စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ စက်တင်ဘာလ ၂၁ ရက်၊ ၂၀၂၂ ခုနှစ်

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်လှမ်းမီသမျှ မှတ်တမ်းပြုစုထားချက်အရ အာဏာသိမ်းချိန်မှ ၂၀၂၂ ခုနှစ် ဩဂုတ်လကုန်ထိ အကြမ်းဖက်စစ်အုပ်စု၏ မတရား ချိပ်ပိတ်သိမ်းဆည်းခြင်းခံရသည့် နေအိမ်၊ အဆောက်အဦ အရေအတွက် စုစုပေါင်း (၇၆၀) ခုထက်မနည်းရှိခဲ့သည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့ မတရားစစ်အာဏာလုမှုဖြစ်စဉ်ကို ဆန့်ကျင်ခဲ့ကြသော ဒီမိုကရေစီရေးလှုပ်ရှားသူများနှင့် ပြည်သူများ၏ နွေဦးတော်လှန်ရေးကာလအတွင်း ကျဆုံးခဲ့ရသူ စုစုပေါင်းမှာ (၂၃၀၃) ဦး ရှိခဲ့ပြီဖြစ်ပါသည်။ 

၂၀၂၁ ခုနှစ် အာဏာသိမ်းချိန်မှ ၂၀၂၂ ခုနှစ် စက်တင်ဘာလ ၂၁ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၁၂၄၅၅) ဦးရှိပြီး ၎င်းတို့အနက်မှ  (၁၄၈၅) ဦး မှာ ထောင်ဒဏ်ချမှတ်ခြင်းခံထားရသည်။ စက်တင်ဘာလ ၂၁ ရက်၊ ၂၀၂၂ ခုနှစ်အထိ နွေဦးတော်လှန်ရေးနှင့်ဆက်စပ်၍ သေဒဏ်ချမှတ်ခံထားရပြီး အကျဉ်းထောင်များတွင် ထိန်းသိမ်းခံနေရသူ စုစုပေါင်း (၈၄) ဦးရှိပြီဖြစ်သည်။ မျက်ကွယ်သေဒဏ်ချမှတ်ခြင်းခံထားရသူ (၄၂) ဦး အပါအဝင် (၁၂၁) ဦးမှာ မျက်ကွယ်ပြစ်ဒဏ်ချမှတ်ခြင်းခံ ထားရသည်။ ထိုကြောင့် သေဒဏ်ချမှတ်ခံထားရသူ စုစုပေါင်း (၁၂၆) ဦးရှိပြီဖြစ်သည်။ အာမခံဖြင့် လွတ်မြောက်သူ (၂၂) ဦးရှိပြီး၊ ပြန်လည်လွတ်မြောက်လာသူဦးရေမှာ (၃၁၁၄) ဦး ရှိသည်။ 

ဖော်ပြပါ ကိန်းဂဏန်းအရေအတွက်များသည် AAPP မှ ကောက်ယူရရှိထားသည့် အရေအတွက်ဖြစ်ပြီး မြေပြင်တွင် ဖြစ်ပွားနေသည့်အချက်အလက်နှင့် ကိန်းဂဏန်းအရေအတွက်များမှာ ယခုထက်ပိုမိုများပြားနိုင်ပါသည်။  အချက် အလက်များကို ထပ်မံကောက်ယူရရှိလာပါက ဆက်လက်ထည့်သွင်းဖော်ပြသွားပါမည်။ 

စက်တင်ဘာလ ၁၇ ရက်နေ့တွင် ပဲခူးတိုင်း၊ ကျောက်ကြီးမြို့နယ်၊ တောင်စုကျေးရွာအတွင်းကို နတ်သံကွင်းတံတားရှိ ခမရ  ၃၅၁ မှ လက်နက်ကြီးဖြင့် ရမ်းသန်းပစ်ခတ်ခဲ့ရာ အဆိုပါလက်နက်ကြီးကျည်စသည် ဒေသခံအမျိုးသမီးတစ်ဦးဖြစ်သူ နော်သူးလေဖော ကို ထိမှန်ပြီး သေဆုံးသွားခဲ့ကြောင်း သိရှိရသည်။ တောင်စုကျေးရွာအတွင်းရှိ ဒေသခံများသည် အကြမ်းဖက်စစ်အုပ်စု၏တပ်မှ အတင်းအဓမ္မ ပြောင်းရွှေ့ခိုင်းသည့်အတွက် ကျေးရွာအပြင်ဘက်တွင် တိမ်းရှောင်နေကြရပြီး နော်သူးလေဖောသည် ကျေးရွာ အတွင်းကို  ဆန်ပြန်ယူပြီးနောက် ရွာအပြင်ဘက်ကို ပြန်ထွက်သည့်အချိန်၌ ထိုကဲ့သို့ လက်နက်ကြီးကျည်ထိမှန်၍ သေဆုံးသွား ခဲ့ခြင်းဖြစ်သည်။ 

ကချင်ပြည်နယ်၊ ဖားကန့်မြို့နယ်တွင် အာဏာသိမ်းမှုကို ဆန့်ကျင်ဆန္ဒပြခဲ့သည့် အမျိုးသမီး ခုနစ်ဦးနှင့် ကားမောင်း၍ လိုက်ပို့ခဲ့သူ အမျိုးသားတစ်ဦးကို  ဖားကန့်မြို့နယ်တရားရုံးမှ စက်တင်ဘာလ ၂၀ ရက်နေ့တွင် ထောင်ဒဏ်အသီးသီး ချမှတ်ခဲ့ကြောင်း သိရှိရသည်။ ၎င်းတို့သည် ဇူလိုင်လ ၁၃ ရက်နေ့တွင် ဆန္ဒထုတ်ဖော်ပြီး ကားဖြင့်အပြန် လမ်း၌ စစ်သားများ၏ ဖမ်းဆီးခြင်းကို ခံခဲ့ရပြီးနောက် ရာဇသတ်ကြီးပုဒ်မ ၅၀၅-က ဖြင့် တရားစွဲဆိုခြင်းခံခဲ့ရသည်။ အမျိုးသမီး ခုနှစ်ဦးဖြစ်သည့် ဒေါ်မာမာလင်း၊ ဒေါ်ခင်တိုး၊ ဒေါ်သန်းငွေ၊ ဒေါ်ဌေးဌေးခိုင်၊ မစန္ဒာရွှေသိန်း၊ ဒေါ်မြင့်မြင့်သန်းနှင့် မခင်လဲ့ တို့ကို ထောင်ဒဏ် တစ်နှစ်နှင့် ခြောက်လစီချမှတ်ခဲ့ပြီး အမျိုးသား တစ်ဦးဖြစ်သူ ဦးသိန်းထွန်းကို ရာဇသတ်ကြီးပုဒ်မ ၅၀၅-က အပြင် အခြား ဥပဒေ ပုဒ်မများဖြင့် ထောင်ဒဏ် နှစ်နှစ်နှင့် ခုနှစ်လ ချမှတ်ခဲ့ကြောင်း သိရှိရသည်။ 

အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့  ဆက်သွယ်၍ အသိပေး၊ အကြောင်းကြား နိုင်ပါသည်။ ထို့ပြင် ကျဆုံးအချက်အလက်များကို ဖော်ပြပါ fatality-data@aappb.org အီးမေးလ်သို့လည်းကောင်း၊ အဖမ်းအဆီးအချက်အလက်များကို  detention-data@aappb.org အီးမေးလ်သို့လည်းကောင်း တိုက်ရိုက်ပေးပို့၍ ဆက်သွယ် အကြောင်းကြားနိုင်ပါသည်။

နွေဦးတော်လှန်ရေးကာလ သတင်းအချက်အလက်များကြည့်ရန် – https://coup.aappb.org/ 

AAPP မှ ပြုစုမှတ်တမ်းတင်ထားသည့် စာရင်းများကို Database တွင်ကြည့်ရန် –

ကျဆုံး – bit.ly/3taCmp3 

ဖမ်းဆီးခံရသူ စုစုပေါင်း – bit.ly/3t7IE90 

လက်ရှိထိန်းသိမ်းခံနေရဆဲ – bit.ly/3m3Z8Lm 

လွတ်မြောက် – bit.ly/3MbC3kd 

ထိန်းသိမ်းခံထားရသည့် သေဒဏ်ချမှတ်ခံထားရသူများစာရင်း – https://bit.ly/3BmDPO0 

Database တွင်ရှာဖွေမှုပြုလုပ်ရန် သရုပ်ပြဗီဒီယိုဖိုင် ကြည့်ရန် – – https://youtu.be/OoyTSNG7zv4 

Email :   info@aappb.org

Facebook : https://web.facebook.com/burmapoliticalprisoners/

Twitter : https://twitter.com/aapp_burma

“အရေးတော်ပုံအောင်ရမည်”

နိုင်ငံရေးအကျဉ်းသားများကူညီစောင့်ရှောက်ရေးအသင်း