အေအပီပီလစဉ်အစီရင်ခံစာထုတ်ပြန်ချက်နှင့်နိုင်ငံရေးအကျဉ်းသားစာရင်းထုတ်ပြန်ချက်

တစ်လအတွင်းသုံးသပ်ချက်
မေလတွင်းတွင် လယ်သမား ၂ဝ ဦး၊ လယ်သမားအရေးလှုပ်ရှားသူ တစ်ဦး၊ အလုပ်သမားအရေးလှုပ်ရှားသူ တစ်ဦး၊ ဆက်သွယ် ရေးဥပဒေ ပုဒ်မ ၆၆(ဃ) ဖြင့် နှစ်ဦးအပါအဝင် စုစုပေါင်း ၂၄ ဦး ဖမ်းဆီးခံခဲ့ရသည်။ မေလတွင်း ၂၁ ဦး ပြစ် ဒဏ်ချမှတ်ခံခဲ့ရသည်။ ထို ၂၁ ဦးသည် ငြိမ်းချမ်းစွာ စုဝေးခွင့်နှင့် စီတန်းလှည့်လည်ခွင့် (ငြိမ်း၊စု၊စီ) ဥပဒေ၊ ပုဒ်မ ၁၉ ဖြင့် ကျောင်းသား လေးဦး၊ ပုဒ်မ ၆၆(ဃ) ဖြင့် နှစ်ဦး၊ လယ်သမား ၁၄ ဦး၊ အလုပ်သမားအရေးလှုပ်ရှားသူ တစ်ဦးတို့ဖြစ်ကြသည်။ မေလတွင်း သမ္မတ၏ လွတ်ငြိမ်း ချမ်းသာခွင့်ဖြင့် တိုင်းရင်းသားများ၊ လယ်သမားများ၊ တက်ကြွလှုပ်ရှားသူများ အပါအဝင် ၈၉ ဦး လွတ်မြောက်လာခဲ့သည်။ မေလ တွင်း မန္တလေး ကျောင်းသားတစ်ဦး၊ လယ်သမား ၁ဝ ဦး၊ အရပ်သား နှစ်ဦးအပါအဝင် ၁၃ ဦး တရားစွဲဆိုခံခဲ့ရသည်။ နိုင်ငံရေးအကျဉ်းသားသုံးဦးဖြစ်သည့် ကိုစိုင်းတင်မင်းထွန်း နှင့် ကိုဇော်သက်အောင် ခေါ် ကိုကတုံး နှင့် ကိုလဖိုင်ဂမ်တို့မှာမှု ကျန်းမာရေး ဆိုးရွားလျက်ရှိကြောင်းသိရှိရသည်။
တိုင်းရင်းသားဒေသများတွင် နေထိုင်ကြသူများသည် တိုင်းရင်းသား လက်နက်ကိုင် အဖွဲ့များနှင့် ဆက်နွယ်သည်ဟူသော သံသယ ဖြင့် ဆက်လက် ဖမ်းဆီး၊ ထိန်းသိမ်းခံနေရဆဲဖြစ်သည်။ ၂၀၁၆ ခုနှစ်၊ ဒီဇင်ဘာလတွင် ကချင်ပြည်နယ်၊ မုုံးကိုးမြို့နယ်၌ မတရား အသင်း အက်ဥပဒေ ၁၇(၁)၊ ၁၇(၂) ဖြင့် ဖမ်းဆီးခံခဲ့ရသော ကချင်သင်းအုပ်ဆရာနှစ်ဦးဖြစ်သူ ဦးဒွယ်ဒေါ့နောင်လတ်နှင့် ဦးဂျော်ဂမ်ဆိုင်းတို့အား မူဆယ်မြို့နယ်ရဲစခန်းမှ လားရှိုးအကျဉ်းထောင်သို့ ပြောင်းရွှေ့ခဲ့သည်။ မေလ ၉ ရက်နေ့တွင် ၎င်းတို့အား လားရှိုးမြို့ နယ်တရားရုံး၌ ပြောင်းရွှေ့၍ ရုံးထုတ်ခဲ့သည်။ သို့သော်လည်း တရားလိုသက်သေများ လာရောက်ခြင်းမရှိသောကြောင့် ရုံးချိန်း အား မေလ ၁ရ ရက်နေ့သို့ ပြောင်းရွှေ့ခဲ့သည်။ ရခိုင်လူငယ် တက်ကြွလှုပ်ရှားသူတစ်ဦးဖြစ်သူ အန်းသားကြီး ခေါ် ကိုသန်းရွှေသည် ဧပြီ ၁ဝ ရက်နေ့တွင် ကျရောက်သော ရက္ခိုင့်တပ်မတော် (AA) တည်ထောင်သည့် ရှစ်နှစ်ပြည့်နေ့၌ ဟောပြောပွဲတစ်ရပ် ကျင်းပ ပြုလုပ်ခဲ့ပြီး “လွတ်လပ်ရေးမှအပ အခြားမရှိ” ခေါင်းစဉ်ဖြင့် ဟောပြောခဲ့သောကြောင့် ဝရမ်းထုတ်ခံထား ရကြောင်း မြောက်ဦး မြို့နယ် ရဲတပ်ဖွဲ့မှ ပြောကြားခဲ့သည်။ မြောက်ဦး အခြေစိုက် ခမရ – ၅၄ဝ မှ တရားလိုပြုလုပ်ပြီး သူ့အား မတရား အသင်းအက်ဥပဒေ ပုဒ်မ ၁၇(၁)(၂) ဖြင့် မြောက်ဦးမြို့မရဲစခန်းတွင် အမှုဖွင့်ခဲ့သည်။ ထိုစွဲချက်များသည် မေလကုန်တွင် ကျင်းပခဲ့သော ၂၁ ရာစု ပင်လုံညီလာခံကို ဆန့်ကျင်လျက်ရှိပြီး ခိုင်လုံသော အကြောင်းပြချက်မရှိပဲ ဖမ်းဆီး၊ ထိန်းသိမ်းထားခြင်း သည် တရားမဝင်ပါဟူသော နိုင်ငံတကာ လူ့အခွင့်အရေးဥပဒေကို ချိုးဖောက်လျက်ရှိသည်။ ထို့ကြောင့် AAPP မှ အစိုးရအား နိုင်ငံသားများ၏ အခြေခံ လူ့အခွင့်အရေးဖြစ်သော လူတိုင်း ငြိမ်းချမ်းစွာ စုဝေးပိုင်ခွင့်နှင့် အသင်းအဖွဲ့များ ထူထောင်ဖွဲ့စည်းပိုင်ခွင့် ရှိသည်ဟူသည့် နိုင်ငံတကာ လူ့အခွင့်အရေး ကြေညာစာတမ်း (UDHR) ပုဒ်မ ၂ဝ ကို လေးစားလိုက်နာရန်နှင့် တိုင်းရင်းသား လက်နက်ကိုင်အဖွဲ့များနှင့် စတင် အကောင်အထည်ဖော်ဆောင်ရွက်လျက်ရှိသော အမျိုးသား ပြန်လည်သင့်မြတ်ရေးရရှိအောင် ဆက်လက်ဆောင်ရွက်ရန် တိုက်တွန်းပါသည်။ ပဋိပက္ခများကြောင့် တိုင်းရင်းသား ဒေသများတွင် နေထိုင်သူများသည် တပ်မတော်အပါအဝင် တိုင်းရင်းသား လက်နက်ကိုင်အဖွဲ့များနှင့် ဆက်နွယ်နေရသည်။ ထို့ကြောင့် တိုင်းရင်းသား လက်နက်ကိုင် တပ်ဖွဲ့များနှင့် ဆက်နွယ်သူများ ဖမ်းဆီးခံရခြင်းမရှိစေရန် AAPP မှ အစိုးရအား မတရားအသင်းအက်ဥပဒေကို ပြင်ဆင်၊ ဖြည့်စွက်ပါရန် အကြံပြုပါသည်။
မေလတွင်းတွင် လယ်သမားများသည် သိမ်းဆည်းခံလယ်ယာမြေအငြင်းပွားမှုများနှင့်ပတ်သက်ပြီး ဆက်လက်၍ မတရားဖမ်းဆီး၊ ပြစ်ဒဏ်ချမှတ်ခံနေရသည်။ မေလ ၁၁ ရက်နေ့တွင် ရှမ်းပြည်နယ်မြောက်ပိုင်း၊ နောင်ချိုမြို့နယ်တရားရုံးမှ နောင်ချိုမြို ့နယ် ဘန့်ဘွေးကျေးရွာအုပ်စု ကုန်းမုံကျေးရွာအတွင်း မြေယာအငြင်းပွားမှုပြဿနာကြောင့် အမှုရင်ဆိုင်နေရသော တောင်သူ ၁၂ ဦးအနက်မှ ရှစ်ဦးကို ပိုင်နက်ကျူးလွန်မှု၊ ရာဇသတ်ကြီး ပုဒ်မ ၄၄ရ ဖြင့် ထောင်ဒဏ်တစ်လ၊ အကျိုးဖျက်စီးမှု၊ ရာဇသတ်ကြီး ပုဒ်မ ၄၂ရ ဖြင့် ထောင်ဒဏ်သုံးလ တပေါင်းတည်း ကျခံစေရန် အမိန့်ချမှတ်ခဲ့သည်။ ၂၀၁၆ ခုနှစ်၊ ဩဂုတ်လတွင် လုပ်ငန်းရှင်တစ်ဦး ဖြစ်သော ဦးစိုးသိန်းမှ ၎င်းပိုင်ခြံကွက်အတွင်းမှ ခြံစည်းရိုးတိုင်များကို ကုန်းမုံကျေးရွာမှ တောင်သူ ၁၂ ဦးမှ ဖျက်စီးသည့်အတွက် နောင်ချိုမြို့နယ်တရားရုံးတွင် တရားစွဲဆိုခဲ့သည်။ ၁၉၉၂ ခုနှစ်၊ စစ်အစိုးရလက်ထက်တွင် ကုံးမုံကျေးရွာမှ တောင်သူများ မူလဦးချလုပ်ကိုင်ခဲ့သော လယ်ယာမြေ ၂၄၂ ဧကကို ကော်ဖီစီမံကိန်းအတွက် သိမ်းဆည်းခဲ့သည်။ ထိုနောက်ပိုင်းတွင် လုပ်ငန်းရှင် များကို လုပ်ကိုင်ခွင့်ချထားပေးခဲ့ပြီး လုပ်ငန်းရှင်များမှ သတ်မှတ်ဧက အတိုင်း စိုက်ပျိုးခြင်းမရှိသည့်အပြင် မြေကွက်များကို ကွက်စိတ်ရိုက်ခဲ့သည့်အတွက် တောင်သူများက ဝင်ရောက် လုပ်ကိုင်ရာမှ တရားစွဲဆိုခံရခြင်းဖြစ်သည်။ မေလ ၁၃ ရက်နေ့တွင် ထားဝယ်မြို့မရဲစခန်းမှ မိမိပိုင်လယ်ယာမြေများပေါ်တွင် ကုမ္ပဏီပိုင်မြေဟုဆိုကာ မြေဖို့ရန် ကြိုးစားခဲ့ခြင်းကို တားဆီးခဲ့သည့် တနသာင်္ရီတိုင်းဒေသကြီး ထားဝယ်မြို့မှ လယ်သမား ခုနှစ်ဦးကို ရာဇသတ်ကြီးပုဒ်မများဖြစ်သော ပိုင်နက်ကျူးလွန်မှု ပုဒ်မ ၄၄၇၊ အကျိုးဖျက်ဆီးမှု ပုဒ်မ ၄၂ရ တို့ဖြင့် ဖမ်းဆီးခဲ့သည်။ ထိုနေ့တွင် ထိုလယ်သမား ခုနှစ်ဦးသည် ကိုယ်ပိုင်ခံဝန်ဖြင့် လွတ် မြောက်လာခဲ့သည်။ ထိုမြေနေရာသည် ထားဝယ်မြို့ပြစီမံကိန်းဧရိယာ မြေဧက ၃၅ဝ အတွင်းတွင် ပါဝင်နေသော မြေဖြစ်ပြီး ထားဝယ်အများပို်င်ကုမ္ပဏီ (DDPC)မှ ပုဂ္ဂလိကကျောင်း ဆောက်လုပ်ရန်အတွက် မြေဖို့ခြင်းဖြစ်သည်။ ဖမ်းဆီးခံရသူများထဲတွင် ပါဝင်သူ မရီထွေးမှ ၎င်းတို့၏ လယ်ယာမြေများကို မည်သည့် အချိန်က သိမ်းဆည်းခဲ့သည်ကို မသိရှိခဲ့ပါ၊ လျော်ကြေး တစုံတရာလည်း မပေးခဲ့ပါဟု ပြောကြားခဲ့သည်။ လယ်ယာမြေ သိမ်းဆည်းခြင်းပြဿနာသည် မဖြေရှင်းနိုင်သော ကိစ္စရပ်တစ်ခု အဖြစ် ဆက်လက်ရှိနေဆဲဖြစ်သောကြောင့် လယ်သမားများသည် ကိုကိစ္စကို ကိုင်တွယ်ဆောင်ရွက်နိုင်မည့် အာဏာပိုင်များနှင့် ဆက်သွယ်ခွင့်ရရှိရန် ကြိုးစားလျက်ရှိသည်။ အငြင်းပွားနေသော မြေပေါ်တွင် မြို့နယ် အာဏာပို်င်များမှ အဆောက်အဦးများ ဆောက်လုပ်ရန် စီစဉ်နေမှုအပေါ် ဟန့်တားပေးရန် ကယားပြည်နယ်၊ လွိုင်ကော်မြို့နယ်ရှိ လယ်သမားများမှ မေလ ၉ ရက်နေ့တွင် နိုင်ငံတော် အတိုင်ပင်ခံရုံးထံ စာပေးပို့ခဲ့သည်။ ၂၀၁၃ ခုနှစ်ကတည်းက ထိုမြေနေရာများပေါ်၌ မြို့ပြ စီမံကိန်းကို ရေးဆွဲထားခဲ့ပြီး အစိုးရဌာနဆိုင်ရာရုံး ၃၄ ရုံး ရုံးတည်ဆောက်ရန် စီစဉ်ထားခဲ့သည်။ လယ်သမားများမှ ထိုစီမံကိန်းနှင့် ပတ်သက်ပြီး မည်သူမှ ၎င်းတို့အား အကြောင်းကြားခဲ့ခြင်း မရှိခဲ့ပဲ ထိုလယ်ယာမြေများပေါ်တွင် ဆက်လက် ထွန်ယက်စိုက်ပျိုးလုပ်ကိုင်ခဲ့သည်။ ကန့် ကွက်မှုများရှိသော်လည်း ယင်းမြေနေရာများသည် မြို့ပြစီမံကိန်းအတွက် ရေးဆွဲလျာထားသည့်အတွက် မြေနေရာတိုင်းတာခြင်း၊ အဆောက်အဦးများဆောက်လုပ်ခြင်းများ ဆက်လက်လုပ်ဆောင်ရန်သာရှိသည်ဟု လွိုင်ကော်မြို့နယ်အုပ်ချုပ်ရေးမှူး ဦးကျော်မိုးမှ ပြောကြားခဲ့သည်။ ရှမ်းပြည်နယ်၊ ညောင်ရွှေမြို့နယ်မှ လယ်သမားများသည် သိမ်းဆည်းထားသော လယ်ယာမြေများကို တရားဝင် ပြန်လည်ရရှိရေးအတွက် အာဏာပိုင်များကို အမှုဖွင့် တိုင်ကြားခဲ့သည်။ ၂၀၁၂ ခုနှစ်တွင် သိမ်းယူခဲ့သော လယ်ယာမြေဧက ၆၀ဝ ခန့်နှင့် ပတ်သက်ပြီး ယခုကဲ့သို့ အမှု ဖြစ်ပွား နေခြင်းဖြစ်သည်။ ရှမ်းပြည်နယ်အစိုးရဟောင်းမှ ဟိုတယ်ဇုံဖွံ့ဖြိုးရေးအတွက် လယ်သမားများထံမှ လယ်ယာမြေများကို ၂၀၁၂ ခုနှစ်တွင် ဝယ်ယူခဲ့သော်လည်း ယခုလက်ရှိတွင် စီးပွားရေးလုပ်ငန်းများထံသို့ ရောင်းချလျက်ရှိသည်။ ရှမ်းပြည်နယ်အစိုးရဟောင်းမှ လယ်ယာမြေများကို ဝယ်ယူချိန်က လယ်သမားများမှ သဘောမတူခဲ့ပါ၊ လုံလောက်သော လျော်ကြေးငွေလည်း မရရှိခဲ့ပါဟု ပြောကြားခဲ့သည်။ လယ်သမားများမှ သိမ်းဆည်းခံထားရသော လယ်ယာမြေများကို ပြန်လည်ရရှိရန် ကြိုးပမ်းဆောင်ရွက်လျက်ရှိသော်လည်း တာဝန်ရှိသူများမှ လယ်သမားများ၏ တောင်းဆိုချက်များကို ဖြေရှင်းပေးနိုင်ရှင်းမရှိခဲ့ပါ။ ကာကွယ်ရေးဝန်ကြီးဌာနအနေဖြင့် ၁၉၉၄ ခုနှစ်တွင် ရခိုင်ပြည်နယ်၊ စစ်တွေမြို့နယ်တွင် သိမ်းယူထားသော လယ်ယာမြေများအနက်မှ ဧက ၁၀ဝ ထက်ကျော်လွန်၍ ပြန်လည် စွန့်လွှတ်မည် မဟုတ်ကြောင်း မေလ ၃ဝ ရက်နေ့တွင် ကာကွယ်ရေးဝန်ကြီးဌာန၊ ဒုတိယဝန်ကြီး ဗိုလ်ချုပ် မြင့်နွယ်မှ ပြောကြားခဲ့သည်။ သိမ်းဆည်းလယ်ယာမြေများပေါ်တွင် တပ်မတော်၏ လယ်ယာမြေစီမံကိန်းမှ နှစ်စဉ် ကျပ် ၇၅ ဘီလီယံကျော် ရရှိခဲ့သည်။ ထိုလယ်ယာမြေများကို ထိုအချိန်က ဥပဒေနှင့်အညီ သိမ်းဆည်းခဲ့သောကြောင့် လျော်ကြေးပေးရန် အစီအစဉ်မရှိပါဟု လည်း ဒုတိယဝန်ကြီးမှ ထပ်လောင်း ပြောကြားခဲ့ သည်။ လယ်ယာမြေအငြင်းပွားမှုများနှင့် ပတ်သက်ပြီး ကိုင်တွယ်ဆောင်ရွက်မှုများ တိုးတက်လာခြင်းမရှိသောကြောင့် ဆန္ဒပြမှုများ ဆက်လက် မြင့်တက်လျက်ရှိသည်။ မေလ ၁ဝ ရက်နေ့တွင် ကယားပြည်နယ်၊ လွိုင်ကော်မြို့၊ ဒေါ်မူးကလကျေးရွားမှ လယ်သမားများသည် သတင်းစာရှင်းလင်းပွဲတစ်ရပ် ပြုလုပ်ခဲ့ပြီး တပ်မတော်မှ သိမ်းဆည်းထားသော လယ်ယာမြေဧက ၉၀ဝ ကျော်အား စွန့်လွှတ်ပေးရန် တောင်းဆိုခဲ့ကြသည်။ ၁၉၉ဝ ခုနှစ်တွင် စစ်တပ်မှ ကယားပြည်နယ်၊ ကျေးရွာ ၁၃ ရွာမှ လယ်သမား ၂၆၄ ဦး ပိုင်ဆိုင်သော လယ်ယာမြေဧက ကိုးရာ ကျော်ကို သိမ်းဆည်းခဲ့သည်။ လယ်ယာမြေကော်မတီ ၏ ဥက္ကဖြစ်သူ ခူ့ဦးရာယ်မှ တပ်မတော်မှ ၎င်းတို့ လိုအပ်သော လယ်ယာမြေများကို ယူထားနိုင်သော်လည်း အသုံးမပြုသော လယ်ယာမြေများကို ပြန်လည် စွန့်လွှတ်သင့်သည်ဟု ပြောကြားခဲ့သည်။ မေလတွင်း လယ်ယာမြေအရေးနှင့် ပတ်သက်ပြီး ဖြစ်ပွားခဲ့သော ဆန္ဒပြမှုများထဲမှ ထိုသတင်းစာရှင်းလင်းပွဲကို ဥပမာအနေဖြင့် ဖော်ပြခဲ့ခြင်းဖြစ်ပြီး အခြား ဆန္ဒပြမှုများကို AAPP ၏ အင်တာနက်စာမျက်နှာ၊ လစဉ် အစီရင်ခံစာတွင် ဖတ်ရှုနိုင်သည်။

သိမ်းဆည်းလယ်ယာမြေအရေးနှင့် ပတ်သက်ပြီး တင်းမာမှုများကြီးထွားလာခြင်းနှင့် ဆန္ဒပြမှုများတိုးလာခြင်းကြောင့် အာဏာပိုင်များ မှ လယ်ယာမြေအငြင်းပွားမှုများကို အရေးယူဆောင်ရွက်ရန်နှင့် ပြေလည်အောင် ဖြေရှင်းပေးရန် ပထမ ဦးစားပေးအနေဖြင့် ချက်ချင်းဆောင်ရွက်သင့်သည်။ အထူးသဖြင့် အစိုးရမှ စတင်ဆောင်ရွက်လျက်ရှိသော စိုက်ပျိုးရေး ဖွံ့ဖြိုးမှု မဟာဗျူဟာနှင့် ရင်းနှီး မြှုပ်နှံမှု အစီအစဉ်မှ လယ်သမားနှင့် ပူးပေါင်းဆောင်ရွက်ရန် လိုအပ်ပါသည်။ ထို့ကြောင့် AAPP မှ အစိုးရအား သိမ်းဆည်းလယ် ယာမြေအမှုများအားလုံးကို ဆန်းစစ်၊ သုံးသပ်ရန်၊ လယ်ယာမြေဥပဒေများကို ပြင်ဆင်ဖြည့်စွက်ရန်နှင့်၊ သို့မဟုတ် ဖျက်သိမ်းရန် တရားမဝင်၊ မတရားသိမ်းဆည်းထားသော လယ်ယာမြေများအတွက် လုံလောက်သော လျော်ကြေးငွေ ပေးနိုင်ရန်အတွက် လယ်သမားများနှင့် ဦးစွာ ဆွေးနွေးသင့်သည်ဟု တိုက်တွန်းပါသည်။
လူပုဂ္ဂိုလ်များအား လွတ်လပ်စွာ ထုတ်ဖော် ပြောဆိုခွင့်ကို ကျင့်သုံးခြင်းမှ အဟန့်အတားဖြစ်စေရန်အတွက် အသရေဖျက်မှု ဥပဒေများဖြစ်သည့် ဆက်သွယ်ရေးဥပဒေ ပုဒ်မ ၆၆(ဃ)၊ ရာဇသတ်ကြီး ပုဒ်မ ၅၀ဝ တို့အား ဆက်လက် အသုံးပြု လျက်ရှိသည်။ တပ်မတော်နှင့် တိုင်းရင်းသား လက်နက်ကိုင်တပ်ဖွဲ့များကြား ဖြစ်ပွားနေသော ပဋိပက္ခများကို ပြဇာတ်ကပြခဲ့ပြီး နောက် စစ်ပွဲအလိုမရှိပြဇာတ်ကပြခဲ့သော ကျောင်းသား ကိုးဦးအနက် အဓိက ဇာတ်ဆောင်နှစ်ဦးဖြစ်သော ကိုအောင်ခန့်ဇော်နှင့် ကိုမြတ်သူထက်တို့အား ပုသိမ်မြို့နယ်တရားရုံးမှ တပ်မတော်အား အသရေဖျက်ခြင်းအတွက် ရာဇသတ်ကြီး ပုဒ်မ ၅၀ဝ ဖြင့် မေလ ၁၂ ရက်နေ့တွင် စွဲချက်တင်ခဲ့သည်။ အနောက်တောင်တိုင်းစစ်ဌာနချုပ်မှ စစ်ဦးစီး ပထမတန်း ဒုဗိုလ်မှူးကြီးအောင်မျိုးခိုင်မှ တရားလို ပြုလုပ်၍ တိုင်တန်းခဲ့ခြင်းဖြစ်ပြီး ၎င်းးမှ ကျောင်းသားများသည် တပ်မတော် နှင့် ၎င်းတို့မိသားစုဝင်များ၏ ဂုဏ်သိက္ခာကို ထိုခိုက်အောင်ပြု လုပ်ခဲ့သည်ဟု ပြောကြားခဲ့သည်။ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် အမျိုးသား ဒီမိုကရေစီအဖွဲ့ချုပ် (NLD) ပါတီ တို့အား လူမှုကွန်ရက် စာမျက်နှာတွင် အသရေဖျက်ခဲ့ခြင်းအတွက် ဆက်သွယ်ရေးဥပဒေ ပုဒ်မ ၆၆(ဃ) ဖြင့် တရားစွဲဆိုခံခဲ့ရသော ဦးနွေဦးကိုကိုအား ပုသိမ်မြို့နယ် တရားရုံးမှ မေလ ၉ ရက်နေ့တွင် ထောင်ဒဏ်ခြောက်လ ချမှတ်ခဲ့သည်။ ဖေဖော်ဝါရီလ ၂၆ ရက်နေ့တွင် NLD ချောင်းသာကျေးရွာတာဝန်ခံ ဒေါ်အေးအေးအောင်မှ ဦးနွေဦးကိုကိုအား ချောင်းသာမြို့နယ်ရဲစခန်းတွင် အမှုဖွင့်ခဲ့သည်။ ဖေဖော်ဝါရီလတွင် တရားလို ဒေါ်အေးအေးအောင်သည် ပုသိမ်သူအမည်ရှိ လူမှုကွန်ရက်စာမျက်နှာတွင် အသရေဖျက်သော စာသားများရေးသား၍ ဆဲဆိုထားသည် ကိုတွေ့ရှိခဲ့သောကြောင့် ဦးနွေဦးကိုကို အား အမှုဖွင့်ခဲ့ခြင်းဖြစ်သည်။ မေလ ၂၆ ရက်နေ့တွင် ပဲခူးမြို့နယ် တရားရုံးမှ မစန္ဒီမြင့်အောင်အား နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား လူမှုကွန်ရက်စာမျက်နှာတွင် စော်ကား ရေးသားခဲ့ခြင်းအတွက် ဆက်သွယ်ရေးဥပဒေ ၆၆(ဃ)ဖြင့် ထောင်ဒဏ် ခြောက်လ ချမှတ်ခဲ့သည်။ မြန်မာနိုင်ငံ၏ ငြိမ်းချမ်းရေး လုပ်ငန်းစဉ်ကိုု မေးခွန်းထုတ်ထားသော သရော်စာဆောင်းပါးနှင့် ပတ်သက်ပြီး တပ်မတော်မှ အမှုဖွင့်ထားကြောင်း ဧပြီလ ၂၅ ရက်နေ့တွင် မြန်မာစာနယ်ဇင်းကောင်စီမှ The Voice Daily သတင်းစာသို့ အကြောင်းကြားခဲ့သည်။ ထိုသရော်စာအား ဆောင်းပါးရှင် ဗြိတိသျှ ကိုကိုမောင် ခေါ် ကိုကျော်စွာနိုင်မှ ပြည်တွင်းစစ် ရပ်စဲစေရန် ရည်ရွယ်၍ တိုင်းရင်းသား လက်နက်ကိုင်အဖွဲ့များအား သရော် ရေးသားခဲ့ခြင်းဖြစ်ကြောင်း ပြောကြားခဲ့သည်။ ရေးသားခဲ့ ခြင်းဖြစ်သည်။ ယင်းဆောင်းပါးအား မတ်လ ၂၆ ရက်နေ့တွင် ထုတ်ဝေခဲ့သည်။
ဆက်သွယ်မေးမြန်းရန်
နိုင်ငံရေးအကျဉ်းသားများကူညီစောင့်ရှောက်ရေးအသင်း
တိတ်နိုင် အတွင်းရေးမှူး +၆၆(၀) ၈၁၂ ၈၇၈ ၇၅၁
ဦးဘိုကြည် တွဲဘက်အတွင်းရေးမှူး +၆၆(၀) ၈၁၉ ၆၂၈ ၇၁၃
ဦးအောင်မျိုးကျော် ရန်ကုန်ရုံးတာဝန်ခံ +၉၅(၀) ၉၄၂ ၈၁၁ ၇၃၄၈

ဒေါင်းလော့ရယူရန် လစဉ်သုံးသပ်ချက် Burmese Month in Review (May)

ဒေါင်းလော့ရယူရန် Burmese Chronology (May )

အေအေပီပီ လစဉ်သတင်းစဉ်ဒေါင်းလော့ရယူရန် Burmese Newsletter (May)

လက်ကျန်နိုင်ငံရေးအကျဉ်းသားစာရင်း ဒေါင်းလော့ရယူရန် 40 remainging PP list burmese version Updated on May 30, 17

အမှုရင်ဆိုင်နေရဆဲ အကျဉ်းသားစာရင်း ဒေါင်းလော့ရယူရန် MAY 209 facing trial list (burmese) updated on May 30, 17 (Updated)

၆၆ (ဃ) ဖြင့် မှတ်တမ်းပြုစုထားသော စာရင်းဒေါင်းလော့ရယူရန် 66 (D) total list(new) Updated