စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ အောက်တိုဘာလ ၁၈ ရက်၊ ၂၀၂၁ ခုနှစ်
ယနေ့ (အောက်တိုဘာ ၁၈) တွင် အကြမ်းဖက်စစ်အုပ်စုမှ ထုတ်ပြန်ကြေညာသည့် အကျဉ်းသားများကို လွှတ်ပေးမည်ဆိုသော ကြေညာချက်သည် နိုင်ငံတကာအသိုင်းအဝိုင်း၏ ရှုတ်ချမှုများကို ရပ်တန့်စေရန်အတွက် အသုံးပြုသည့် နည်းပရိယာယ်တစ်ခုသာလျှင်ဖြစ်သည်။ ထိုကဲ့သို့လွှတ်ပေးခြင်းအားဖြင့် အာဏာသိမ်းမှုကို အဆုံးသတ်သွားစေမည် မဟုတ်ပါ။ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် နိုင်ငံတော်သမ္မတ ဦးဝင်းမြင့်အပါအဝင် ဖမ်းဆီးခြင်းခံထားရသော နိုင်ငံရေးအကျဉ်းသားများကို ခြွင်းချက်မရှိ ပြန်လည်လွှတ်ပေးရမည်ဖြစ်ပြီး ၎င်းတို့၏မူရင်းတာဝန်များကို ပြန်လည် ထမ်းဆောင်ခွင့်ပေးရမည်ဖြစ်သည်။ ထို့အပြင် မတရားညှဉ်းပန်းနှိပ်စက်မှု၊ ဖမ်းဆီးမှုကို ကျူးလွန်ခဲ့သူများအား အပြစ်ပေးအရေးယူမှုများ ပြုလုပ်ရမည်ဖြစ်သည်။ မတရားဖမ်းဆီးခြင်းခံခဲ့ရသည့်အပြင် ရုပ်ပိုင်းနှင့်စိတ်ပိုင်းဆိုင်ရာ ညှဉ်းပန်းနှိပ်စက်ခြင်းခံရသူများကို ကျူးလွန်ခဲ့သူများက ပြန်လည်တောင်းပန်ခြင်း၊ ကုစားပေးခြင်းများအတွက် စစ်အုပ်စုမှ အပြည့်အဝတာဝန်ယူရမည် ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ အောက်တိုဘာလ ၁၆ ရက်နေ့က ကျဆုံးသွားခဲ့သည့် စစ်ကိုင်းတိုင်းဒေသကြီး၊ ခင်ဦးမြို့နယ် နှင့် ချင်းပြည်နယ်၊ မတူပီမြို့နယ်တို့မှ အပြစ်မဲ့ပြည်သူ (၃) ဦး၏ အချက်အလက်များကို ယနေ့(အောက်တိုဘာ ၁၈)တွင် ကောက်ယူရရှိနိုင်ခဲ့ပါသည်။ ယနေ့တွင် ကျဆုံးခဲ့ရသူများကို အတည်ပြုနိုင်ခြင်းမရှိသေးသည့်အတွက် စစ်အာဏာရှင်တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယမန်နေ့အထိ (၁၁၈၁) ဦး ရှိခဲ့ပြီဖြစ်ပါသည်။ အဆိုပါအရေအတွက်သည် AAPP မှ ကောက်ယူရရှိထားသည့် အရေအတွက်ဖြစ်ပြီး အမှန်တကယ် ကျဆုံးသွားသူများမှာ အဆိုပါအရေအတွက်ထက် ပိုများနေနိုင်ပါသည်။ ထပ်မံ ကောက်ယူရရှိလာပါကလည်း ဆက်လက် ထည့်သွင်း ဖော်ပြပေး သွားမည် ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ အောက်တိုဘာလ ၁၈ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၇၃၅၅) ဦးရှိပြီး ၎င်းတို့အနက်မှ (၃၅၄) ဦး မှာ ထောင်ဒဏ်ချမှတ်ခြင်းခံထားရသည်။ ထိုပြစ်ဒဏ်ကျခံရသူထဲမှ အသက် ၁၈ နှစ်အောက် ကလေး (၂) ဦး အပါအဝင် (၂၆) ဦးမှာ သေဒဏ်ချမှတ်ခံထားရသည်။ ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၉၈၉) ဦး၏ အမည်စာရင်းကိုလည်း သီးခြား ဖော်ပြထားပြီး ၎င်းတို့အနက်မှ မျက်ကွယ် သေဒဏ်ချမှတ်ခြင်းခံထားရသူ (၃၉) ဦး အပါအဝင် (၁၁၈) ဦးမှာ မျက်ကွယ် ပြစ်ဒဏ်ချမှတ်ခြင်းခံထားရသည်။ ထိုကြောင့် သေဒဏ်ချမှတ်ခံထားရသူ စုစုပေါင်း (၆၅) ဦးရှိပြီဖြစ်သည်။
လွတ်မြောက်လာသူဦးရေ အတိအကျနှင့် အမည်စာရင်းမှာ ချက်ချင်းရရှိရန် လက်လှမ်းမမီနိုင်သည့်အတွက် အတည်ပြုရန် လိုအပ်နေဆဲဖြစ်ပြီး အတည်ပြုနိုင်သည့် အမည်စာရင်းများကို ဆက်လက် ဖော်ပြပေးသွားပါမည်။
စစ်ကိုင်းတိုင်းဒေသကြီး၊ ခင်ဦးမြို့နယ်၊ ရွှေကူတဲစုကျေးရွာမှ ကိုမျိုးဆွေကို အကြမ်းဖက်စစ်အုပ်စု၏တပ်ဖွဲ့ဝင်များနှင့် လက်နက်များကိုင်ဆောင်ထားသည့် ပျူစောထီးအဖွဲ့ဝင်များမှ အောက်တိုဘာလ ၁၆ ရက်နေ့ နံနက်အစောပိုင်းတွင် ဖမ်းဆီးသွားခဲ့ပြီး ၎င်းတို့တပ်စွဲထားသည့် ပျဉ်ထောင်ကျေးရွာ၌ တနေ့လုံး ရိုက်နှက်၍ ညှဉ်းပန်းနှိပ်စက်ခဲ့ကာ ည ၁ဝ နာရီခန့်တွင် ပစ်သတ်ခဲ့ကြောင်း သိရှိရသည်။
ချင်းပြည်နယ်၊ မတူပီမြို့တွင် အောက်တိုဘာလ ၁၆ ရက်နေ့ နေ့လယ်ပိုင်းက အကြမ်းဖက်စစ်အုပ်စု၏တပ်မှ ပစ်ခတ်ခဲ့သော လက်နက်ကြီးကျည်သည် တောင်ယာတဲတစ်လုံးပေါ်ကို ကျရောက်ပေါက်ကွဲခဲ့သောကြောင့် တဲအတွင်းရှိ အသက် ၆ နှစ်အရွယ် မိန်းကလေးတစ်ဦးမှာ ကျဆုံးသွားခဲ့ကြောင်း သိရှိရသည်။ ထို့ပြင် အောက်တိုဘာလ ၁၆ ရက်နေ့တွင် မတူပီမြို့မှ ဦးလိပ်ချွဲ့သည် ဝါဥခြံသွားစဉ် အကြမ်းဖက်စစ်အုပ်၏တပ်မှ ထောင်ထားခဲ့သည့် မိုင်းနင်းမိခဲ့ပြီး ကျဆုံးသွားခဲ့ကြောင်း သိရှိရသည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။ ထို့ပြင် ကျဆုံးအချက်အလက်များကို ဖော်ပြပါ fatality-data@aappb.org အီးမေးလ်သို့လည်းကောင်း၊ အဖမ်းအဆီးအချက်အလက်များကို detention-data@aappb.org အီးမေးလ်သို့လည်းကောင်း တိုက်ရိုက်ပေးပို့၍ ဆက်သွယ် အကြောင်းကြားနိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း
နွေဦးတော်လှန်ရေးကာလကျဆုံးသူများစာရင်း Recent Fatality List for October 18, 2021 (Burmese)
မတရားဖမ်းဆီးထိန်းသိမ်းခံထားရသူများစာရင်း Under-Detention-List-Last-Updated-on-18-October-2021
ပြန်လည်လွတ်မြောက်လာသူများစာရင်း Release-Lists-Last-Updated-on-18-October-2021
အမိန့်ချမှတ်ခံထားရသူများစာရင်း Under-Sentenced-List-Last-Updated-on-18-October-2021