စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ မေလ ၁၁ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ယခင်နေ့ရက်များက ကျဆုံးသွားခဲ့သည့် ကချင်ပြည်နယ်၊ ဟိုပင်မြို့နှင့် နမ္မတီးမြို့တို့မှ အပြစ်မဲ့ ပြည်သူ (၂) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ကြောင့် ယမန်နေ့အထိ ကျဆုံးသွားခဲ့သူ (၇၈၃) ဦးရှိခဲ့သည်။ ယနေ့တွင် ကျဆုံးသွားခဲ့သူများကို အတည်ပြုနိုင်ခြင်း မရှိသေးသည့်အတွက် စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယနေ့အထိ (၇၈၃) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက် ဖြစ်ပြီး အမှန်တကယ် ကျဆုံးသွားသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံ ကောက်ယူ ရရှိလာပါကလည်း ဆက်လက် ထည့်သွင်း ဖော်ပြပေး သွားမည်ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ မေလ ၁၁ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၈၅၉) ဦးရှိပြီး ၎င်းတို့အနက်မှ (၈၆) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၅၈၁) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက်မှ (၂၀) ဦးမှာ မျက်ကွယ် သေဒဏ်နှင့် (၁၄) ဦးမှာ အလုပ်ကြမ်း နှင့် ထောင်ဒဏ် သုံးနှစ်စီ မျက်ကွယ် ထောင်ဒဏ်ချမှတ်ခြင်းခံထားရကာ လက်ရှိတွင် တိမ်းရှောင်နေဆဲ ဖြစ်သည်။ ပြန်လည် လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြု ရန် လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
ယနေ့ (မေ ၁၁) တွင် စစ်အုပ်စုမှ အာဏာသိမ်းမှု ရက် (၁၀၀) တိုင် ရှိလာပြီဖြစ်သည်။ စစ်အုပ်စုသည် ပြည်သူများက အပ်နှင်းထားသော တိုင်းပြည်၏အာဏာအဝဝကို လက်နက်အားကိုးဖြင့် တရားမဲ့ အာဏာသိမ်းယူပြီးနောက်ပိုင်း ပြည်သူ များအား အကြမ်းဖက်နည်းမျိုးစုံဖြင့် ရမ်းကားနှိပ်စက်ခဲ့သဖြင့် အကြမ်းဖက်စစ်အုပ်စုအဖြစ် ထင်ထင်ရှားရှား ရပ်တည် လျှက်ရှိသည်။ စစ်တပ်၏ စည်းမျည်းစည်းကမ်းများကို လိုက်နာမှုမရှိသဖြင့် ကမာ္ဘပေါ်ရှိ စစ်တပ်များ၏ ဂုဏ်သိက္ခာကိုပါ ထိခိုက်စေလျှက်ရှိနေသည်။
ယခုအခါ နိုင်ငံ၏ နိုင်ငံရေး၊ လူမှုရေး၊ စီးပွားရေး၊ ကျန်းမာရေးစသည့် ကဏ္ဍများအားလုံးသည် ယိုင်နဲ့လုနီးပါးရှိနေပြီ ဖြစ်သည်။ အထူးသဖြင့် ကိုဗစ်ကပ်ရောဂါ ဖြစ်ပွားနေချိန်အတွင်း အာဏာသိမ်းခဲ့ခြင်းကြောင့် ပြည်သူများသည် ကျန်းမာရေးဆိုင်ရာ အစောင့်အရှောက်များ မရရှိတော့ဘဲ နိုင်ငံတွင်း မည်မျှ ရောဂါကူးစက်ခြင်းခံထားရသည်ကို သိရှိရ ခြင်းမရှိသောကြောင့် ကိုဗစ်တတိယလှိုင်းဖြစ်ပေါ်မည်ကို အထူး စိုးရိမ်ရသည့် အခြေအနေဖြစ်သည်။ ရက် (၁၀၀) အတွင်း ပြည်သူများသည် အာဏာသိမ်း စစ်အုပ်စု၏ အမျိုးမျိုးသော ခိုး၊ ဆိုး၊ လုယက်၊ ဖျက်ဆီးမှု နှင့် ရက်စက်ကြမ်းကြုတ်မှုများ ကို အချိန်နှင့်အမျှ ရင်ဆိုင်ခံစားနေကြရသည်။ အခြားတစ်ဖက်တွင်လည်း တိုင်းရင်းသားဒေသများ၌ တိုက်ပွဲများ ပြင်းထန်စွာ ဖြစ်ပွားလျှက်ရှိပြီး သောင်းနှင့်ချီသော ဒေသခံ တိုင်းရင်းသားများမှာ အိုးအိမ်စွန့်ခွာ၍ တောတောင်များအတွင်း ထွက်ပြေး နေကြရသည်။ ထိုကဲ့သို့သော ဆိုးရွားသည့် အခြေအနေများကို ရင်ဆိုင်နေကြရသော်လည်း အာဆီယံ၏ ပျော့ပျောင်းသော ဆုံးဖြတ်ချက် နှင့် နိုင်ငံတကာမှ အရေးယူဆောင်ရွက်မှုများသည် အကြမ်းဖက် စစ်အုပ်စုကို ထိရောက်သော ဖိအား ဖြစ်စေမည် မဟုတ်ပါ။ အာဏာရှင်စနစ် အပြီးတိုင် ချုပ်ငြိမ်းသွားစေရန်မှာ ပြည်သူများသည် ရသမျှ နည်းလမ်းပေါင်းစုံဖြင့် ပြန်လည် ခုခံရမည့် အခြေအနေကို ရောက်ရှိနေပြီဖြစ်သည်။
ယနေ့ (မေ ၁၁) တွင် စစ်အာဏာရှင်ဆန့်ကျင်ရေး သပိတ်များကို မြန်မာပြည်တဝှမ်းလုံး၌ ပြုလုပ်ခဲ့ကြသည်။ ယနေ့ နံနက်ပိုင်းတွင် တနင်္သာရီတိုင်းဒေသကြီး၊ ထားဝယ်မြို့၊ ဘုမ္မော်ရပ်ကွက်၌ ထားဝယ်တပ်ပေါင်းစု သပိတ်စစ်ကြောင်း စထွက်ရန် ပြင်နေစဉ် အိမ်စီးကားများအသုံးပြု၍ ပစ်ခတ်ဖြိုခွင်းခဲ့ခြင်းကြောင့် ပြည်သူ တစ်ဦး ထိခိုက် ဒဏ်ရာရရှိခဲ့သည်။ ယင်းသို့ ပစ်ခတ်ဖြိုခွင်းခဲ့၍ လူစုကွဲသွားပြီးနောက် နေအိမ်အတွင်းအထိ သေနတ်ဖြင့် ပစ်ခတ် ဖမ်းဆီးသောကြောင့် အမျိုးသမီးများ အပါအဝင် ဆန္ဒထုတ်ဖော်သူ ၁ဝ ဦးကျော် ဖမ်းဆီးခြင်းခံခဲ့ရသည်ဟု သိရှိရသည်။ ထိုကဲ့သို့ အိမ်စီးကား၊ ဆိုင်ကယ်များကို အသုံးပြု၍ ဖမ်းဆီးခြင်းသည် ခိုးကြောင်ခိုးဝှက်လုပ်ရပ်ဖြစ်ပြီး အကြမ်းဖက် သရုပ်မှန်ကို ပို၍ ပေါ်လွင်စေ သည်။
အကြမ်းဖက် စစ်အုပ်စု၏ ရမ်းကားပစ်ခတ်မှုများသည် တစ်နေ့ထက်တစ်နေ့ ပို၍ ဆိုးရွားလာပြီး ရက်ဆက်ဆိုသလို ကျဆုံးမှုများ တိုးလာခဲ့သည်။ ယမန်နေ့ (မေ ၁၀) ညအချိန်က ကချင်ပြည်နယ်၊ နမ္မတီးမြို့၌ စစ်အုပ်စု၏ လက်နက်ကိုင်များမှ ပစ်ခတ်ခဲ့သည်အတွက် လူငယ် တစ်ဦးကျဆုံးသွားခဲ့ပြီး သုံးဦးဒဏ်ရာရရှိခဲ့သည်။ ဒဏ်ရာရရှိသူများအနက် လက်​မောင်း​​ကို ကျည်ထိမှန်ခဲ့သော လူငယ်သည် ဒဏ်ရာ ပြင်းထန်ပြီး ကျန်ဒဏ်ရာရရှိသူ နှစ်ဦးမှာလည်း ထွက်ပြေး တိမ်းရှောင်နေကြရ ကြောင်း သိရှိရသည်။
မေလ ၈ ရက်နေ့ ညအချိန်ကလည်း ကချင်ပြည်နယ်၊ မိုးညှင်းမြို့နယ်၊ ဟိုပင်မြို့၊ တကွင်းကျေးရွာတွင် နေထိုင်သည့် တိရိစာ္ဆန်ဆေးကုဆရာဝန်တစ်ဦးဖြစ်သော ဒေါက်တာ စိုင်းအိုက်ကွမ်းသည် ဟိုပင်မြို့အခြေစိုက် ခလရ (၃၈၉) တပ်ရင်းရှေ့ က ဖြတ်သွားစဉ် စစ်သားများမှ ဖမ်းဆီးကာ လက်နောက်ပြန်ကြိုးတုပ်ပြီး ဦးခေါင်းကို ပစ္စတိုသေနတ်ဖြင့် ပစ်သတ်ခဲ့ပြီး အလောင်းကို မြောင်းအနီး၌ ပစ်ထားခဲ့သည်။ ဆွေမျိုးများမှ ရုပ်အလောင်းကို ပြန်လာယူခဲ့ပြီး နာရေးလုပ်မည့် အချိန်၌ လုယူသွားခဲ့ကာ ပြန်ပေးချိန်၌ ဦးခေါင်းကို ခွဲစိတ်ထားသည်ကို တွေ့ရှိရသည်ဟု သိရှိရသည်။ ထို့ပြင် ဆေးစာ၌လည်း မူးယစ်ဆေးအသုံးစွဲလွန်၍ သေဆုံးခြင်းဖြစ်ကြောင်း ရေးသားထားသည်ဟု သိရှိရသည်။ ဒေါက်တာစိုင်းအိုက်ကွမ်းသည် မတရားသဖြင့် ရက်စက်စွာ သတ်ဖြတ်ခံခဲ့ရခြင်းဖြစ်သည်။ ထို့ပြင် အကြမ်းဖက် စစ်အုပ်စုက ၎င်းတို့၏ လုပ်ရပ်ကို ဖုံးကွယ်လိုကာ သက်သေ ဖျောက်ဖျက်ပစ်ချင်သဖြင့် ကဗျာဆရာ ခက်သီ၏ ဇနီးကဲ့သို့ပင် မိသားစုဝင်များကို အတင်းအကျပ် လက်မှတ်ရေးထိုးခိုင်းခြင်းဖြစ်သည်။ အကြမ်းဖက် စစ်အုပ်စုသည် ၎င်းတို့ကျူးလွန်ခဲ့သော ရာဇဝတ်မှု တစ်ခုချင်းစီတိုင်းအတွက် တာဝန်ယူမှု၊ တာဝန်ခံမှုရှိရမည်ဖြစ်သည်။
အကြမ်းဖက် စစ်အုပ်စုသည် ၎င်းတို့၏ လုပ်ငန်းလည်ပတ်မှု ယန္တရားကို ရပ်တန့်သွားစေသည့်အတွက် အာဏာဖီဆန်ရေး လှုပ်ရှားမှု (CDM) ၌ ပါဝင်သူများကို နေ့စဉ်ရက်ဆက် အပြင်းအထန် ဖိနှိပ်လျက်ရှိသည်။ ယမန်နေ့က ပဲခူးတိုင်းဒေသကြီး၊ ဝေါမြို့နယ်၊ လက်ပန်ကျေးရွာမှ CDM ပြုလုပ်နေသော ပညာရေးဝန်ထမ်း လေးဦးကို ဖမ်းဆီးသွားခဲ့ပြီး ၎င်းတို့ခန့်အပ်ထား သော ကျေးရွာအုပ်ချုပ်ရေးမှူးမှ အာမခံပေး၍ ပြန်လည် လွတ်မြောက်လာခဲ့သည်။ ထိုလုပ်ရပ်သည် ၎င်းတို့ ဖမ်းဆီး ချင်သလို ဖမ်းဆီးပြီး ၎င်းတို့ ကယ်၍သာ လွတ်မြောက်လာခြင်းဖြစ်ကြောင်း အထင်အမြင်ရောက်စေရန် ရည်ရွယ်ချက်ဖြင့် လုပ်ဆောင်ခြင်းပင် ဖြစ်သည်။ နောက်ပိုင်းတွင် ငွေကြေးပေးမှသာ လွတ်မြောက်ခြင်းမျိုးလည်းဖြစ်လာနိုင်သည်။ အဆိုပါ လုပ်ရပ်များမှာ အကြမ်းဖက် စစ်အုပ်စုသည် နိုင်ငံရေးအရ အမြတ်ထုတ်လိုပြီး လာဘ်ပေးလာဘ်ယူကိစ္စများ တွင်တွင်ကျယ်ကျယ် လုပ်ဆောင်နိုင်ရန်အတွက် ရည်ရွယ်ချက်ရှိရှိ လုပ်နေခြင်းပင်ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”

Email :   info@aappb.org

Facebook : https://web.facebook.com/burmapoliticalprisoners/

Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

နွေးဦးတော်လှန်ရေးကာလကျဆုံးသူများစာရင်း Fatality List for May 11, 2021 (Bur) (Updated)
မတရားဖမ်းဆီးထိန်းသိမ်းခံထားရသူများစာရင်း Under Detention List_Burmese (11-May-2021)
ပြန်လည်လွတ်မြောက်လာသူများစာရင်း Release Lists_Burmese (11-May-2021)