ကျဆုံးနိုင်ငံရေးအကျဉ်းသားများ ဂုဏ်ပြုပွဲသို့ အေအေပီပီမှ ဦးဘိုကြည်ပြောကြားသည့်အမှာစကား

ရက်စွဲ။       ။ ၂၃ မတ်လ ၂၀၁၆

အားလုံးမင်္ဂလာနေ့လည်ခင်းပါ။

လွန်ခဲ့တဲ့ ၁၆ နှစ် ဒီလိုအချိန် မဲဆောက်ဆိုတဲ့ ထိုင်း-မြန်မာ နယ်စပ်မြို့ကလေးမှာ အေအေပီပီ ဆိုတဲ့အဖွဲ့အစည်းကို နိုင်ကျဉ်းဟောင်းတချို့နဲ့ စတင်ဖွဲ့စည်းခဲ့ပါတယ်။

အေအေပီပီ စတင်ဖွဲ့စည်းပြီးကတည်း က ကျနော်တို့လုပ်ခဲ့ချင်တာက မြန်မာနိုင်ငံမှာ နိုင်ငံရေးအကျဉ်းသားဆိုတာ မရှိတော့ဘဲ အေအေပီပီ ကို ကျနော်တို့ကိုယ်တိုင် ပြန်ဖျက်သိမ်းလိုက်ဖို့ပါ။ သို့သော်လည်း ယနေ့အချိန်ထိ ဖျက်သိမ်းနိုင်ဖို့ မလွယ်သေးပါ။

အေအေပီပီ ၏ အဓိက မျှော်မှန်းချက်မှာ မြန်မာနိုင်ငံတွင် နိုင်ငံသားနှင့် နိုင်ငံရေးအခွင့်အရေးများ ပေါ်ထွန်းလာစေရေးတွင် ကြိုးပမ်းဆောင်ရွက်ရေးဖြစ်ပါသည်။ ၎င်းအတွက် နိုင်ငံရေးအကျဉ်း သားများချွင်းချက် မရှိလွတ်မြောက်၍ မြန်မာ့နိုင်ငံရေး ပြောင်းလဲမှု ဖြစ်စဉ်ထဲတွင်ဘေးကင်းလုံခြုံစွာ ပါဝင်နိုင်ရေး၊ နိုင်ငံရေး လှုပ်ရှားသူများ၊ လူ့အခွင့်အရေးလှုပ်ရှားသူများနှင့် လူ့အခွင့်အရေးချိုးဖောက်ခံ ရသူများအား ကာကွယ် စောင့်ရှောက်ရေး၊ အသွင်ကူးပြောင်းရေးကာလ တရားမျှတမှုပေါ်ထွန်းရေးကို ဦးတည်လျက် နိုင်ငံရေး အကျဉ်းသားများ၊ နိုင်ငံရေးအကျဉ်းသားဟောင်းများနှင့် ၎င်းတို့၏ မိသားစုများအားကူညီထောက်ပံ့၊ ပြုစုပျိုးထောင်ခြင်း၊ မတရားဖိနှိပ်သည့် ဥပဒေများပပျောက်စေရန် ဘက်စုံဖိအားပေးခြင်း၊ အမှန်တရား ရှာဖွေခြင်း၊ မှတ်တမ်းတင်ခြင်း၊ စည်းရုံးလှုံ့ဆော်ခြင်းတို့ကို ဆောင်ရွက်မည်။ ဤကိစ္စများကို ဆောင်ရွက် ရာတွင် နိုင်ငံရေးအကျဉ်းသားဟောင်းများ၊ ရည်ရွယ် ချက်တူသူ များနှင့်ပူးပေါင်း ဆောင်ရွက် သွားမည်။

အေအေပီပီ ၏ ဆောင်ပုဒ်သည် “ နိုင်ငံရေးအကျဉ်းသားများ ရှိနေသရွေ့ အမျိုးသားပြန်လည် သင့်မြတ်ရေးမဖြစ်နိုင် “ ဟူ၍ဖြစ်ပါသည်။

ထို့အတွက်ကြောင့်လည်း မြန်မာနိုင်ငံတွင် နိုင်ငံရေးအကျဉ်းသားများအားလုံး ချွင်းချက်မရှိ လွတ်မြောက်ရေး အတွက်အစဉ်တစိုက် ကြိုးပမ်းဆောင်ရွက်ခဲ့ပါသည်။ ထိုသို့ဆောင်ရွက်ရာတွင် မြန်မာစစ်အစိုးရ အဆက်ဆက်အား နိုင်ငံတကာမှ ပိုမိုဖိအားပေးလာစေရန် ဆောင်ရွက်နိုင်ခဲ့ပါသည်။ ထို့အတွက်ကြောင့်လည်း အမေရိကန် နှင့် ဥရောပသမဂ္ဂ တို့မှ မြန်မာစစ်အစိုးရ နှင့် ၎င်းတို့၏ အပေါင်းအပါများအား စီးပွားရေးပိတ်ဆို့မှု နှင့် ပြည်ဝင်ခွင့်ဗီဇာကန့်သတ်မှု တို့ပြုလုပ်လာအောင် ထိပ်တန်းမှ ပါဝင်လုပ်ဆောင်နိုင်ခဲ့ပါသည်။ ကုလသမဂ္ဂ လူ့အခွင့်အရေးအထူးကိုယ်စားလှယ် အဆက်ဆက် နှင့် အခြားသော ကုလသမဂ္ဂယန္တရားများမှ မြန်မာနိုင်ငံလူ့အခွင့်အရေး အခြေအနေများကို စဉ်ဆက်မပြတ်စောင့်ကြည့်နိုင်အောင် ကူညီပေးခြင်းများ၊ ကုလသမဂ္ဂ မှ ချမှတ်သော မြန်မာ့လူ့အခွင့်အရေး အခြေအနေ သုံးသပ်ချက်များတွင် အောက်ခြေတွင် တကယ်ဖြစ်ပျက်နေသော အဖြစ်အပျက်များပါဝင်နိုင်ရေးများတို့ကိုလည်း ဆောင်ရွက်နိုင်ခဲ့၊ ဆောင်ရွက်နေ ဆဲဖြစ်ပါသည်။

အေအေပီပီ သည် သီးခြားလွတ်လပ်သည့် အဖွဲ့အစည်းအဖြစ် ရပ်တည်ပါသည်။ သို့သော် အစိုးရလုပ်ဆောင်ချက်မှန်သမျှကို ဝေဖန်နေသည်တော့ မဟုတ်ပါ။ ဖိတ်ခေါ်ပါက တက်ကြွစွာပူးပေါင်း ဆောင်ရွက်ရန် အဆင်သင့်ရှိပါသည်။ ပူးလည်းပူးပေါင်းခဲ့ပါသည်။ ထို့ကြောင့်လည်း ၂၀၁၃ ခုနှစ် ဦးသိန်းစိန် အစိုးရ ဖွဲ့စည်းခဲ့သော လက်ကျန်နိုင်ငံရေးအကျဉ်းသား စီစစ်ရေးကော်မတီတွင် ပါဝင်ခဲ့ခြင်းဖြစ်ပါသည်။ သို့သော်လည်း ၂၀၁၅ ခုနှစ်တွင် အသစ်ပြန်လည်ဖွဲ့စည်းလိုက်သော ကော်မတီတွင်တော့ အေအေပီပီ ကိုချန်လှပ်ထားခြင်း ခံခဲ့ရပါသည်။

ယခု အချိန်သည် အမျိုးသားဒီမိုကရေစီ အဖွဲ့ချုပ် ဦးဆောင်သော အစိုးရသစ် ပေါ်လာရန် ရက်ပိုင်းသာ ကျန်ရှိတော့သော အခြေအနေဖြစ်ပါသည်။ အစိုးရသစ်၏ အခက်အခဲ အကြပ် အတည်းကိုလည်း အပြည့်အဝ နားလည်ပါသည်။ အစိုးရသစ်အနေဖြင့် ၂၀၀၈ ဖွဲ့စည်းပုံ၏ အခက်အခဲကို ကျော်လွှားနိုင်ရန် အချိန်ယူရအုံးမည်ဆိုသည်ကိုလည်း နားလည်ပါသည်။ ထိုအခက် အခဲများသည် မိမိတို့၏ အခက်အခဲများလည်း ဖြစ်ပါသည်။ ပြည်သူများ၏ အခက်အခဲလည်း ဖြစ်ပါသည်။ သို့သော်လည်းဘဲ အစိုးရသစ် နှင့် ပါလီမန် အနေဖြင့် နိုင်ငံရေးအကျဉ်းသား အားလုံးချွင်းချက်မရှိလွတ်မြောက်ရေး၊ မြန်မာလူ့အခွင့်အရေးကော်မရှင် ဥပဒေ ပြုပြင်ပြေင်းလဲရေး၊ အကျဉ်းထောင်ဥပဒေ ပြုပြင်ပြောင်းလဲရေး၊ ပြစ်ဒဏ်ပေးခြင်းဆိုင်ရာစနစ် ပြုပြင်ပြောင်းလဲရေး၊ ဖိနှိပ်သည့် ဥပဒေများကို ပယ်ဖျက်ရေး၊ ပြုပြင်ပြောင်းလဲရေး၊  စသည်ဖြင့် မြောက်မြားလှစွာသော လုပ်ငန်းများကို မလွဲမသွေလုပ်ဆောင်ရပေမည်။ ထိုသို့လုပ်ဆောင်ရာတွင် အေအေပီပီ အနေဖြင့် ကိုယ်စွမ်းညာဏ်စွမ်း ရှိသမျှ ကူညီရန် အသင့်ရှိပါသည်။ လိုအပ်ပါကလည်း အပြုသဘောဆောင် ဝေဖန်နေဦးမည် ဖြစ်ပါသည်။

နိဂုံးချုပ်အနေနဲ့ကတော့ ကျေးဇူးတင်စကားလေး ပြောချင်ပါတယ်။

ယခုအခမ်းအနား ကျင်းပရန် ရက်ပေါင်းများစွာကတည်းက ကြိုတင်ပြင်ဆင်ခဲ့ရပါသည်။ ထိုသို့အပင်ပန်းခံပြင်ဆင်ပေးခဲ့ကြသော  အေအေပီပီ ရုံးအဖွဲ့သားများ၊

နိုင်ငံရေးအကျဉ်း သားဟောင်း များအဖွဲ့မှ ရုံးအဖွဲ့သားများ၊

အခမ်းအနားတွင် ဖျော်ဖြေရေး တာဝန်ယူပေးခဲ့သော ကိုဝင်းမော် – ရွှေသံစဉ်၊ ကိုဇော်သန်းထွဋ်၊ ကိုဝင်းတင် နှင့် သီချင်းသီဆိုသူ နိုင်ငံရေးအကျဉ်းသားဟောင်းများ၊ ဧည့်သည်တော် အဆိုရှင် ကတ်သရင်းမီးမီး ။

ယခု အခမ်းအနားတွင် စဉ်ဆက်မပြတ်ဘာသာပြန်ခြင်းကို ကူညီပေးခဲ့သော ကိုတိုးကျော်လှိုင် နှင့် ကိုစိုးမြတ်သူ။

ယခုလို အခမ်းအနားဖြစ်မြောက်ရန် အလှူငွေ ကလည်း မရှိမဖြစ်ပါ။ ထိုလိုအပ်သော ငွေကြေးများကို လှူဒန်းပေးခဲ့သော

(၁)Professor James Scott, living in United States,

(၂)ပြည်သူ့လွှတ်တော်ကိုယ်စားလှယ်များ

(၃) အခမ်းအနားအတွက် တတ်အားသရွေ့ အလှုငွေများ လှုဒါန်းပေးကြသော အလှုရှင်များအားလုံး

(၄) ယခုကျင်းပသော ကျဆုံးနိုင်ငံရေးအကျဉ်းသားများနှင့် မိသားစုဝင်များအား ဂုဏ်ပြုပွဲအခမ်းအနား သို့ တက်ရောက်ချီးမြှင့် ဂုဏ်ပြုပေးကြသော ဧည့်သည်တော်များအားလုံးအား အထူးပင်ကျေးဇူးတင် ရှိပါကြောင်း…..ပြောကြားရင်းနိဂုံးချုပ်အပ်ပါတယ်ခင်ဗျာ….

ဘိုကြည်

တွဲဖက်အတွင်းရေးမှူး

နိုင်ငံရေးအကျဉ်းသားများကူညီစောင့်ရှောက်ရေးအသင်း(မြန်မာနိုင်ငံ)