အေအေပီပီတည်ထောင်သူများ
ကိုတိတ်နိုင်
ကိုတိတ်နိုင်(အတွင်းရေးမှူး)ကို မြန်မာနိုင်ငံ အောက်ပိုင်း တနသာင်္ရီတိုင်း၊ ထားဝယ်မြို့တွင် မွေးဖွားခဲ့ပါသည်။ ၁၉၈ရ ခုနှစ်တွင် ရန်ကုန်တက္ကသိုလ်မှ ပထဝီဘာသာဖြင့် ဝိဇ္ဇာဘွဲ့ကို လက်ခံရရှိခဲ့ပါသည်။ ၁၉၈၈ လူထုအုံကြွမှု၌ မြန်မာလူငယ်များ မျိုးချစ်အသင်းတွင် ကော်မတီ၏ အလုပ်အမှုဆောင်အဖွဲ့ဝင် တစ်ဦးအဖြစ် ပါဝင်ခဲ့ပါသည်။ ၁၉၉ဝ ခုနှစ် မတ်လတွင် နိုင်ငံရေး စာစောင်များ ရေးသားဖြန့်ဝေခြင်းတို့ကြောင့် ဖမ်းဆီးခံခဲ့ရပြီး ထောင်ဒဏ် ၃နှစ် ချမှတ်ခြင်းခံ ခဲ့ရသည်။ နိုင်ငံရေးတက်ကြွလှုပ်ရှားသူများအား အသံတိတ်သွားစေရန် အာဏာပိုင်များမှ မကြာခဏ အသုံးပြုလေ့ရှိသည့် ပုဒ်မ ၅(ည)၊ ၁၉၅ဝ ခုနှစ် အရေးပေါ်အက်ဥပဒေပုဒ်မ၊ ပုဒ်မ ၁၇/၂ဝ ပုံနှိပ်အက်ဥပဒေတို့နှင့် သူသည် တရားစွဲဆိုခံခဲ့ရပါသည်။ အင်းစိန်နှင့် သရက်ထောင်တို့တွင် အကျဉ်းချခံခဲ့ရသည်။ ဘုန်းကြီးများအပါအဝင် သူ့အမှုတွဲပါ နိုင်ငံရေးအကျဉ်းသားများအား မကွေးတိုင်း သရက်ထောင်သို့သွားစဉ် လမ်းတွင် ကြမ်းတမ်းစွာ ရိုက်နှက်ခြင်းခံခဲ့ရသည်။ သူလွတ်လာပြီးသည့်နောက်ပိုင်း၊ ရန်ကုန်မြို့တွင် ဖြစ်ပွါးခဲ့သည့် ဒီဇင်ဘာလ ၁၉၉၆ ကျောင်းသား များ ဆန္ဒထုတ်ဖော်ရေးအတွင်း ပါဝင်ခဲ့ပြန်သည်။ ထိုသို့ ပါဝင်ခဲ့၍ ဖမ်းဆီးခံရခြင်းမှ လွတ်မြောက်ရန် (၈)လကြာ တိမ်းရှောင်နေခဲ့ရပါသည်။ ထို့နောက် ကိုတိတ်နိုင်သည် ၁၉၉ရ ခုနှစ်၊ စက်တင်ဘာလတွင် ထိုင်း-မြန်မာနယ်စပ်သို့ ထွက်ခွါခဲ့သည်။ ယခုအခါတွင် သူသည် ၂၀၀ဝ ခုနှစ်၌ သူ စတင်တည်ထောင်ခဲ့သည့်နိုင်ငံရေးအကျဉ်းသားများ ကူညီစောင့်ရှောက်ရေးအသင်း (မြန်မာနိုင်ငံ) တွင် အတွင်းရေးမှုး အဖြစ် လုပ်ကိုင်နေပါသည်။
ကိုဘိုကြည်
ကိုဘိုကြည် (တွဲဖက်အတွင်းရေးမှုး) သည် ၁၉၈၉ ခုနှစ်တွင် ကျောင်းသားအဖွဲ့နှင့် လူငယ်ဒီမိုကရေစီအဖွဲ့တို့နှင့် အစည်းအဝေးကျင်းပပြီး အိ်မ်သို့အပြန်တွင် ပထမအကြိမ်အဖြစ် ဖမ်းဆီးခံခဲ့ရပါသည်။ ထို့နောက် သူသည် ပုန်းရှောင်ခဲ့ရပြီး အဖမ်းခံရခြင်းမှကင်းလွတ်ရန် သူ၏ ဒီမိုကရေစီလှုပ်ရှားမှုကို မြေအောက်လှုပ်ရှားမှုအဖြစ် ပြောင်းလဲခဲ့ပါသည်။ သူသည် နှစ်ကြိမ်တိတိ အဖမ်းခံခဲ့ရပြီး ဆိုးဝါးလှသော စစ်အစိုးရ၏ ရုပ်ပိုင်းသာမက စိတ်ပိုင်းပါ နှိပ်စက်ညှင်းပန်းခြင်းကို ခံခဲ့ရလေသည်။ ဒုတိယအကြိမ် အဖမ်းခံရအပြီးတွင် ထိုင်း-ဗမာ နယ်စပ်သို့ ထွက်ပြေးတိမ်းရှောင်ခဲ့ပြီး အေအေပီပီအား ကူညီဖွဲ့စည်းခဲ့သည်။ သူသည် မြန်မာနိုင်ငံအတွင်း မြေအောက်ဒီမိုကရေစီ လှုပ်ရှားမှုကြောင့် ရ နှစ်ကျော် ထောင်ကျခဲ့ရသည်။ ထိုသို့ ပင်ပန်းမှုအား လျစ်လျူရှုကာ ကြိုးစားမှု၊ မြန်မာနိုင်ငံ ဒီမိုကရေစီနှင့် လူ့အခွင့်အရေးတို့အပေါ် မြှုပ်နှံမှုတို့ကြောင့် ကျော်ကြားသော အဖွဲ့အစည်းများမှ ဆုပေါင်းများစွာ ပေးအပ်ခြင်းခံခဲ့ရသည်။ သူသည် ၂၀၀၉ ခုနှစ်တွင် လူ့အခွင့်အရေးစောင့်ကြည့်ရေးအဖွဲ့မှ ပေးအပ်သည့် သူမတူသော လှုပ်ရှားမှုများအတွက် – Alison des Forges ဆု နှင့် ၂၀၁၁ ခုနှစ်တွင် ဆွစ်ဇာလန်အခြေစိုက် နာမည်တူအဖွဲ့အစည်းမှ ပေးအပ်သည့် လွတ်မြောက်ရေးနှင့် လူ့အခွင့်အရေးဆု တို့ဖြစ်ပါသည်။ သူသည် သူ၏ဇနီး ကလေးနှစ်ယောက်တို့နှင့်အတူ ထိုင်းဗမာနယ်စပ်တွင်နေထိုင်လျက်ရှိသည်။
ကိုဇော်ထွန်း
ဇော်ထွန်း(ဦးဆောင်အဖွဲ့ဝင်)သည် မြန်မာနိုင်ငံမြို့တော်ဟောင်းဖြစ်သော ရန်ကုန်မြို့တွင် မွေးဖွားခဲ့ပါသည်။ ရန်ကုန်တက္ကသိုလ်တွင် စိတ်ပညာဘာသာရပ်ကို လေ့လာခဲ့သည်။ သူသည် စိတ်ပညာပထမနှစ်တက်ရင်း ၁၉၈၈ ခုနှစ် မတ်လနှင့် ဇွန်လ ကျောင်းသားဆန္ဒပြပွဲများတွင် ဗမာနိုင်ငံလုံးဆိုင်ရာ ကျောင်းသားများ သမဂ္ဂ (ဗ.က.သ) နှင့်အတူ ပါဝင်ဆင်နွှဲခဲ့သည်။ ၁၉၈၉ ခုနှစ် ဒီဇင်ဘာတွင် ဗ.က.သ (မြန်မာနိုင်ငံအောက်ပိုင်း)နှင့် ဆက်သွယ်ခဲ့ပြီး အဖွဲ့အတွင်း လှုပ်ရှားမှုများကို လျှို့ဝှက်စွာ စီစဉ်လုပ်ဆောင်ခဲ့သည်။ ရန်ပုံငွေကောက်ခံရေးလုပ်ငန်းများကို စီစဉ်ပြုလုပ်ခဲ့သဖြင့် ၁၉၉၁ ခုနှစ် ဇန်နဝါရီ ၂၁ ရက်နေ့တွင် စစ်အစိုးရမှ ဖမ်းဆီးခြင်းကို ခံခဲ့ရလေသည်။ ၁၉၉၁ ခုနှစ်၊ မေလတွင် အလုပ်ကြမ်းနှင့်ထောင်ဒဏ် (၆) နှစ်ကျခံခဲ့ရပြီး၊ အင်းစိန်ထောင်မှ သရက်ထောင်သို့ ၁၉၉၁ ခုနှစ်၊ နိုဝင်ဘာလတွင် ပြောင်းရွှေ့ခံခဲ့ရသည်။ ၁၉၉၅ ခုနှစ်၊ ဩဂုတ်လတွင် သရက်ထောင်မှ လွတ်လာခဲ့ပြီးနောက် ဗ.က.သ ဗဟိုစည်းရုံးရေးကော်မတီ အဖွဲ့ဝင်အနေနှင့် ကျောင်းသားလှုပ်ရှားမှုများကို ဆက်လက်ပူးပေါင်း ဆောင်ရွက်နေခဲ့သည်။ ၁၉၉၆ ခုနှစ်၊ ဒီဇင်ဘာလတွင် ဇော်ထွန်းသည် ကျောင်းသားထုအခွင့်အရေး ကာကွယ်ရေး ကျောင်းသားလှုပ်ရှားမှု၏ အဓိကလုပ်ငန်းများတွင် ပါဝင်ထမ်းဆောင်ခဲ့ပါသည်။ ထိုလုပ်ရပ်များကြောင့် စစ်အစိုးရမှ စောင့်ကြည့်ခြင်းခံခဲ့ရပြီးနောက်၊ ၁၉၉ရ ခုနှစ် ဇန်နဝါရီလတွင် မြန်မာပြည်မှ ထိုင်း-ဗမာနယ်စပ်၊ မဲဆောက်မြိုသို့ ထွက်ပြေးတိမ်းရှောင်ခဲ့ရသည်။ သူသည် မဲဆောက်မြို့အခြေစိုက်၊ လူ့ဘောင်သစ် ဒီမိုကရက်တစ်ပါတီ၏ အဖွဲ့ဝင်တစ်ယောက်အနေဖြင့် အလုပ်လုပ်ရင်း မြန်မာပြည်တွင်း၏ နိုင်ငံရေးလှုပ်ရှားမှုများကိုပါ စည်းရုံးလုပ်ဆောင်ခဲ့ပါသည်။ ၁၉၉၈ခုနှစ်၊ ဩဂုတ်လတွင် ဗ.က.သ (နိုင်ငံခြားရေးရာကော်မတီ) အား စတင်တည်ထောင်ခဲ့ပြီး ကော်မတီ၏ ဦးဆောင်သူတစ်ယောက်အဖြစ် မဲဆောက်ဧရိယာတွင် အလုပ်လုပ်ခဲ့ပါသည်။ ၁၉၉၉ ခုနှစ်၊ ဒီဇင်ဘာလ ၁ ရက်နေ့တွင် သူသည် မဲဆောက်တွင် တည်ထောင်ခဲ့သော အေအေပီပီ-ဘီ၊ စည်းရုံးလှုံ့ဆော်ရေးကော်မတီ၏ အဖွဲ့ဝင်တစ်ယောက် ဖြစ်လာခဲ့သည်။ ၂၀၀ဝ ခုနှစ်၊ မတ်လ ၂၃ ရက်နေ့တွင် ဦးဆောင်ကော်မတီ၏ အဖွဲ့ဝင်တစ်ဦးဖြစ်လာကာ၊ အတွင်းရေးမှုးအဖွဲ့မှ အဖွဲ့ဝင် တစ်ယောက်အဖြစ် ရွေးချယ်ခြင်းခံခဲ့ရသည်။