စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ မေလ ၃ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ယမန်နေ့က ကျဆုံးသွားခဲ့သည့် စစ်ကိုင်းတိုင်းဒေသကြီး၊ ဝက်လက်မြို့မှ အပြစ်မဲ့ ပြည်သူ (၁) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ကြောင့် ယမန်နေ့အထိ ကျဆုံးသွားခဲ့သူ (၇၆၆) ဦးရှိခဲ့သည်။ ယနေ့တွင် ကျဆုံးသွားခဲ့ သူများကို အတည်ပြုနိုင်ခြင်း မရှိသေးသည့်အတွက် စစ်အာဏာရှင်တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယနေ့အထိ (၇၆၆) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက် ဖြစ်ပြီး အမှန်တကယ် ကျဆုံးသွားသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံ ကောက်ယူ ရရှိလာပါကလည်း ဆက်လက် ထည့်သွင်း ဖော်ပြပေးသွား မည်ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ မေလ ၃ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၆၁၄) ဦးရှိပြီး ၎င်းတို့အနက်မှ (၈၃) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၄၁၇) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက်မှ (၂၀) ဦးမှာ မျက်ကွယ် သေဒဏ်နှင့် (၁၄) ဦးမှာ အလုပ်ကြမ်း နှင့် ထောင်ဒဏ် သုံးနှစ်စီ မျက်ကွယ် ထောင်ဒဏ်ချမှတ်ခြင်းခံထားရကာ လက်ရှိတွင် တိမ်းရှောင်နေဆဲ ဖြစ်သည်။ ပြန်လည် လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြု ရန် လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
ယနေ့ (မေ ၃) ကျရောက်သော ကမာ္ဘ့စာနယ်ဇင်း လွတ်လပ်ခွင့်နေ့၌ မြန်မာနိုင်ငံတွင်း ဖိနှိပ်မှု နှင့် အခက်အခဲ အမျိုးမျိုးကြားမှ သတင်းမှန်စီးဆင်းစေရန် ပြုလုပ်ပေးနေသော မြန်မာနိုင်ငံ၏ စတုတ္ထမဏ္ဍိုင်ဟု တင်စားခေါ်ဆိုသည့် သတင်းမီဒီယာကဏ္ဍ နှင့် သတင်းမီဒီယာသမားများ၏ အရေးပါမှုကို မိမိတို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လေးစား အသိအမှတ်ပြု၍ ဂုဏ်ပြုအပ်ပါသည်။ အာဏာသိမ်းမှုဖြစ်စဉ်ကြောင့် မြန်မာနိုင်ငံတွင်း စာနယ်ဇင်းလွတ်လပ်ခွင့်သည် ကျဆင်းလုနီးဖြစ်သွားရပြီး ယနေ့ (မေ ၃) အထိ သတင်းသမား (၈၄) ဦးသည် ဖမ်းဆီး ထိန်းသိမ်းခြင်းခံခဲ့ရသည်။ လက်ရှိအချိန်တွင် သတင်းသမား (၅၀) ဦးမှာ ချုပ်နှောင်ခံထားရဆဲဖြစ်ကာ ၎င်းတို့အနက်မှ (၂၅) ဦးသည် တရားစွဲဆိုခြင်းခံထားရသည်။ ထို့ပြင် သတင်းသမား (၂) ဦးသည် အာမခံဖြင့် ထောင်ပြင်ပမှ တရားရင်ဆိုင်နေကြရသည့်အပြင် သတင်းသမား (၂၉) ဦးသည်လည်း ဖမ်းဝရမ်းထုတ်ခြင်းခံထားရသည်။ အာဏာရှင်စနစ် ရှင်သန် ကြီးစိုးနေသမျှ ကာလပတ်လုံး သတင်းလွတ်လပ်ခွင့် ဆက်လက် ကျဆင်းနေဦးမည်ဖြစ်သည့်အပြင် သတင်းမီဒီသမားများသည်လည်း ယင်းကဲ့သို့ အပြင်းအထန် ဖိနှိပ်ခြင်း ခံနေကြရဦးမည် ဖြစ်သည်။
ယမန်နေ့ (မေလ ၂) က အပြင်းအထန် ပစ်ခတ် ဖြိုခွင်းမှုများကြောင့် ပြည်သူ တချို့ ကျဆုံးသွားခဲ့သော်လည်း ယနေ့ (မေ ၃) တွင် မြန်မာပြည်အနှံ့အပြားမှ ပြည်သူများသည် သပိတ်ပုံစံအမျိုးမျိုးဖြင့် အာဏာသိမ်း စစ်အုပ်စုကို ဆက်လက် ဆန့်ကျင် ဆန္ဒ ထုတ်ဖော်ခဲ့ကြသည်။ ယနေ့တွင် မကွေးတိုင်းဒေသကြီး၊ တောင်တွင်းကြီးမြို့၌ ဆိုင်ကယ်နှင့်လာသည့် ဈေးသည်များကို သေနတ်ဖြင့် လိုက်လံပစ်ခတ်ခဲ့သောကြောင့် နှစ်ဦး ဒဏ်ရာရရှိခဲ့သည်ဟု သိရှိရသည်။
အကြမ်းဖက် စစ်အုပ်စု၏ ယုတ်ညံ့သော ဆိုးယုတ်မှု နောက်တစ်ခုမှာ HIV/AIDS ဝေဒနာရှင်များအား ကူညီ စောင့်ရှောက်မှုပေးနေသည့် စင်တာကို ဝင်ရောက် စီးနင်းခြင်းဖြစ်သည်။ ယမန်နေ့ (မေ ၂) တွင် ရန်ကုန်တိုင်းဒေသကြီး၊ ဒဂုံမြို့သစ်အရှေ့ပိုင်းမြို့နယ်အတွင်းရှိ NLD .AIDS. Center (NAC) ကို ဝင်ရောက် စီးနင်းခဲ့ပြီး ART ဆေးသောက်နေရ သည့် ကလေး သုံးဦး နှင့် အခြား ဆေးကုသရန် ရောက်ရှိနေသူ ကိုးဦးကို မတရားဖမ်းဆီးခေါ်ဆောင်သွားသည်ဟု သိရှိရ သည်။ ဖမ်းဆီးခြင်းခံထားရသည့် HIV ဝေဒနာရှင်များမှာ နေ့စဉ် ပုံမှန် ဆေးဝါး သောက်သုံးရမည်ဖြစ်သည်။ အချိန်မီ ဆေးဝါးသောက်သုံးခွင့်၊ ဆေးကုသခွင့် မရှိပါက ၎င်းတို့၏ ကျန်းမာရေးအခြေအနေမှာ ပို၍ ဆိုးရွားလာဖွယ်ရာရှိသည်။ ထို့ကြောင့် ၎င်းတို့ ဆေးကုသခံယူခွင့်ရရှိရေးနှင့်ပတ်သက်၍ အလွန်အမင်း စိုးရိမ်ရသည့် အခြေအနေဖြစ်ပေါ်လျက်ရှိသည်။
အကြမ်းဖက် စစ်အုပ်စုသည် ပြည်သူပိုင် ပစ္စည်းများကို ဖျက်ဆီးမှုများအား နည်းမျိုးစုံဖြင့် ကျူးလွန်လျက်ရှိသည်။ ယမန်နေ့ ည ၈ နာရီအချိန်၌ သံပုံးတီးခြင်းကြောင့်ဟုဆိုကာ ရန်ကုန်မြို့၊ ၄၆-၄ရ လမ်း၊ ဗိုလ်ချုပ်အောင်ဆန်းလမ်းတလျှောက်ရှိ ​နေအိမ်များကို အုတ်ခဲများနှင့်ပစ်​ပေါက်ပြီး ဆဲဆိုကာ လမ်းအတွင်း၌ ရပ်ထားသော အိမ်စီးကားမှန်များကို ရိုက်ခွဲ၍ အချို့ကားများပေါ်၌ ရုန့်ရင်းကြမ်းတမ်းစွာ ဆဲဆိုထားသည့် စကားလုံးများအား မှုတ်ဆေးဖြင့် ရေးသွားခဲ့သည်ဟု သိရှိရ သည်။ အဆိုပါ လုပ်ရပ်များကြောင့် ၎င်းတို့၏ တရားဥပဒေမဲ့ ဆိုးသွမ်းမှုများကို ပို၍ သိသာထင်ရှားစေပြီး ဥပဒေစိုးမိုးရေး ကင်းမဲ့စေရန်သာ ရည်ရွယ်ချက်ရှိရှိ ဖန်းတီးနေသည်ဟု သုံးသပ်ရပါသည်။
ကချင်ပြည်နယ်တွင်လည်း တိုက်ပွဲများ ပြင်းထန်ဆဲဖြစ်ပြီး ကချင်ပြည်နယ်၊ မိုး​မောက်မြို့နယ်၊ ကုန်း​လော​ကျေးရွာအနီးတွင် အကြမ်းဖက် စစ်ရဟတ်ယာဉ် တစ်စီးကို ကချင်လွတ်မြောက်ရေးတပ်မတော် (KIA) မှ ယနေ့ (မေ ၃) တွင် ပစ်ချခဲ့ပြီးနောက် ယနေ့ မွန်းလွဲပိုင်းတွင် စစ်အုပ်စုမှ ကုန်း​လောကျေးရွာသို့ လက်နက်ကြီးဖြင့် လက်တုံ့ပြန် ရမ်းကားပစ်ခတ်ခဲ့၍ သံဃာတော် တစ်ပါး ပျံလွန်တော်မူခဲ့ပြီး ဒေသခံ ၁ဝ ဦးဒဏ်ရာရရှိခဲ့သည်ဟု သိရှိရသည်။
အာဏာသိမ်းမှု ရက်ကြာလာသည်နှင့်အမျှ မြို့ပြဒေသများ၌လည်းကောင်း၊ နယ်ဒေသများ၌လည်းကောင်း အကြမ်းဖက် စစ်အုပ်စု၏ ရက်စက် ရမ်းကားသည့် လုပ်ရပ်များသည် တနေ့ထက် တနေ့ ပို၍ ပြင်းထန် ဆိုးရွားလာခဲ့သည်။ ထို့ပြင် ငြိမ်းချမ်းရေးလမ်းစ ပျောက်ဆုံးကာ တကျော့ပြန် တိုက်ပွဲများကြောင့် တိုင်းရင်းသားဒေသများရှိ တိုင်းရင်းသားများသည် လည်း စစ်ဘေးဒုက္ခများကို တဖန်ပြန်၍ ရင်ဆိုင် ခံစားနေကြရပြီဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

ကျဆုံးသူများစာရင်းဒေါင်းလော့ရယူရန် Fatality List for May 3, 2021 (Bur) (Updated)
မတရားဖမ်းဆီးထိန်းသိမ်းခံထားရသူများစာရင်းဒေါင်းလော့ရယူရန်Under Detention List_Burmese (3-May-2021)
ပြန်လည်လွတ်မြောက်လာသူများစာရင်းဒေါင်းလော့ရယူရန် Release Lists_Burmese (3-May-2021)