စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ အောက်တိုဘာလ ၁၉ ရက်၊ ၂၀၂၁ ခုနှစ်
ယမန်နေ့ (အောက်တိုဘာ ၁၈)မှစတင်၍ အကြမ်းဖက်စစ်အုပ်စုမှ နိုင်ငံရေးနှင့်ဆက်နွယ်သော ပြစ်ဒဏ်ချမှတ်ခြင်းခံရသူ (၁၃၁၆)ဦး၊ တရားရင်ဆိုင်နေရသူ (၄၃၂၀)ဦးကို လွှတ်ပေးခဲ့သည် ထုတ်ပြန်ကြေညာခဲ့သည်။ ယမန်နေ့နှင့် ယနေ့ (အောက်တိုဘာ ၁၉)တွင် လွတ်မြောက်လာသူ (၁၈၉) ဦးကို နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ မှတ်တမ်းပြုနိုင်ခဲ့ပါသည်။ လွတ်မြောက်လာသူဦးရေအတိအကျနှင့် အမည်စာရင်းမှာ ချက်ချင်းရရှိရန် လက်လှမ်းမမီနိုင်သည့်အတွက် အတည်ပြုရန် လိုအပ်နေဆဲဖြစ်ပြီး အတည်ပြုနိုင်သည့် အမည်စာရင်းများကို ဆက်လက် ဖော်ပြပေးသွားပါမည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ကျဆုံးသွားခဲ့သူများကို အတည်ပြုနိုင်ခြင်းမရှိသေးသည့်အတွက် စစ်အာဏာရှင်တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယမန်နေ့အထိ (၁၁၈၁) ဦး ရှိခဲ့ပြီဖြစ်ပါသည်။ အဆိုပါအရေအတွက်သည် AAPP မှ ကောက်ယူရရှိထားသည့် အရေအတွက်ဖြစ်ပြီး အမှန်တကယ် ကျဆုံးသွားသူများမှာ အဆိုပါအရေအတွက်ထက် ပိုများ နေနိုင်ပါသည်။ ထပ်မံ ကောက်ယူရရှိလာပါကလည်း ဆက်လက် ထည့်သွင်း ဖော်ပြပေးသွားမည် ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ အောက်တိုဘာလ ၁၉ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၇၁၉၀) ဦးရှိပြီး ၎င်းတို့အနက်မှ (၃၁၇) ဦး မှာ ထောင်ဒဏ်ချမှတ်ခြင်းခံထားရသည်။ ထိုပြစ်ဒဏ်ကျခံရသူထဲမှ အသက် ၁၈ နှစ်အောက် ကလေး (၂) ဦး အပါအဝင် (၂၆) ဦးမှာ သေဒဏ်ချမှတ်ခံထားရသည်။ ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၉၅၄) ဦး၏ အမည်စာရင်းကိုလည်း သီးခြားဖော်ပြထားပြီး ၎င်းတို့အနက်မှ မျက်ကွယ် သေဒဏ်ချမှတ်ခြင်းခံထားရသူ (၃၉) ဦး အပါအဝင် (၁၁၈) ဦးမှာ မျက်ကွယ် ပြစ်ဒဏ်ချမှတ်ခြင်းခံထားရသည်။ ထိုကြောင့် သေဒဏ်ချမှတ်ခံထားရသူ စုစုပေါင်း (၆၅) ဦးရှိပြီဖြစ်သည်။
မန္တလေးတိုင်းဒေသကြီး၊ မိထ္ထီလာအကျဉ်းထောင်မှ အောက်တိုဘာလ ၁၈ ရက်နေ့တွင် ပြန်လည်လွတ်မြောက်လာသူ (၁၁) ဦးကို အကြမ်းဖက်မှုတိုက်ဖျက်ရေးဥပဒေဖြင့် ရဲများမှ ထောင်ပေါက်ဝတွင် ပြန်လည် ဖမ်းဆီးခဲ့ကြောင်း သိရှိရသည်။ လွတ်မြောက်လာသူ (၁၁) ဦးမှာ အမျိုးသားဒီမိုကရေစီအဖွဲ့ချုပ်မှ မိထ္ထီလာမြို့နယ်၊ တိုင်းဒေသကြီးလွှတ်တော်ကိုယ်စားလှယ် ဦးလွင်မောင်မောင်၊ ဦးသက်မောင်မောင်၊ ကိုဝေဖြိုးအောင်၊ ကိုသီဟကျော်၊ ကိုနေလင်းအောင်၊ ကိုထွန်းအောင်ကျော်၊ ကိုအောင်ကျော်ထက်၊ ကိုဇော်ထက်အောင်၊ ကိုစောနန္ဒ၊ ကိုပိုင်ဇေစိုး နှင့် သာစည်မြို့နယ်မှ သပိတ်ခေါင်းဆောင် ဒေါ်လေးလေးနိုင် တို့ဖြစ်ကြောင်း သိရှိရသည်။ ထို့ပြင် မန္တလေးတိုင်းဒေသကြီး၊ မြင်းခြံအကျဉ်းထောင်မှ အောက်တိုဘာလ ၁၈ ရက်နေ့တွင် ပြန်လည်လွတ်မြောက်လာသော ကိုရဲမြင့်အောင်နှင့် ကိုကုလားကြီးတို့ကို ယင်းနေ့တွင်ပင် ပြန်လည် ဖမ်းဆီးခဲ့ကြောင်း သိရှိရသည်။ အလားတူဖြစ်ရပ်များသည် နိုင်ငံအနှံ့တွင် ဖြစ်ပွားနိုင်ပါသည်။ စစ်အုပ်စုသည် ယမန်နေ့ရက်စွဲဖြင့် ပြစ်ဒဏ်ချမှတ်ခြင်းခံထားရသူများနှင့် တရားရင်ဆိုင်နေရသူစုစုပေါင်း ၅၆၃၆ ဦးကို လွှတ်ပေးမည်ဟု ကြေညာခဲ့သော်လည်း ထောင်မှ လွှတ်ပေးလိုက်ပြီး နေ့ချင်းပြန်လည်ဖမ်းဆီးမှုများ၊ မူလစွဲဆိုထားသည့်ပုဒ်မကို ရုတ်သိမ်းလိုက်ပြီး အခြားပုဒ်မများဖြင့် ထပ်မံတရားစွဲဆိုကာ ဆက်လက်ချုပ်နှောင်ထားခြင်းများလည်းရှိနေသည်။ အဆိုပါဖြစ်ရပ်များကို သုံးသပ်ကြည့်ပါက အမှန်တကယ် လွှတ်ပေးလိုက်သူမှာ ၎င်းတို့ကြေညာချက်ပါအရေအတွက်ထက် နည်းနေနိုင်ပါသည်။ မည်သို့ပင်ဖြစ်စေ ယနေ့တွင် လွတ်မြောက်လာသူများအား မိမိတို့ နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP)အနေဖြင့် ဂုဏ်ယူ ဝမ်းမြောက်စွာဖြင့် ကြိုဆိုလိုက်ပါသည်။ ထို့အပြင် ကျန်ရှိနေသေးသည့် နိုင်ငံတော်သမ္မတ၊ နိုင်ငံတော်၏အတိုင်ပင်ခံပုဂ္ဂိုလ်တို့ အပါအဝင် ဖမ်းဆီးထားသူများအား ခြွင်းချက်မရှိလွှတ်ပေးရန်နှင့် မတရားညှဉ်းပန်းနှိပ်စက်ဖမ်းဆီးမှုများကျူးလွန်ထားသူများကို အပြစ်ပေးအရေးယူပေးနိုင်ရန်အတွက် မိမိတို့တတ်စွမ်းသရွေ့ဆက်လက်ကြိုးပမ်းသွားပါမည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။ ထို့ပြင် ကျဆုံးအချက်အလက်များကို ဖော်ပြပါ fatality-data@aappb.org အီးမေးလ်သို့လည်းကောင်း၊ အဖမ်းအဆီးအချက်အလက်များကို detention-data@aappb.org အီးမေးလ်သို့လည်းကောင်း တိုက်ရိုက်ပေးပို့၍ ဆက်သွယ် အကြောင်းကြားနိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း
နွေဦးတော်လှန်ရေးကာလကျဆုံးသူများစာရင်း Recent Fatality List for October 19, 2021 (Burmese)
မတရားဖမ်းဆီးထိန်းသိမ်းခံထားရသူများစာရင်း Under-Detention-List-Last-Updated-on-19-October-2021
ပြန်လည်လွတ်မြောက်လာသူများစာရင်း Release-Lists-Last-Updated-on-19-October-2021
အမိန့်ချမှတ်ခံထားရသူများစာရင်း Under-Sentenced-List-Last-Updated-on-19-October-2021