အေအေပီပီ ကို ၂၀၀၀ ခုနှစ် မတ်လ ၂၃ ရက်နေ့တွင် ထိုင်း-မြန်မာနယ်စပ်ရောက် နိုင်ငံရေးအကျဉ်းသားဟောင်းများ စုပေါင်း၍ စတင်တည်ထောင်ခဲ့သည်။ ထိုနေ့သည် ၁၉၈၈ ခုနှစ် အရေးတော်ပုံကာလ အတွင်း ထင်ရှားသော ကျောင်းသားခေါင်းဆောင်တဦးဖြစ်ပြီး ၁၉ နှစ်ကြာ အကျဉ်းထောင်ထဲတွင် နေထိုင်ခဲ့ရသူ ကိုမင်းကိုနိုင် အဖမ်းခံရသည့်နေ့ဖြစ်သည့်အပြင် မြန်မာနိုင်ငံငြိမ်းချမ်းရေး ဗိသုကာ ဆရာကြီး သခင်ကိုယ်တော်မှိုင်း၏ မွေးနေ့လည်းဖြစ်သည်။ ၂၀၀၀ ခုနှစ်မှစ၍ ယနေ့အချိန်အထိ အေအေပီပီသည် မြန်မာနိုင်ငံ အတွင်း လက်ရှိဖြစ်ပေါ်နေသော နိုင်ငံရေး အပြောင်းအလဲများနှင့် လိုက်လျော ညီထွေဖြစ်အောင် လုပ်ဆောင်လျက်ရှိသည်။ ၂၀၁၂ ခုနှစ်မှစ၍ နိုင်ငံရေးအကျဉ်းသားများစွာကို လွှတ်ပေးခဲ့ပြီး အေအေပီပီဦးဆောင်သူများအား အစိုးရ၏ အမည်မည်းစာရင်းမှ ဖယ်ရှားခဲ့ပြီးဖြစ်သောကြောင့် မြန်မာနိုင်ငံတွင် ရုံးခွဲတခု ဖွင့်လှစ်နိုင်ခဲ့သည်။ ထို့ကြောင့် အေအေပီပီသည် လွတ်မြောက် လာသူများ၏ လိုအပ်ချက်များကို ဖြည့်ဆည်းရန်အတွက် ထိရောက်သော အကူအညီပေးရေး အစီအစဉ်များကို ပိုမိုလုပ်ဆောင်နိုင်ခဲ့သည်။

၂၀၁၃ ခုနှစ် ဇန်နဝါရီလတွင် စတင်ဖွဲ့စည်းခဲ့သည့် လက်ကျန်နိုင်ငံရေးအကျဉ်းသားများ စိစစ်ရေးကော်မတီ (CSRPP) တွင် အေအေပီပီသည် အဓိကအဖွဲ့ဝင်တဦးအဖြစ် ပါဝင်ခဲ့ပြီး နိုင်ငံရေးအကျဉ်းသားများအားလုံးလွတ်မြောက်ရေးအတွက် ကြိုးစားဆောင်ရွက်ခဲ့သော်လည်း ၂၀၁၅ ခုနှစ် ဇန်နဝါရီလတွင် ဖွဲ့စည်းခဲ့သော စစ်အုပ်စု၏ ယုံကြည်ချက်အကျဉ်းသားများရေးရာကော်မတီတွင် အေအေပီပီကို အဖွဲ့ဝင်အဖြစ် ထည့်သွင်းဆောင်ရွက်စေခြင်း မပြုခဲ့ပေ။ သို့ရာတွင် အေအေပီပီသည် ကျန်ရှိနေသော နိုင်ငံရေးအကျဉ်းသားအားလုံး လွတ်မြောက်ရေးအတွက် ဆက်လက်လှုပ်ရှားဆောင်ရွက်ခဲ့ပါသည်။ မြန်မာနိုင်ငံအနှံ့ လူ့အခွင့်အရေးနှင့် အသွင်ကူးပြောင်းရေးဆိုင်ရာ တရားမျှတမှုသင်တန်းများကျင်းပခြင်း၊  အခြေခံပညာအထက်တန်းကျောင်းများနှင့် တက္ကသိုလ်/ကောလိပ်များတွင် လူ့အခွင့်အရေးဆိုင်ရာအသိပညာပေးဆွေးနွေးပွဲများကျင်းပခြင်းတို့ကို ကျယ်ကျယ်ပြန့်ပြန့်လုပ်ဆောင်နိုင်ခဲ့ပါသည်။ လူ့အခွင့်အရေးကော်မရှင်ပြုပြင်ပြောင်းလဲခြင်း၊ မြန်မာနိုင်ငံအကျဉ်းထောင်စနစ်ပြုပြင်ပြောင်းလဲခြင်း၊ ရဲတပ်ဖွဲ့ပြုပြင်ပြောင်းလဲခြင်း၊ တရားစီရင်ရေးစနစ်ပြုပြင်ပြောင်းလဲခြင်းတို့အတွက် သက်ဆိုင်ရာလွှတ်တော်ရေးရာကော်မတီများ၊ အဖွဲ့အစည်းများနှင့် ပူးပေါင်း၍ လုပ်ဆောင်ခဲ့ပါသည်။

၂၀၂၁ ခုနှစ် အကြမ်းဖက်စစ်တပ်မှ မတရားအာဏာသိမ်းပြီးနောက်တွင် လုံခြုံရေးအရ ထိုင်း-မြန်မာနယ်စပ်တွင် ပြန်လည်အခြေစိုက်၍ မြန်မာနိုင်ငံအတွင်း အကြမ်းဖက်စစ်အုပ်စု၏ လူ့အခွင့်အရေးချိုးဖောက်မှုများကို စနစ်တကျမှတ်တမ်းတင်ခြင်း၊ အဆိုပါချိုးဖောက်မှုများကို နိုင်ငံတကာလူ့အခွင့်အရေးအဖွဲ့အစည်းများနှင့် လက်တွဲကာ စစ်အုပ်စုအား အပြစ်ပေးအရေးယူနိုင်ရေးအတွက် ကြိုးပမ်းခြင်း၊ ဖက်ဒရယ်ပြည်ထောင်စုပေါ်ပေါက်ရေးအတွက် မိတ်ဖက်အဖွဲ့အစည်းများနှင့် ပူးပေါင်းဆောင်ရွက်ခြင်းများကို ဆက်လက်လုပ်ဆောင်လျက်ရှိပါသည်။