စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ် နှင့်နွေဦးတော်လှန်ရေးကာလအတွင်း ကျဆုံးသူများစာရင်းထုတ်ပြန်ချက်

ရက်စွဲ မတ်လ ၁ရ ရက်၊ ၂၀၂၁ ခုနှစ်

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)သည် ယနေ့တွင် ကျဆုံးသွားခဲ့သည့် စစ်ကိုင်းတိုင်း ဒေသကြီး ကလေးမြို့၊  ရန်ကုန်တိုင်းဒေသကြီး တောင်ဒဂုံ၊ လှိုင်၊ မင်္ဂလာတောင်ညွန့်မြို့နယ် နှင့် မန္တလေးတိုင်းဒေသကြီး မန္တလေးမြို့တို့မှ အရပ်သားပြည်သူ (၉) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ပြင် ယခင်နေ့ရက် များမှ ကျဆုံးသွားခဲ့ကြသည့် အရပ်သားပြည်သူ  (၆) ဦး၏ အချက်အလက်များကို ထပ်မံရရှိသည့်အတွက် ယမန်နေ့အထိ ကျဆုံးသွားခဲ့သူ (၂၀၈) ဦးရှိခဲ့ပြီး ယနေ့အထိ စစ်အာဏာရှင်တော်လှန်ရေး (နွေဦးတော်လှန်ရေး)ကာလအတွင်း ကျဆုံးခဲ့ရသူစုစုပေါင်း (၂၁၇) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူရရှိထားသည့် အရေအတွက်ဖြစ်ပြီး အမှန်တကယ်ကျဆုံးသူများမှာ အဆိုပါအရေအတွက်ထက် ပိုများနေနိုင်ပါသည်။ ထပ်မံကောက်ယူရရှိ လာပါက ဆက်လက် ဖော်ပြပေးသွားပါမည်။ 

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ မတ်လ ၁ရ ရက်နေ့ထိ စုစုပေါင်း ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသူ (၂၁၉၁) ဦးထိရှိခဲ့ပြီ ဖြစ်သည်။ ၎င်းတို့အနက်မှ ထောင်ဒဏ်ချမှတ်ခြင်းခံထားရသူ (၁၅) ဦး၊ အမှုဖွင့်ခြင်းခံထားရပြီး ဖမ်းဝရမ်းထုတ်ခြင်းခံ ထားရသောကြောင့် တိမ်းရှောင်နေသူ (၇၃) ဦး နှင့် ပြန်လည် လွတ်မြောက်လာသူ (၃၁၈) ဦးရှိခဲ့သည်။ ထို့ကြောင့် လက်ရှိ အချိန်အထိ (၁၈၇၂) ဦးမှာ ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသည်။  

ယနေ့ထုတ်ပြန်သည့်အဖမ်းအဆီးစာရင်းတွင် ဖမ်းဆီးခြင်းခံရသူ (၁၀) ဦး၏အမည်စာရင်းကိုရရှိခဲ့၍ ထည့်သွင်း မှတ်တမ်းပြု ထားပါသည်။ ဖော်ပြပါအရေအတွက်ထက်ပိုသော ဖမ်းဆီးမှုများရှိသည်ဖြစ်ရာ ဖမ်းဆီးခံများ၏ အချက်အလက်များကို မိမိတို့အနေဖြင့် ဆက်လက်စုံစမ်းလျက်ရှိပြီး ရရှိလာသည့် အချက်အလက်များကို ထုတ်ပြန်ပေးသွားမည်ဖြစ်ပါသည်။

မတ်လတွင် အာဏာသိမ်းစစ်အုပ်စု၏ ဖြိုခွင်းမှုနည်းဗျူဟာသည် တဖြည်းဖြည်း ပြောင်းလဲလာခဲ့သည်ကို တွေ့ရှိရသည်။ ၎င်းတို့သည် သာမန်ဖြိုခွင်းလေ့ရှိသည့် နည်းလမ်းများမှ သွေဖည်ကာ ကျည်အစစ်ဖြင့် ဖြိုခွင်းနည်းကို အသုံးပြုလာခဲ့သည်။ ထို့ပြင် ရပ်ကွက်များ၊ လမ်းများပါမကျန် အကြောင်းမဲ့ ပစ်ခတ်မှုများကို ဆက်တိုက် ပြုလုပ်လျက်ရှိသည်။ ထို့ပြင် ဆန္ဒထုတ်ဖော်ခြင်းမရှိသော ပြည်သူများ၊ ကလေးသူငယ်များ နှင့် အမျိုးသမီးများကိုလည်း ပစ်မှတ်ထားလာခဲ့ကြသည်ကို တွေ့ရှိရသည်။

ယနေ့တွင် စစ်ကိုင်းတိုင်း၊ ကလေးမြို့၌ ဖြိုခွင်းမှုများပြင်းထန်ခဲ့ပြီး ဆန္ဒထုတ်ဖော်ပွဲတွင် ပါဝင်ခြင်းမရှိသော အရပ်သား ပြည်သူ (၃) ဦးသည် အကြောင်းမဲ့ပစ်သတ်ခြင်းခံခဲ့ရသောကြောင့် ကျဆုံးခဲ့ရကာ၊ နောက်ထပ် ပြည်သူတစ်ဦးမှာ ဆန္ဒပြပွဲကို ဖြိုခွင်းမှုကြောင့် ကျဆုံးခဲ့ရသည်။ အလားတူ ဆန္ဒထုတ်ဖော်ပွဲတွင် ပါဝင်ခြင်းမရှိသော ရန်ကုန်တိုင်း၊ တောင်ဒဂုံမြို့နယ်မှ အမျိုးသမီး (၁) ဦးသည်လည်း အကြောင်းမဲ့ပစ်သတ်ခြင်းခံခဲ့ရ၍ ဦးခေါင်းကိုကျည်ထိမှန်ကာ ကျဆုံးသွားခဲ့သည်။ ထို့ပြင် ဖြိုခွင်းမှုအတွင်း ရန်ကုန်တိုင်း၊ လှိုင်မြို့နယ်၌ အမျိုးသား (၂) ဦး နှင့် မန္တလေးတိုင်း၊ မန္တလေးမြို့မှ အမျိုးသား (၁) ဦးသည် ဦးခေါင်းကို ကျည်ထိမှန်ကာ ကျဆုံးသွားခဲ့သည်။ ယနေ့တွင် နိုင်ငံအနှံ့၌ ယခုထက်ပို၍ ကျဆုံးမှုများရှိမည်ဖြစ်ပြီး ထပ်မံ အတည်ပြုရရှိသည့် ကျဆုံးစာရင်းကို ဆက်လက် စုံစမ်း၍ တင်ပြသွားပါမည်။

ယနေ့တွင် ဧရာဝတီတိုင်းဒေသကြီး ပုသိမ်မြို့၊ အမှတ် ၃ ရပ်ကွက်၊ ကိုးသောင်းတွင် နေအိမ်ဆောက်ရန်အတွက် သဲသယ်လာခြင်းကို ရဲနှင့် စစ်တပ်မှ ရပ်ကွက်အတွင်းသို့ ဝင်ရောက်ပစ်ခတ်ခဲ့သည်။ ထို့နောက် ကိုးသောင်း ၃ လမ်းတွင် နေထိုင်သည့် အသက် ၁၁ နှစ်အရွယ်၊ ခြောက်တန်းကျောင်းသူ မိန်းခလေးငယ် (၁) ဦးကို ဖုန်းကိုင်ထားခြင်းကြောင့်ဟုဆိုကာ ဖမ်းဆီးသွားခဲ့သည်။

မတ်လ ၁၄ ရက်နေ့မှ ၁ရ ရက်နေ့အတွင်း စစ်ကောင်စီမှအကြမ်းဖက်မှုကြောင့် ကျဆုံးခဲ့ရသူများစာရင်း

ထို့ပြင် အကြမ်းဖက် စစ်တပ် နှင့် ရဲများမှ အရပ်သားပြည်သူများကို ဖမ်းဆီး၍ အတင်းအဓမ္မလုပ်အားပေးခိုင်းစေခဲ့သည်။ ရန်ကုန်မြို့၊ ကမာရွယ်၊ စမ်းချောင်း၊ ရန်ကင်းမြို့နယ်များရှိ  လမ်းသွားလမ်းလာများ နှင့် ကားများကို တားဆီး၍ သေနတ်ဖြင့် ချိန်ကာ ပြည်သူများ ပြုလုပ်ထားသော အကာအကွယ်များကို အတင်းအဓမ္မဖယ်ရှားခိုင်းခဲ့သည်။ ထို့ပြင်  လှိုင်မြို့နယ်ရှိ ရွှေကောင်းကြွယ်လက်ဘက်ရည်ဆိုင်မှ အလုပ်သမားများအားလုံးကိုလည်း ဖမ်းဆီး၍ အလားတူပင် ခိုင်းစေခဲ့သည်။ ထို့ပြင် ရန်ကုန် နှင့် မန္တလေးတို့၌ ပြည်သူများ အကာအကွယ်များ လုပ်ထားလျှင်၊ လမ်းများကို ပိတ်ထားလျှင် အိမ်တိုင်းကို သေနတ်ဖြင့်ပစ်၍ ရက်ကွက်များကို ဖျက်ဆီးပစ်မည်ဟု ခြိမ်းခြောက်ပြောဆိုခဲ့သည်။ ထို့အတူ ရန်ကုန်တိုင်း၊ လှိုင်သာယာမြို့နယ်တွင် နဝဒေးအိမ်ရာ နှင့် ကျန်စစ်သားအိမ်ရာတို့မှ အမျိုးသားများကို ဖမ်းဆီး ခေါ်ဆောင်သွားခဲ့သည်။  

အာဏာသိမ်းစစ်အုပ်စု၏ လက်ပါးစေ လုံခြုံရေးတပ်ဖွဲ့ဝင်များသည် ပစ်ခတ်သတ်ဖြတ်မှုများကို နည်းမျိုးစုံဖြင့် ကျူးလွန်လျက်ရှိသည့်အပြင် အခြားတစ်ဖက်၌လည်း အဖျက်အမှောင့်အမျိုးမျိုးကို ရည်ရွယ်ချက်ရှိရှိ ဖန်တီးလျက်ရှိသည်။ ၎င်းတို့သည် ပုဂ္ဂလိကပိုင် နှင့် အများပိုင်ပစ္စည်းများ၊ လမ်းတံတားများကို ဖျက်ဆီးခြင်း၊ ရိုက်ချိုးခြင်း၊ မီးရှို့ခြင်းတို့ကို စနစ်တကျ ကျူးလွန်ခဲ့ကြသည်မှာ ယခုရက်ပိုင်းအတွင်း နိုင်ငံအနှံ့အပြား၌ ပို၍ ကျယ်ကျယ်ပြန့်ပြန့်ဖြစ်လာခဲ့သည်။ ယမန်နေ့ည နှင့် ယနေ့တို့တွင် ရန်ကုန်မြို့၊ တောင်ဥက္ကလာပမြို့နယ်၊ ပဲခူးတိုင်း၊ ကဝမြို့နယ်တို့၌ ဖျက်ဆီးမှုများနှင့် မီးရှို့ခြင်းများကို ပြုလုပ်ခဲ့သည်။ အဖျက်အမှောင့်လုပ်ရပ်များကို ဖန်းတီးတိုင်း အာဏာသိမ်းစစ်အုပ်စု၏ သတင်းဌာန ဖြစ်သော မြန်မာ့အသံ နှင့် ရုပ်မြင်သံကြားမှ ပြည်သူများမှ ပြည်သူများကသာ ကျူးလွန် အကြမ်းဖက်သည်ဟု စွပ်စွဲ လျက်ရှိသည်။

မတ်လ ၁၅ ရက်နေ့တွင် Global Centre for R2P  သည် လက်နက်ကုန်သွယ်မှုအား ရပ်ဆိုင်းရန်၊ စစ်အုပ်စုကို အသိအမှတ် မပြုရန် နှင့် ၎င်းတို့၏ စီးပွားရေးလုပ်ငန်းများ၌ ရင်းနှီးမြှပ်နှံခြင်းမပြုဘဲ ပိတ်ဆို့မှုသာပြုရန် နိုင်ငံတကာ နှင့် ပြည်တွင်းမှ တောင်းဆိုချက်များအား ထပ်လောင်း၍ တောင်းဆိုမှုပြုခဲ့သည်။ အတိတ် နှင့် ပစ္စုပ္ပန်၌ လူသားချင်းစာနာမှုကို ဆန့်ကျင်သော ရာဇဝတ်မှုများ၊ စစ်ရာဇဝတ်မှုများ နှင့် လူမျိုးတုန်းသတ်ဖြတ်မှုများအတွက်  တာဝန်ရှိသော အာဏာသိမ်းစစ်ခေါင်းဆောင် များသည် နိုင်ငံတကာ၏ တရားစီရင်မှုကို ရင်ဆိုင်ရမည်ဟု ဆိုသည်။

ထို့ပြင် နိုင်ငံတော်သံဃာ့မဟာနာယကအဖွဲ့မှလည်း စစ်အုပ်စု၏ အကြမ်းဖက်လုပ်ရပ်များကြောင့် နိုင်ငံတော်သံဃာ့ မဟာနာယကအဖွဲ့ လုပ်ငန်းတာဝန်များ ဆောင်ရွက်လုပ်ကိုင်ခြင်းကို လုံးဝ ရပ်ဆိုင်းရန် ယမန်နေ့က ဆုံးဖြတ်ခဲ့ကြပြီး စစ်အုပ်စု၏ အကြမ်းဖက်လုပ်ရပ်များကို ရပ်တန့်ရန် နှင့် မတရားဖမ်းဆီးထားသူများကို လွှတ်ပေးရန် တောင်းဆိုခဲ့သည်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။

အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ထိန်းသိမ်း၊ တရားစွဲဆိုခြင်းခံထားရသည်ကို သိရှိပါက အောက်ပါလိပ်စာများသို့  ဆက်သွယ်၍ အသိပေး၊ အကြောင်းကြား နိုင်ပါသည်။ 

ဥပဒေပိုင်းဆိုင်ရာအကူအညီလိုအပ်ပါကလည်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) မှ  ကိုအောင်ကြီး၊ ဖုန်း – ဝ၉၄၅၁၅၂၉၀၀ဝ နှင့် တရားလွှတ်တော်ရှေ့နေ ဒေါ်ခင်သီတာလဲ့လဲ့ထွန်း၊ ဖုန်း –  ဝ၉၇၇၄၀၈၁၅၈၅ တို့အား ဆက်သွယ်နိုင်ပါသည်။ 

“အရေးတော်ပုံအောင်ရမည်”

Email :   info@aappb.org

Facebook : https://web.facebook.com/burmapoliticalprisoners/

Twitter : https://twitter.com/aapp_burma

နိုင်ငံရေးအကျဉ်းသားများကူညီစောင့်ရှောက်ရေးအသင်း

ကျဆုံးသူများစာရင်းဒေါင်းလော့ရယူရန် Recent Fatality List (Last Updated on 17 March 2021)final (to upload1)
ဖမ်းဆီးထိန်းသိမ်းခံထားရသူများစာရင်းဒေါင်းလော့ရယူရန်Recent Arrest List (Last Updated on 17 March 2021)final (to upload1)