စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ မေလ ၂ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ကျဆုံးသွားခဲ့သည့် ရှမ်းပြည်နယ်၊ သီပေါမြို့ နှင့် နောင်ချိုမြို့၊ ကချင်ပြည်နယ်၊ ဖားကန့်မြို့၊ စစ်ကိုင်းတိုင်းဒေသကြီး၊ ဝက်လက်မြို့တို့မှ အပြစ်မဲ့ ပြည်သူ (၅) ဦးနှင့် ယမန်နေ့က ကျဆုံးသွားခဲ့သည့် ရှမ်းပြည်နယ်၊ ကွတ်ခိုင်မြို့မှ အပြစ်မဲ့ ပြည်သူ (၁) ဦးတို့၏ အချက်အလက်များကို ကောက်ယူရရှိနိုင်ခဲ့ပါသည်။ ကျဆုံးသူအရေအတွက်မှာ တိုးလာနေဆဲဖြစ်ပြီး ကျဆုံးသူများ၏ အချက်အလက်များကို ထပ်မံကောက်ယူရရှိလာပါက ဆက်လက်ထည့်သွင်း ဖော်ပြပေးသွားမည်ဖြစ်သည်။
ထို့ပြင် ယမန်နေ့က ကျဆုံးသွားခဲ့ကြသည့် အရပ်သားပြည်သူ (၁) ဦး၏ အချက်အလက်များကို ထပ်မံ ရရှိသည့်အတွက် ယမန်နေ့အထိ ကျဆုံးသွားခဲ့သူ (၇၆၀) ဦးရှိခဲ့ပြီး ယနေ့တွင် အပြစ်မဲ့ ပြည်သူ (၅) ဦး ကျဆုံးခဲ့ရာ စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ယနေ့အထိ ကျဆုံးခဲ့ရသူစုစုပေါင်း (၇၆၅) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူရရှိထားသည့် အရေအတွက်ဖြစ်ပြီး အမှန်တကယ် ကျဆုံးသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံကောက်ယူ ရရှိလာပါကလည်း ဆက်လက် ဖော်ပြ ပေးသွားပါမည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ မေလ ၂ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၅၅၅) ဦးရှိပြီး ၎င်းတို့အနက်မှ (၈၂) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၃၉၆) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက်မှ (၂၀) ဦးမှာ မျက်ကွယ် သေဒဏ်နှင့် (၁၄) ဦးမှာ အလုပ်ကြမ်း နှင့် ထောင်ဒဏ် သုံးနှစ်စီ မျက်ကွယ် ထောင်ဒဏ်ချမှတ်ခြင်းခံထားရကာ လက်ရှိတွင် တိမ်းရှောင်နေဆဲ ဖြစ်သည်။ ပြန်လည် လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြု ရန် လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
ယနေ့ (မေလ ၂) ကမာ္ဘလုံးဆိုင်ရာ မြန်မာ့နွေဦးတော်လှန်ရေးနေ့၌ မြန်မာနိုင်ငံအပါအဝင် နိုင်ငံတကာမှ အာဏာသိမ်း စစ်အုပ်စုကို ဆန့်ကျင်ကြောင်း အင်တိုက်အားတိုက် ဆန္ဒထုတ်ဖော်ခဲ့ကြသည်။ မြန်မာ့အရေးနှင့်ပတ်သက်၍ အာဆီယံ ထိပ်သီးအစည်းအဝေးပြီးဆုံးပြီးနောက် အာဏာသိမ်းစစ်အုပ်စုသည် အကြမ်းဖက်မှုများကို နေ့စဉ်ရက်ဆက် ကျူးလွန်လျက် ရှိပြီး ယနေ့တွင် အပြင်းထန်ဆုံး ဖြိုခွင်းခဲ့ခြင်းဖြစ်ကာ တစ်ရက်အတွင်း ငါးဦးထက်မနည်း ကျဆုံးခဲ့သည်ဟု ကနဦး သိရှိရ သည်။ ထို့ပြင် ဖမ်းဆီးမှုများကိုလည်း အရှိန်မြင့်၍ လုပ်ဆောင်လာလျက်ရှိသည်ကို တွေ့ရှိရသည်။
ယနေ့တွင် ရှမ်းပြည်နယ်၊ သီပေါမြို့ နှင့် နောင်ချိုမြို့တို့၌ စစ်အာဏာရှင်ဆန့်ကျင်ရေး သပိတ်စစ်ကြောင်းများကို အကြမ်းဖက် ပစ်ခတ် ဖြိုခွင်းခဲ့၍ ပြည်သူ နှစ်ဦး ကျဆုံးသွားခဲ့ပြီး သုံးဦး ​ဒဏ်ရာရရှိခဲ့သည်ဟု ကနဦး သိရှိရသည်။ ကချင်ပြည်နယ်၌လည်း ဖားကန့်သပိတ်စစ်ကြောင်းကို သေနတ်၊ မိုင်း၊ လက်ပစ်ဗုံးတို့ အသုံးပြု၍ ပစ်ခတ်ဖြိုခွင်းခဲ့ သောကြောင့် ပြည်သူ တစ်ဦး ကျည်ထိမှန်ကာ ကျဆုံးသွားခဲ့သည်။ ထို့ပြင် အပြင်းအထန် ဒဏ်ရာရရှိသူများအပါအဝင် ၂ဝ ဦးကျော် ဒဏ်ရာရရှိခဲ့ပြီး ၎င်းတို့ကို စစ်တပ် နှင့် ရဲတို့မှ လိုက်လံဖမ်းဆီးနေသဖြင့် ထွက်ပြေး တိမ်းရှောင်နေကြရသည်။ အဆိုပါ ဒဏ်ရာရရှိပြီး ထွက်ပြေးတိမ်းရှောင်နေကြရသူများ၏ ဆေးကုသခွင့်နှင့်ပတ်သက်၍လည်း အထူးစိုးရိမ်ဖွယ်ရာ အခြေအနေဖြစ်နေသည်။ ထို့ပြင် ပြည်သူ ၁ဝ ဦးကျော်အား အိမ်တံခါးများကို ရိုက်ဖွင့်၍ ဖမ်းဆီးသွားခဲ့သည်ဟု သိရှိရသည်။ စစ်ကိုင်းတိုင်းဒေသကြီး၊ ဝက်လက်မြို့၌လည်း အထွေထွေသပိတ်စတင်ရန် လူစုနေချိန် ပစ်ခတ်ဖြိုခွင်းခြင်း ခံခဲ့ရပြီး အမျိုးသား နှစ်ဦး ကျည်ထိမှန်၍ ကျဆုံးခဲ့ကာ ရှစ်ဦး ဒဏ်ရာရရှိခဲ့သည်ဟု သိရှိရသည်။
ထို့ပြင် အကြမ်းဖက် စစ်အုပ်စုသည် အရပ်သားပြည်သူများ အလွယ်တကူ သတိထားမိခြင်းမရှိစေရန် အရပ်ဝတ်များ ဝတ်ဆင်၍ လက်နက်များကိုင်ဆောင်ကာ ပစ်ခတ်ဖြိုခွင်းခြင်း၊ ဖမ်းဆီးခြင်းများ ပြုလုပ်လာသည်ကို တွေ့ရှိလာရသည်။ ယနေ့တွင် မန္တလေးမြို့၌ ခြုံခို၍ ပစ်ခတ်ခဲ့သောကြောင့် ပြည်သူ နှစ်ဦး ကျဆုံးသွားခဲ့ပြီး လူငယ် ငါးဦးထက်မနည်း ဖမ်းဆီးခြင်းခံခဲ့ရသည်ဟု ကနဦး သိရှိရကာ အတည်ပြုနိုင်ရန်အတွက် ဆက်လက် စုံစမ်းနေဆဲဖြစ်သည်။
ယမန်နေ့ (မေ ၁) တွင် ရှမ်းပြည်နယ်၊ ကွတ်ခိုင်မြို့၊ အိမ်ဖြူတော် ကားအပိုပစ္စည်းဆိုင်၌ ဆိုင်ပိတ်ထားပြီး (အစ္စလမ်ဘာသာ) ဝါဖြေပြီးခါစအချိန်တွင် ကားတာယာလာဝယ်သည်ကို ကျဆုံးသူ၏ မိခင်ဖြစ်သူမှ ဆိုင်ပိတ်၍ မရောင်းတော့ကြောင်း ပြောဆိုခဲ့ရာ မိခင်ဖြစ်သူကို ကားပေါ်ဆွဲတင်ခဲ့သောကြောင့် ကျဆုံးအမျိုးသားမှ ဝင်ရောက်ပြောဆိုရာမှ စကားများကြပြီး အဆိုပါ အမျိုးသား၏ ရင်ဘတ်တည့်တည့်ကို သေနတ်ဖြင့် နှစ်ချက်တိတိပစ်ခတ်ခဲ့သောကြောင့် ကျဆုံးသွားခဲ့သည်။
၎င်းပြင် ယနေ့တွင် ကချင်ပြည်နယ်၊ မိုးကောင်းမြို့၊ မွန်ပြည်နယ်၊ မော်လမြိုင်မြို့၊ မန္တလေးတိုင်းဒေသကြီး၊ မန္တလေးမြို့ နှင့် ပြည်ကြီးတံခွန်မြို့နယ်၊ စစ်ကိုင်းတိုင်းဒေသကြီး၊ မုံရွာမြို့၊ ရန်ကုန်တိုင်းဒေသကြီး၊ လှိုင်မြို့နယ်၊ အင်းစိန်မြို့နယ် နှင့် မြောက်ဥက္ကလာပမြို့နယ် တို့၌ ဆန္ဒထုတ်ဖော်သူများကို ပစ်ခတ် ဖြိုခွင်းမှုများ ပြုလုပ်ခဲ့ပြီး ပြည်သူတချို့ ဖမ်းဆီးခြင်း ခံခဲ့ရသည့်အပြင် ဒဏ်ရာရရှိသူ တချို့ရှိသည်ဟု သိရှိရသည်။
အရပ်ဝတ်များ ဝတ်ဆင်ကာ ဖမ်းဆီးခြင်း၊ အိမ်စီးကား၊ စစ်ကား၊ ဆိုင်ကယ်တို့ဖြင့်တိုက်ကာ ဖမ်းဆီးခြင်း၊ ဖြိုခွင်းခြင်းတို့ကို အာဏာသိမ်း အကြမ်းဖက်အုပ်စုမှ ရက်ဆက်ဆိုသလို လုပ်ဆောင်လျက်ရှိသည်။ ယနေ့တွင် ရှမ်းပြည်နယ်၊ ​နောင်ချိုမြို့နယ်၊ စစ်ကိုင်းတိုင်းဒေသကြီး၊ ရွှေဘိုမြို့ နှင့် ကရင်ပြည်နယ်၊ အိန္ဒုမြို့တို့၌ သပိတ်စစ်ကြောင်းများကို စစ်ကား၊ အိမ်စီးကားများ ဖြင့်တိုက်ကာ ပစ်ခတ် ဖြိုခွင်းခဲ့သည်ဟု သိရှိရသည်။ အိန္ဒုသပိတ်စစ်ကြောင်း၌ လူငယ်များ၏ ဆိုင်ကယ် အစီး ၅ဝ ကျော်ကို သိမ်းဆည်းသွားခဲ့သည်ဟု သိရှိရသည်။
အကြမ်းဖက် စစ်အုပ်စုသည် ယခင်လ (ဧပြီ) က ရန်ကုန်မြို့ရှိ ခဝဲခြံ မျက်မမြင်ကျောင်းကို ဝင်ရောက် စီးနင်း၍ တပ်စွဲထား ခဲ့ပြီးနောက် ယမန်နေ့ (မေလ ၁) ညအချိန်တွင် ရန်ကုန်တိုင်းဒေသကြီး၊ တာမွေမြို့နယ်၊ ဗျိုင်းရေအိုးစင်လမ်းအတွင်းရှိ မိဘမဲ့ အမျိုးသမီးငယ်များ စောင့်ရှောက်ရေးဂေဟာကို ဝင်ရောက် စီးနင်းခဲ့သည်။ ထိုကဲ့သို့ စီးနင်းရာတွင် ဂေဟာတံခါးကို ဖျက်ဆီးကာ ဝင်ရောက်ခဲ့ခြင်းဖြစ်ပြီး ဂေဟာတွင် နေထိုင်သည့် အမျိုးသမီးငယ်များကို တစ်ဦးချင်းစီ ခေါ်‌ထုတ်နေသည်ဟု သိရှိရကာ ဖမ်းဆီးခံရခြင်း ရှိ၊ မရှိ နှင့်ပတ်သက်၍ သီးခြား အတည်ပြုရချက် မရရှိသေးပါ။ မြန်မာနိုင်ငံသည် အမျိုးသမီးများအား နည်းမျိုးစုံဖြင့် ခွဲခြားဆက်ဆံမှု ပပျောက်ရေး သဘောတူစာချုပ် (CEDAW) ကို လက်မှတ် ရေးထိုး အတည်ပြုခဲ့သည့် နိုင်ငံဖြစ်သော်လည်း စစ်အာဏာရှင်တို့လက်အောက်တွင် အဆိုပါအခွင့်အရေးများမှာ ဆုံးရှုံးနေကြရပြီ ဖြစ်ပြီး အမျိုးသမီးများမှာ စိတ်ပိုင်း နှင့် ရုပ်ပိုင်းဆိုင်ရာ မလုံခြုံမှုများကို ခံစားနေကြရပြီဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

ကျဆုံးသူများစာရင်းဒေါင်းလော့ရယူရန် Fatality List for May 1, 2021 (Bur) (Updated)
မတရားဖမ်းဆီးထိန်းသိမ်းခံထားရသူများစာရင်း Under Detention List_Burmese (2-May-2021)
ပြန်လည်လွတ်မြောက်လာသူများစာရင်း ဒေါင်းလော့ရယူရန် Release Lists_Burmese (2-May-2021)