စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ မေလ ၁၅ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ယခင်နေ့ရက်များက ကျဆုံးသွားခဲ့သည့် မန္တလေးတိုင်းဒေသကြီး၊ မန္တလေးမြို့ နှင့် ချင်းပြည်နယ်၊ မင်းတပ်မြို့တို့မှ အပြစ်မဲ့ ပြည်သူ (၂) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ကြောင့် ယမန်နေ့အထိ ကျဆုံးသွားခဲ့သူ (၇၉၀) ဦး ရှိခဲ့သည်။ ယနေ့တွင် ကျဆုံးသွားခဲ့သူများကို အတည်ပြုနိုင်ခြင်းမရှိသေးသည့်အတွက် စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယနေ့အထိ (၇၉၀) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက် ဖြစ်ပြီး အမှန်တကယ် ကျဆုံးသွားသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံ ကောက်ယူ ရရှိလာပါကလည်း ဆက်လက် ထည့်သွင်း ဖော်ပြပေးသွားမည် ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ မေလ ၁၅ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၉၈၉) ဦးရှိပြီး ၎င်းတို့အနက်မှ (၉၂) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၆၅၉) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက်မှ (၂၀) ဦးမှာ မျက်ကွယ် သေဒဏ်နှင့် (၁၄) ဦးမှာ အလုပ်ကြမ်း နှင့် ထောင်ဒဏ် သုံးနှစ်စီ မျက်ကွယ် ထောင်ဒဏ်ချမှတ်ခြင်းခံထားရကာ လက်ရှိတွင် တိမ်းရှောင်နေဆဲ ဖြစ်သည်။ ပြန်လည် လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြု ရန် လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
မြန်မာပြည်တွင်း ပြည်သူများ၏ လုံခြုံရေး အခြေအနေများသည် တစ်နေ့ထက်တစ်နေ့ ပို၍ ဆိုးရွားလာနေပြီး ယခုအခါ စစ်အုပ်စု၏ အကြမ်းဖက်မှုသည် အရက်စက်ဆုံး အခြေအနေသို့ ကျရောက်နေပြီဖြစ်သည်။ ပြည်သူများအပေါ် အငြှိုးထား ကာ ပစ်ခတ်သတ်ဖြတ်မှုများ၊ ညှဉ်းပန်းနှိပ်စက်မှုများသည် မြင့်တက်လျက်ရှိပြီး ခိုး၊ ဆိုး၊ လုယက်၊ ဖျက်ဆီး စသည့် အဖျက်အမှောင့်လုပ်ရပ်များသည်လည်း လျော့ကျသွားခြင်းမရှိပေ။
ယနေ့ (မေ ၁၅) နံနက်ပိုင်းတွင် ရှမ်းပြည်နယ်၊ တောင်ကြီးမြို့၌ပြုလုပ်သော လူထုသပိတ်စစ်ကြောင်းကိုဖြိုခွင်းခဲ့ပြီး လူငယ် လေးဦးကို ဖမ်းဆီးသွားခဲ့သည့်အပြင် ရန်ကုန်တိုင်းဒေသကြီး၊ ရန်ကင်းမြို့နယ်၌ ပြုလုပ်သော ရန်ကုန်သပိတ်စစ်ကြောင်းကို ဆန္ဒပြပြီးလူစုခွဲချိန်၌ ဆိုင်ကယ်များဖြင့် လိုက်လံဖမ်းဆီးခဲ့သောကြောင့် လူငယ် ခုနှစ်ဦး ဖမ်းဆီးခြင်းခံခဲ့ရသည်ဟု သိရှိရ သည်။
ချင်းပြည်နယ်၊ မင်းတပ်မြို့၌လည်း အကြမ်းဖက် စစ်အုပ်စုကို ပြန်လည် ခုခံသောကြောင့် တိုက်ပွဲများ ပြင်းထန်စွာ ဖြစ်ပွားနေ ပြီး အခြေအနေအလွန်ဆိုးရွားနေကြောင်း သိရှိရသည်။ စစ်အုပ်စုမှ အင်အားတစ်ထောင်နီးပါးဖြည့်တင်းကာ မင်းတပ်မြို့ကို လက်နက်ကြီးများဖြင့် အကြိမ်ကြိမ်ပစ်ခတ်လျှက်ရှိသည့်အပြင် မြို့တွင်းဝင်လာပြီး ပြည်သူများကို တောက်လျှောက်ပစ်ခတ် လျှက်ရှိသည်။ ကလေးသူငယ်များအပါအဝင် ပြည်သူများ ဒဏ်ရာရရှိထားကြပြီး ဆေးကုသမှုခံယူနိုင်ခြင်းမရှိကြောင်း သိရှိရ သည်။ လူငယ် ၁၅ ဦးကျော်ကို ဓားစာခံအဖြစ် ဖမ်းဆီးခဲ့ပြီး အနောက်မှ သေနတ်ဖြင့်ချိန်၍ မြို့အတွင်းသို့ ဝင်ခဲ့သည်ဟု သိရှိရသည်။ မင်းတပ်မြို့ပေါ်တွင်နေထိုင်သည့် ယောက်ကျင်္ားလေးမှန်သမျှကိုလည်း အကုန်ဖမ်းဆီးလျှက်ရှိပြီး တံခါးများ ဖျက်၍ အိမ်အတွင်းထိတိုင်အောင် ရိုက်နှက် ဖမ်းဆီးလျှက်ရှိကြောင်း သိရှိရသည်။
ယင်းကဲ့သို့ အင်အားအလုံးအရင်း သုံး၍ စစ်မြေပြင်သဖွယ် တိုက်ခိုက်လျှက်ရှိခြင်းသည် အကြမ်းဖက် စစ်အုပ်စုမှ ပြည်သူ့ ကာကွယ်ရေးတပ်များ (PDF) ကို စတင်၍ အမြစ်ပြတ် ချေမှုန်းရန် ရည်ရွယ်သည်ဟု သုံးသပ်ရပါ သည်။ တိုက်ပွဲများအတွင်း လူသားဒိုင်း အသုံးပြုခြင်းသည် “စစ်ရာဇဝတ်မှု” ဖြစ်ပြီး နိုင်ငံသားများအပေါ် ရန်ငြိုးတကြီး တိုက်ခိုက်နေသည်မှာ အသိဉာဏ် ချွတ်ခြုံကျခြင်းပင်ဖြစ်သည်။
အကြမ်းဖက် စစ်အုပ်စုသည် အကြောင်းမဲ့ နှင့် ရည်ရွယ်ချက်ရှိရှိ ပစ်ခတ် သတ်ဖြတ်မှု၊ ညှဉ်းပန်းနှိပ်စက်မှု စသည့် လူမဆန်သော လုပ်ရပ်များကို နေ့စဉ်ရက်ဆက် ကျူးလွန်လျှက်ရှိရာ စစ်ကိုင်းတိုင်းဒေသကြီး၊ မုံရွာမြို့တွင် ကဗျာဆရာ၊ ပရဟိတသမား နှင့် ဝါရင့် နိုင်ငံရေးသမား တစ်ဦးဖြစ်သူ ဦးစိန်ဝင်းသည် စစ်ဘေးရှောင်များအတွက် အလှူခံသွားခဲ့ပြီး သူငယ်ချင်းအိမ်၌ စကားပြောနေစဉ် အမည်မသိ လူတစ်ဦး ရောက်ရှိလာကာ ဓာတ်ဆီလောင်း၍ မီးရှို့သတ်ဖြတ်ခြင်းခံခဲ့ရ သည်။ ထိုကဲ့သို့သော ရက်စက်သည့် လုပ်ရပ်မျိုးကို အကြမ်းဖက် စစ်အုပ်စုကသာ အကြိမ်ကြိမ်ကျူးလွန်လျှက်ရှိပြီး ပြည်သူများအပေါ် ရန်သူများသဖွယ် ပို၍ ပြုမူလာသည်မှာ အာဏာသိမ်းပြီးကတည်းကဖြစ်သည်။
မန္တလေးမြို့၊ အောင်မြေသာစံမြို့နယ်၌ မေလ ၂ ရက်နေ့ ဆန္ဒထုတ်ဖော်ပွဲ ဖြိုခွင်းခံရစဉ် ပေါင်ကို ကျည်ထိမှန်ခဲ့သော မြန်မာစာဆရာတစ်ဦးသည် ပြင်ဦးလွင် စစ်ဆေးရုံ၌ ကျဆုံးသွားခဲ့ပြီး ၎င်း၏ မိသားစုကို မည်သည့်အတွက် သေဆုံးကြောင်း အကြောင်းမကြားဘဲ ရုပ်အလောင်းကိုလည်း သင်္ဂြိုလ်ခွင့်မရကြောင်းသိရှိရသည်။ မည်သည့်အကြောင်းကြောင့် ကျဆုံး သည်ကို သိရှိရခြင်းမရှိခြင်းက ၎င်းတို့၏ မရိုးသားမှုကို ဖော်ပြနေပြီး အာဏာသိမ်းမှုကာလအတွင်း အလားတူသော ဖြစ်ရပ် အမျိုးမျိုးကို ကျူးလွန်သူမှာ အကြမ်းဖက် စစ်အုပ်စုသာဖြစ်သည်။
အခြားတစ်ဖက်၌လည်း အကြမ်းဖက် စစ်အုပ်စုသည် အဖျက်အမှောင့်လုပ်ရပ်များ၊ လုယက်ဖျက်ဆီးမှုများကို နေ့စဉ် ကျူးလွန်လျှက်ရှိသည်။ ယမန်နေ့ (မေ ၁၄) ညအချိန်က စစ်ကိုင်းတိုင်းဒေသကြီး၊ ရွှေဘိုမြို့ စည်ပင်သာယာဈေးကြီး မီးရှို့ခံရ ခြင်းက ညမထွက်ရအအမိန့်ထုတ်ပြန်ထားချိန်ဖြစ်သောကြောင့် ၎င်းတို့၏လုပ်ရပ်နှင့်ဆက်စပ်မှုရှိနေသည်ဟု ဒေသခံများက ပြောဆိုနေကြသည်။ ထို့ပြင် ကချင်ပြည်နယ်၊ မြစ်ကြီးနားမြို့၌ လမ်းသွားလမ်းလာများကို သေနတ်ထောက်၍ ပိုက်ဆံများ တောင်းခဲ့ကာ မပေးလျှင် ပစ်သတ်မည်ဟု ခြိမ်းခြောက်ခဲ့ပြီး မိုးကောင်းမြို့နယ်၌လည်း အလားတူ ကျူးလွန်ခဲ့သည်ဟု သိရှိရသည်။ ထိုကဲ့သို့သော လုပ်ရပ်များကို ကျူးလွန်ခြင်းကြောင့် ၎င်းတို့သည် ဓားပြများနှင့်မခြားဖြစ်သည်ကို ညွှန်းဆို ဖော်ပြနေသည်။
ယမန်နေ့ (မေ ၁၄) ညကလည်း ဇီဝိတဒါနသံဃာ့ဆေးရုံ တံခါးများကို ရိုက်ဖျက်၍ အတင်းအဓမ္မ စီးနင်းခဲ့ပြီး ထိခိုက်ဒဏ်ရာ အပြင်းအထန်ရရှိထားသည့် လူနာတစ်ဦး၊ ဆရာဝန် တစ်ဦး၊ အလုပ်သင် တစ်ဦး၊ စေတနာ့ဝန်ထမ်း နှစ်ဦး နှင့် လူနာစောင့် တစ်ဦး စုစုပေါင်း ၆ ဦးကို ဖမ်းဆီး ခေါ်ဆောင်သွားခဲ့သည်ဟု သိရှိရသည်။ အထူးကာကွယ်စောင့်ရှောက်ရမည့် နေရာများ ကိုပင် ဂရုမစိုက်ဘဲ စီးနင်းခြင်းသည် ဂျီနီဗာကွန်ဗန်းရှင်းကို ပြောင်ပြောင်တင်းတင်းချိုးဖောက်ခြင်းဖြစ်သည်။
ယင်းကဲ့သို့သော အမျိုးမျိုးသော ရက်စက်မှုများကို ကျူးလွန်လျှက်ရှိသော်လည်း အကြမ်းဖက် စစ်အုပ်စုကို ထိရောက်သော အရေးယူမှုများ မပြုလုပ်နိုင်သေးပါ။ မြန်မာ့အရေးနှင့်ပတ်သက်၍ ဒေသတွင်း အာဆီယံနိုင်ငံများမှ ဘုံသဘောတူညီချက် ငါးချက်ကို ထုတ်ပြန်ခဲ့ပြီးသည့်နောက် နောက်ဆက်တွဲအနေဖြင့် မည်သည့် လှုပ်ရှားမှုမှမရှိဘဲ နှုတ်ဆိတ်နေခြင်းမှာ ၎င်းတို့၏ အခန်းကဏ္ဍပြီးဆုံးပြီဟု မှတ်ယူနေသလို ထင်ရသည်။ ထိုအခြင်းအရာသည် အာဏာရှင်စနစ်ကို အားပေးသကဲ့သို့ဖြစ်စေပြီး ဒီမိုကရေစီ ဖြစ်ထွန်းရေးကို နှောင့်နှေးစေမည်ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

နွေဦးတော်လှန်ရေးအတွင်းကျဆုံးသူများစာရင်း Fatality List for May 15, 2021 (Bur) (Updated)
မတရားဖမ်းဆီးထိန်းသိမ်းခံထားရသူများစာရင်း Under Detention List_Burmese (15-May-2021)
ပြန်လည်လွတ်မြောက်လာသူများစာရင်း Release Lists_English (15-May-2021)