လက်ကျန်နိုင်ငံရေးအကျဉ်းသားစာရင်းနှင့်အေအေပီပီမှလစဉ်အစီရင်ခံစာထုတ်ပြန်ချက်

တစ်လအတွင်းသုံးသပ်ချက်

ဇူလိုင်လတွင်းတွင် တိုင်းရင်းသားဒေသများမှ တိုင်းရင်းသား ၁ဝ ဦး၊ ဆက်သွယ်ရေးဥပဒေ ပုဒ်မ ၆၆(ဃ)ဖြင့် လေးဦး၊ ရာဇသတ်ကြီးပုဒ်မ ၁၈၈ ဖြင့် ၁ရ ဦး အပါအဝင် စုစုပေါင်း ၃၁ ဦး ဖမ်းဆီးခံခဲ့ရသည်။ ဇူလိုင်လတွင်း ၄၂ ဦး တရားစွဲဆိုခံခဲ့ရသည်၊ ထို ၄၂ ဦးထဲမှ လယ်သမား ၁၃ ဦးသည် ရာဇသတ်ကြီးပုဒ်မ ၂၉၄၊ ၃၄၁၊ ၄၄၇၊ ၅၀၆၊ လယ်သမား ၁၅ ဦးသည် ငြိမ်းချမ်းစွာ စုဝေးခွင့်နှင့် စီတန်းလှည့်လည်ခွင့်ဥပဒေ(ငြိမ်း၊စု၊စီ) ပုဒ်မ ၁၉၊ ၂၀၊ တက်ကြွလှုပ်ရှားသူ သုံးဦးသည် ငြိမ်း၊စု၊စီဥပဒေ၊ ခြောက်ဦးသည် ဆက်သွယ်ရေးဥပဒေ ပုဒ်မ ၆၆(ဃ)၊ နှစ်ဦးသည် ပို့ကုန်၊သွင်းကုန်ဥပဒေ ပုဒ်မ ၈၊ တစ်ဦးသည် ရာဇသတ်ကြီးပုဒ်မ ၅၀၀၊ နှစ်ဦးသည် မီဒီယာဥပဒေ ပုဒ်မ ၂၅(ခ)တို့ဖြင့် တရားစွဲဆိုခံခဲ့ရသည်။ ဇူလိုင်လတွင် ငြိမ်း၊စု၊စီဥပဒေ ပုဒ်မ ၁၉ ဖြင့် ကချင်အမျိုးသား နှစ်ဦး၊ ရာဇသတ်ကြီး ပုဒ်မ ၁၈၈ ဖြင့် ၁ရ ဦးအပါအဝင် ၁၉ ဦး ပြစ်ဒဏ်ချမှတ်ခံခဲ့ရသည်။ ဇူလိုင်လတွင် ၁ဝ ဦး ပြန်လည်လွတ်မြောက်လာခဲ့သည်။ နိုင်ငံရေးအကျဉ်းသားလေးဦးဖြစ်သည့် ကိုစိုင်းတင်မင်းထွန်း၊ ကိုဇော်သက်အောင် ခေါ် ကိုကတုံး၊ ကိုလဖိုင်ဂမ်နှင့် ဦးဒွမ်ဒေါ့နောင်လတ်တို့မှာမှု ကျန်းမာရေး ဆိုးရွားလျက်ရှိကြောင်းသိရှိရသည်။

မြန်မာနိုင်ငံတွင်း၌ ခေတ်နောက်ကျလျက်ရှိသော၊ ဖိနှိပ်ထားသော ဥပဒေများကို အသုံးပြု၍ မီဒီယာလွတ်လပ်ခွင့်နှင့် သတင်းသမား များကို ဖိနှိပ်ထားမှုများ ဆက်လက်တိုးလာခြင်းကို ဇူလိုင်လတွင်း သတင်းထောက်များ ထပ်မံ၍ ဖမ်းဆီး၊ထိန်းသိမ်း၊ တရားစွဲဆို ခံနေရခြင်းကို ကြည့်ခြင်းဖြင့် သိမြင်နိုင်သည်။ ရှမ်းပြည်နယ် မြောက်ပိုင်း၊ တအာင်းလွတ်မြောက်ရေးတပ်မတော် (TNLA) နယ်မြေအတွင်း  မူးယစ်ဆေးဝါးများ ဖျက်ဆီးမှု အခမ်းအနားသို့ သွားရောက်ပြီး အပြန်တွင် တပ်မတော်မှ ဖမ်းဆီးခြင်းကို ခံခဲ့ရသော သတင်းထောက်သုံးဦးဖြစ်သည့် ဦးအေးနိုင်၊ ဦးပြည့်ဘုန်းနိုင်၊ ဦးသိန်းဇော်(ခ)လဝီဝမ်၊ အရပ်သားသုံးဦးဖြစ်သည့် မိုင်းဆန်းညွန့်၊ မိုင်းအောင်ခမ်းနှင့် မိုင်းထွန်းအေးတို့ လွတ်မြောက်ရေးအတွက် ပြည်တွင်း၊ ပြည်ပမှ တောင်းဆိုလျက်ရှိသော်လည်း ၎င်းတို့သည် ဆက်လက် ထိန်းသိမ်းခံထားရကာ တရားရင်ဆိုင်နေရသည်။ တပ်မတော်မှ ၎င်းတို့ကို မတရားအသင်းအဖြစ် သတ်မှတ်ခြင်းခံထားရသော တအာင်း လွတ်မြောက်ရေးတပ်မတော် (TNLA)နှင့် ဆက်နွယ်ခြင်းအတွက် မတရားအသင်းအက် ဥပဒေပုဒ်မ ၁၇(၁)ဖြင့် ဖမ်းဆီး၊ထိန်းသိမ်းခဲ့ပြီး တရားစွဲဆိုခဲ့သည်။ ဇူလိုင်လတွင်းတွင် ၎င်းတို့ခြောက်ဦးသည် သီပေါမြို့နယ်တရား ရုံး၌် သုံးကြိမ်တိုင် ရုံးချိန်း တက်ရောက်ခဲ့ပြီး ရုံးချိန်းသုံးချိန်းထဲမှ ရုံးချိန်းနှစ်ချိန်းကို တရားသူကြီးမှ သတ်မှတ်ထားသည့် ရက်မတိုင်မီ  ပြောင်းရွှေ့၊စစ်ဆေးခဲ့သည်။ ဇူလိုင်လ ၂၁ ရက်နေ့တွင် ၎င်းတို့သည် ဒုတိယအကြိမ် တရားရင်ဆိုင်ရမည်ဖြစ်သော်လည်း ၎င်းတို့၏ ဥပဒေအကြံပေး၏ တင်ပြချက်မပါပဲ ရုံးချိန်းကို သုံးရက်စော၍ ဇူလိုင်လ ၁၈ ရက်နေ့သို့ ပြောင်းရွှေ့စစ်ဆေးခဲ့သည်။

၎င်းတို့ ထိန်းသိမ်းခံထားရခြင်းနှင့် တရားရင်ဆိုင်နေရခြင်းသည် သတင်းသမားများကို ဆက်လက် ဖိနှိပ်လျက်ရှိခြင်း၊ ခေတ်နောက် ကျနေသော၊ ဖိနှိပ်ထားသော ဥပဒေများကို ဆက်လက် အသုံးပြုလျက်ရှိခြင်းကို သတိပြုမိစေသည်သာမက  တရားရေးစနစ်၏ ပွင့်လင်းမြင်သာမှုမရှိသည်ကိုပါ သတိပြုမိစေသည်။ ၎င်းတို့ဖမ်းဆီးခံခဲ့ရသည့် ဇွန်လ ၂၆ ရက်နေ့မှ ယနေ့ အချိန်အထိ ၎င်းတို့ကို ပြုမှုဆက်ဆံမှုများသည် အခြေခံလူ့အခွင့်အရေးကို ချိုးဖောက်လျက်ရှိသည်ကို ပြသလျက်ရှိပြီး ပြည်တွင်းနှင့် နိုင်ငံတကာ ဥပဒေဆိုင်ရာ လုပ်ထုံး၊လုပ်နည်းများကိုလည်း ချိုးဖောက်လျက်ရှိသည်ကို ပြသလျက်ရှိသည်။ ၎င်းတို့အား တပ်မတော်မှ မည်သူနှင့်မျှ ဆက်သွယ်ခွင့်မပြုပဲ ၄၈ နာရီကြာ လျှို့ဝှက်စွာ ထိန်းသိမ်းထားခြင်း၊ ဖမ်းဆီးခံရသည့် ၂၄ နာရီအတွင်း တရားရုံး၌ ရမန် ရယူနိုင်ခြင်းမရှိခြင်းတို့သည် မြန်မာနိုင်ငံ၏ ပြစ်မှုဆိုင်ရာ ကျင့်ထုံးဥပဒေ ပုဒ်မ ၆၀၊ ၆၁ တို့အား ချိုးဖောက်ပြီး အပြည်ပြည်ဆိုင်ရာ လူအခွင့်အရေးကြေညာစာတမ်း (UDHR) တွင် ဖော်ပြ ထားသော မည်သူမျှ ဥပဒေအရ မဟုတ်သော ဖမ်းဆီးခြင်းကိုဖြစ်စေ၊ ချုပ်နှောင်ခြင်းကိုဖြစ်စေ မခံစေရ၊ လူတိုင်းသည် လွတ်လပ်၍ ဘက်မလိုက်သော တရားရုံးတော်၏ လူအများရှေ့မှောက်တွင် မျှတစွာ ကြားနာစစ်ဆေးခြင်းကို တူညီစွာ ခံစားပိုင်ခွင့်ရှိသည်တို့ကို ချိုးဖောက်လျက်ရှိသည်။ အစိုးရသည် လူ့အခွင့်အရေး ချိုးဖောက်မှုများကို  သိသာထင်ရှားစွာ တိုက်ဖျက်မည်ဟု ကတိပြုခဲ့သော်လည်း နိုင်ငံတကာ အရပ်ဘက်အဖွဲ့အစည်းများ၊ လူ့အခွင့်အရေးအဖွဲ့အစည်းများနှင့် လူအများ၏ အာရုံစူးစိုက်ခြင်းကို ခံနေရသော ထိုအမှုမှ သတင်းသမားများနှင့် လွတ်လပ်စွာ ထုတ်ဖော်ပြောဆိုခွင့်အား စနစ်ကျစွာဖြင့်  ဖိနှိပ်လျက်ရှိသည်ကို ပြသလျက်ရှိသည်။ မြန်မာနိုင်ငံတွင်း နိုင်ငံရေးအခြေအနေများ ပြောင်းလဲမှုရှိနေသည်ဟု ထင်ရသော်လည်း၊ အစိုးရမှ ဒီမိုကရေစီအရေး ဆောင်ရွက်မည်ဟု ကတိပြုခဲ့သော်လည်း ပြုပြင် ပြောင်းလဲမှုများကို ဆောင်ရွက်နိုင်ခြင်းမရှိသည့်ပြင် စစ်အစိုးဟောင်းများလက်ထက်တွင် ကန့်သတ်ထားခဲ့သော ဆင်ဆာ စိစစ်ခြင်း နှင့် လွတ်လပ်စွာ ထုတ်ဖော်ပြောဆိုခွင့်တို့ကို လက်ရှိအစိုးရလက်ထက်တွင်လည်း ဆက်လက် ကန့်သတ်ထားဆဲဖြစ်သည်။

ဇူလိုင်လ ၁၄ ရက်နေ့တွင် AAPP အပါအဝင် ပြည်တွင်းနှင့် နိုင်ငံတကာ အဖွဲ့အစည်း ၆၈ ဖွဲ့တို့မှ သတင်းထောက်သုံးဦးနှင့် အရပ်သား သုံးဦးတို့အား စွဲဆိုထားသော စွဲချက်များကို ရုပ်သိမ်းပေးရန် ပူးတွဲကြေညာချက်တစ်စောင်ထုတ်ပြန်၍ တောင်းဆိုခဲ့ သည့်ပြင် ဇူလိုင်လ ၂ရ ရက်နေ့တွင်လည်း နိုင်ငံတကာ လွတ်ငြိမ်းချမ်းသာခွင့်အဖွဲ့မှ ထပ်မံ၍ ကြေညာချက်တစ်စောင်ထုတ်ပြန်၍ တောင်းဆိုခဲ့သည်။ ဥရောပသမဂ္ဂ (EU)မှလည်း ကြေညာချက်တစ်စောင်ထုတ်ပြန်ခဲ့ပြီး လွတ်လပ်၍ လုပ်ကိုင်နိုင်စွမ်းရှိသော ဝန်းကျင်တွင် လုပ်ကိုင်နိုင်ရန် သတင်းသမားများအတွက် လိုအပ်သော ဥပဒေ အကာအကွယ်များ ပေးအပ်ပါရန် အစိုးရထံသို့ တောင်းဆိုခဲ့သည်။

ဆက်သွယ်မေးမြန်းရန်
နိုင်ငံရေးအကျဉ်းသားများကူညီစောင့်ရှောက်ရေးအသင်း
တိတ်နိုင် အတွင်းရေးမှူး            +၆၆(၀) ၈၁၂ ၈၇၈ ၇၅၁
ဘိုကြည် တွဲဘက်အတွင်းရေးမှူး  +၆၆(၀) ၈၁၉ ၆၂၈ ၇၁၃

ဦးအောင်မျိုးကျော် ရန်ကုန်ရုံးတာဝန်ခံ +၉၅(၀) ၉၄၂ ၈၁၁ ၇၃၄၈

လစဉ်အစီရင်ခံစာ တလအတွင်း သုံးသပ်ချက်ဒေါင်းလော့ရယူရန် Burmese MiR (July) (Autosaved)

လစဉ်အစီရင်ခံစာအပြည့်အစုံဒေါင်းလော့ရယူရန် Burmese Chronology (July) 

အေအေပီပီလစဉ်သတင်းလွှာ Burmese Newsletter (July)

လက်ကျန်နိုင်ငံရေးအကျဉ်းသားစာရင်း39 remainging PP list burmese version Updated on July 31, 17

အမှုရင်ဆိုင်ဆဲစာရင်းဒေါင်းလော့ရယူရန် Jul 186 facing trial list updated on JuL 31, 17 (Updated)Burmese

၆၆ (ဃ) အမှုနှင့် မှတ်တမ်းပြုစုထားသည့်စာရင်း 66 (D) total list(new) Updated