စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ မေလ ၈ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ယခင်နေ့ရက်များက ကျဆုံးသွားခဲ့သည့် စစ်ကိုင်းတိုင်းဒေသကြီး၊ ကနီမြို့နယ် နှင့် မကွေးတိုင်းဒေသကြီး၊ ပေါက်မြို့နယ်တို့မှ အပြစ်မဲ့ ပြည်သူ (၂) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ကြောင့် ယမန်နေ့အထိ ကျဆုံးသွားခဲ့သူ (၇၇၆) ဦးရှိခဲ့သည်။ ယနေ့တွင် ကျဆုံးသွားခဲ့သူများကို အတည်ပြုနိုင်ခြင်း မရှိသေးသည့်အတွက် စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယနေ့အထိ (၇၇၆) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက် ဖြစ်ပြီး အမှန်တကယ် ကျဆုံးသွားသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံ ကောက်ယူ ရရှိလာပါကလည်း ဆက်လက် ထည့်သွင်း ဖော်ပြပေး သွားမည်ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ မေလ ၈ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၈၁၃) ဦးရှိပြီး ၎င်းတို့အနက်မှ (၈၄) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၅၁၈) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက်မှ (၂၀) ဦးမှာ မျက်ကွယ် သေဒဏ်နှင့် (၁၄) ဦးမှာ အလုပ်ကြမ်း နှင့် ထောင်ဒဏ် သုံးနှစ်စီ မျက်ကွယ် ထောင်ဒဏ်ချမှတ်ခြင်းခံထားရကာ လက်ရှိတွင် တိမ်းရှောင်နေဆဲ ဖြစ်သည်။ ပြန်လည် လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြု ရန် လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
ယနေ့ (မေ ၈) တွင် မြန်မာပြည်တဝှမ်းလုံး၌ သပိတ်ပုံစံမျိုးစုံဖြင့် အာဏာသိမ်း စစ်အုပ်စုကို ဆက်လက်ဆန့်ကျင် ဆန္ဒထုတ်ဖော်ခဲ့ကြသည်။
ယမန်နေ့ (မေ ၇) မွန်းလွဲပိုင်းအချိန်တွင် စစ်ကိုင်းတိုင်းဒေသကြီး၊ ကနီမြို့နယ်၊ ကင်းစံပြကျေးရွာမှ ရွာသား တစ်ဦးသည် တောတွင်းသွားစဉ် ပစ်သတ်ခြင်းခံခဲ့ရပြီး မိသားစုက ၎င်း၏ ရုပ်အလောင်းကို သယ်ယူ၍ မရသေးဘဲ လာသယ်သည့်သူ တစ်ဦးကို သေနတ်ဖြင့်ချိန်၍ လက်မြှောက်ခိုင်းကာ ပါးရိုက်ခဲ့သည်ဟု သိရှိရသည်။ အကြမ်းဖက် စစ်အုပ်စု၏ အကြောင်းမဲ့ ရမ်းကား ပစ်ခတ်မှုများ နှင့် နိုင်လိုမင်းထက် အပြုအမူများသည် တစ်နေ့တစ်ခြား ပို၍ ဆိုးရွားလာပြီး နေ့စဉ် လက်နက်မဲ့ ပြည်သူများမှာ ၎င်းတို့၏ စိတ်ထင်သလို ကျူးလွန်သည့် ရာဇဝတ်မှုများကြောင့် ကျဆုံး၊ ဒဏ်ရာရရှိလျှက်ရှိနေသည်သာမက စိတ်ပိုင်း နှင့် ရုပ်ပိုင်းဆိုင်ရာ မလုံခြုံမှုများ နှင့် ခြိမ်းခြောက် စော်ကားမှုများကို ရင်ဆိုင်နေကြဆဲဖြစ်သည်။
ထို့ပြင် ပြည်သူပိုင် ပစ္စည်းများကို ၎င်းတို့ လိုသလို လုယက်ခြင်းများအား ဗြောင်ကျကျကျူးလွန်လျက်ရှိသည်။ ယမန်နေ့က စစ်ကိုင်းတိုင်းဒေသကြီး၊ ကန့်ဘလူမြို့နယ်၊ ပိတောက်ပင်ကျေးရွာ၌ ဆန္ဒပြရွာသားတချို့ကို လိုက်လံ ရှာဖွေခဲ့ပြီး နေအိမ် ၁၅ အိမ်ခန့်ကို ဖျက်ဆီးသွားခဲ့ကာ ရွှေ၊ ငွေ၊ လက်ကိုင်ဖုန်းများကို လုယူသွားခဲ့ကြောင်း သိရှိရသည်။ ယနေ့ (မေ ၈) ၌လည်း ရွာအတွင်း စခန်းချနေထိုင်လျက်ရှိသောကြောင့် ပိတောက်ပင် ရွာသား ၈ဝ ခန့်မှာ တောတောင်အတွင်း တိမ်းရှောင်နေကြရ သည်ဟု သိရှိရသည်။ အာဏာရှင်စနစ်ကြီးစိုးနေသမျှကာလပတ်လုံး ပြည်သူများ၏ အသက်၊ အိုးအိမ်၊ စည်းစိမ်များ ပျက်စီး ဆုံးရှုံးနေဦးမည်ဖြစ်သောကြောင့် လက်နက်ဖြင့် အနိုင်ကျင့် ဗိုလ်ကျပြီး ပြည်သူ့အာဏာကို မတရာသိမ်းပိုက်သော စစ်အာဏာရှင်စနစ်ကို အမြစ်ပြတ် ချေမှုန်းနိုင်မှသာလျှင် ငြိမ်းချမ်းသည့် လူ့အသိုင်းအဝိုင်းကို တည်ဆောက်နိုင်မည်ဖြစ် သည်။
အာဏာဖီဆန်ရေး လှုပ်ရှားမှု (CDM) ၌ ပါဝင်သည့် ဝန်ထမ်းများသည်လည်း နည်းအမျိုးမျိုးဖြင့် ဖိနှိပ်ခြင်းခံနေကြရသည်။ ယခုရက်ပိုင်းအတွင်း ပညာရေးဝန်ကြီးဌာနမှ ဆရာ၊ ဆရာမများ နှင့် ဝန်ထမ်းများကို အလုပ်မှ ရပ်ဆိုင်းကြောင်း ထုတ်ပြန် ကြေညာမှုများ ဆက်တိုက်ပြုလုပ်လာခဲ့သည်။ မန္တလေးမြို့ရှိ ရတနာပုံတက္ကသိုလ်မှ ဆရာ၊ဆရာမ ၄၆၅ ဦး၊ မန္တလေး တက္ကသိုလ်မှ ဆရာ၊ဆရာမ နှင့် ရုံးဝန်ထမ်း ၃၉၂ ဦး၊ မန္တလေးအဝေးသင်တက္ကသိုလ်မှ ဆရာ၊ဆရာမ ၈၅ ဦး၊ မန္တလေး နိုင်ငံခြားဘာသာ တက္ကသိုလ်က ဆရာ၊ဆရာမ ၉၄ ဦး နှင့် ရန်ကုန်အဝေးသင်တက္ကသိုလ်မှ ဆရာ၊ဆရာမ နှင့် ဝန်ထမ်း ၉၄ ဦး တို့သည် တာဝန်မှ ယာယီရပ်ဆိုင်းခြင်းခံခဲ့ရသည်။
ကချင်ပြည်နယ်တွင် တိုက်ပွဲများ ပြင်းထန်စွာ ဖြစ်ပွားလျှက်ရှိရာ အကြမ်းဖက် စစ်တပ်သည် ဂျက်လေယာဉ်ဖြင့် ကမာ္ဘက တားမြစ်ထားသည့် ဓာတုဗုံးများကို အသုံးပြု၍ တိုက်ခိုက်လာကြောင်း လူမှုကွန်ရက်စာမျက်နှာပေါ်တွင် ပျံ့နှံ့လျှက်ရှိပြီး အဆိုပါသတင်းနှင့်ပတ်သက်၍ ကချင်ပြည်လွတ်မြောက်ရေးအဖွဲ့ (KIO) မှ စိစစ်နေဆဲဖြစ်ကာ အတည်ပြုနိုင်ခြင်း မရှိသေး ကြောင်း သိရှိရသည်။ ဓာတုဗုံးများကိုအသုံးပြု၍ တိုက်ခိုက်ခြင်းသည် စစ်ရာဇဝတ်မှုဖြစ်ပြီး အလွန် ဆိုးရွားသော လူ့အခွင့်အရေးချိုးဖောက်မှုဖြစ်သည်။ အကြမ်းဖက် စစ်တပ်၏ အမျိုးမျိုးသော တိုက်ခိုက်မှုများအတွင်း ဒေသခံ ဌာနေ တိုင်းရင်းသားများမှာ ကျဆုံး၊ ဒဏ်ရာရရှိခဲ့သည်သာမက အိုးအိမ်စွန့်ခွာ ထွက်ပြေးနေကြရသည်။ သို့သော်လည်း အကြမ်းဖက် စစ်အုပ်စုသည် ၎င်းတို့အာဏာ တည်မြဲစေရေးအတွက် စစ်ရေးအရ အသာစီးရရှိရန်သာ ကြိုးပမ်းလာလျက်ရှိ သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

နွေဦးတော်လှန်ရေးအတွင်းကျဆုံးသူများစာရင်းFatality List for May 8, 2021 (Bur) (Updated)
မတရားဖမ်းဆီးခံထားရသူများစာရင်းUnder Detention List_Burmese (8-May-2021)
ပြန်လည်လွတ်မြောက်လာသူများစာရင်းRelease Lists_Burmese (8-May-2021)