှ ၃၅ ဦးသည် ထောင်တွင်းမှနေ၍ တရားရင်ဆိုင်နေရသည်။
တစ်လအတွင်း သုံးသပ်ချက်
၂၀၁၆ ခုနှစ်၊ ဩဂုတ်လတွင် တိုင်းရင်းသားဒေသများမှ အရပ်သား ခုနှစ်ဦး ဖမ်းဆီးခံခဲ့ရပြီး လယ်သမား ၂၂ ဦး တရားစွဲဆိုခံခဲ့ရသည်။ ယခုလတွင် လယ်သမား ၃၅ ဦးအား စွဲဆိုထားသော စွဲချက်များကို ရုပ်သိမ်းပေးခဲ့သည်။ နိုင်ငံရေးအကျဉ်းသားသုံးဦးမှာမှု ကျန်းမာရေး ဆိုးရွားလျက်ရှိ ကြောင်းသိရှိရသည်။
တက်ကြွလှုပ်ရှားသူများ၊ လယ်သမားများနှင့် တိုင်းရင်းသားများကို တရားစွဲဆိုရန်နှင့် ပြစ်ဒဏ်ချမှတ်ရန် ဖိနှိပ်ထားသော ဥပဒေများကို ဆက်လက် အသုံးပြုလျက်ရှိသည်။ ဩဂုတ်လ ၁၅ ရက်နေ့တွင် ရာဇသတ်ကြီးပုဒ်မ ၄၂၇၊ ၄၄၇၊ ၅၀၆၊ ၂၉၄ တို့ဖြင့် ၂၀၁၄ ခုနှစ် ကတည်းက တရားစွဲဆိုခံခဲ့ရသော နောင်ချိုမြို့နယ်မှ လယ်သမားများ သည် ၎င်းတို့၏ ၅၂ ကြိမ်မြောက်ရုံးချိန်းကို တက်ရောက်ခဲ့သည်။ သစ်တောဥပဒေ၊ သစ်တော စိုက်ခင်းများကို ကျူးကျော်မှုတို့ဖြင့် တရား စွဲဆိုခံခဲ့ရသော လပွတ္တာမြို့နယ်မှ လယ်သမား ၁၂ ဦးသည် ၎င်းတို့၏ ပထမအကြိမ် ရုံးချိန်းကို တက်ရောက်ခဲ့သည်။ ဩဂုတ်လ ၁၉ ရက်နေ့ တွင် စစ်ကိုင်း အလုပ်သမားအခွင့်အရေးတောင်းဆို ဆန္ဒပြပွဲတွင် ပါဝင် ခဲ့ကြသော အလုပ်သမားနှင့် ကျောင်းသား ၁၅ ဦးအနက် ကျောင်းသား ငါးဦးသည် တရားစီရင်ရေးအား ဆက်လက် သပိတ်မှောက်ခဲ့ကြပြီး ကျန်ရှိသည့် အလုပ်သမား ၁ဝ ဦးသည် သပိတ်မှောက်ခြင်းကို ရပ်တန့် ခဲ့ကာ စတင် ၍ တရားရင်ဆိုင်ခဲ့ကြသည်။
မီဒီယာ၊ နိုင်ငံရေးနှင့် နိုင်ငံသားတို့အပေါ် ကန့်သတ်ထားမှုများသည် ယခုလတွင်လည်း ဆက်လက်ရှိနေသည်။ ကြက်ဖကြီး လူမှုကွန်ရက်စာ မျက်နှာကို သုံးစွဲကာ စစ်ကပ်ကို အသရေဖျက်သည်ဟု စွပ်စွဲခံခဲ့ရပြီး နောက် ကိုလှဖုန်းသည် ဆက်သွယ်ရေး ဥပဒေ၊ ရာဇသတ်ကြီးပုဒ်မ ၅၀၅/ခ၊ နိုင်ငံတော်အလံ ဥပဒေပုဒ်မ ၁၆ တို့ဖြင့် စွဲချက်တင်ခြင်းကို ခံခဲ့ရသည်။ ထို့ပြင် တမူးခရိုင်အုပ်ချုပ်ရေးမှူးမှ တမူး တိုင်းရင်းသားဖို ရမ် ကျင်းပရန် တားမြစ်ခဲ့သည်။ ကူကီးတိုင်းရင်းသားသည် တိုင်းရင်း သားစာရင်းတွင် ပါဝင်ခြင်းမရှိပဲ ဖိုရမ်ကျင်းပခွင့်ပြုလိုက်ပါက ပြဿနာ ဖြစ်ပွားနိုင်သောကြောင့် ဖြစ်သည်ဟု ပြောကြားခဲ့သည်။
တိုင်းရင်းသားဒေသများတွင် စစ်တပ်မှ အရပ်သားများကို ဆက်လက် ဖမ်းဆီး၊ ထိန်းသိမ်းထားလျက်ရှိသည်။ ရှမ်းပြည်နယ်၊ နမ့်ဆန်မြို့နယ်၊ မန်ပိန်း ကျေးရွာမှ ရွာသား ငါးဦးသည် စစ်တပ်မှ မတရားဖမ်းဆီး၊ ထိန်းသိမ်းခြင်းကို ခံခဲ့ရပြီး ကချင်ပြည်နယ်၊ ရှထူးဇွပ်ရွာမှ ရွာသား နှစ်ဦး သည်လည်း စစ်တပ်မှ ဖမ်းဆီးထားခြင်းခံခဲ့သည်။
ဩဂုတ်လတွင်းတွင် လူ့အခွင့်အရေးဆိုင်ရာ အခြေအနေများထဲမှ တိုး တက်မှုတစ်ချို့ရှိလာသည်ကို တွေ့မြင်နိုင်သည်။ ယခုလတွင် ယခင် အစိုးရဟောင်း လက်ထက်က ပိုင်နက်ကျူးလွန်ခြင်းအတွက် တရားစွဲဆို ခံထားရသော လယ်သမား ၃၅ ဦး ၏ အမှုများကို နေပြည်တော် စည် ပင်သာယာရေး ကော်မတီမှ ရုပ်သိမ်းပေးခဲ့သည်။ ၎င်းပြင် အစိုးရသစ်၏ ရက်တစ်ရာစီမံချက် တစ်စိတ်တစ်ပိုင်းအဖြစ် အမည်ပျက်စာရင်းသွင်းခံ ထားရသူ ၆၁၉ ဦး (မြန်မာနိုင်ငံသား ၂၄၈ဦး၊ နိုင်ငံခြားသား၃၇၁ဦး) တို့အား အမည်ပျက်စာရင်းမှ ဖယ်ရှားပေးခဲ့သည်။ ထို့ပြင် ဩဂုတ်လ ၂၄ ရက်နေ့တွင် ပြည်သူ့လွှတ်တော်မှ ၁၉၅ဝ အရေးပေါ်စီမံမှုအက် ဥပဒေပုဒ်မ ၅ (ည) အား ရုပ်သိမ်းရန် အတည်ပြုခဲ့သည်။
ဆက်သွယ်မေးမြန်းရန်
နိုင်ငံရေးအကျဉ်းသားများကူညီစောင့်ရှောက်ရေးအသင်း
တိတ်နိုင် အတွင်းရေးမှူး +၆၆(၀)၈၁၂၈၇၈ ၇၅၁
ဘိုကြည် တွဲဘက်အတွင်းရေးမှူး +၉၅(၀)၉၄၂၅၃ဝ ၈၈၄၀
လစဉ်အစီရင်ခံစာအပြည့်အစုံ ဒေါင်းလော့ရယူရန် august-chronology-bur
လက်ကျန်နိုင်ငံရေးအကျဉ်းသားစာရင်း 86-remaining-pp-list-updated-on-31-aug-2016
လက်ကျန်အမှုရင်ဆိုင်နေရဆဲ စာရင်း 120-facing-trial-list-updated-on-aug-31-2016
ထောင်တွင်းမှအမှုရင်ဆိုင်နေရသူများစာရင်း facing-trial-from-prison
