စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ ဧပြီလ ၂၅ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ယမန်နေ့များက ကျဆုံးသွားခဲ့သည့် မန္တလေးတိုင်းဒေသကြီး၊ မန္တလေးမြို့၊ မကွေးတိုင်းဒေသကြီး၊ ရေစကြိုမြို့ နှင့် စစ်ကိုင်းတိုင်းဒေသကြီး၊ မြောင်မြို့နယ် တို့မှ အပြစ်မဲ့ ပြည်သူ (၃) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ကြောင့် ယမန်နေ့အထိ ကျဆုံးသွားခဲ့သူ (၇၅၁) ဦးရှိခဲ့သည်။ ယနေ့တွင် ကျဆုံးသွားခဲ့သူများကို အတည်ပြုနိုင်ခြင်း မရှိသေးသည့် အတွက် စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယနေ့အထိ (၇၅၁) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက် ဖြစ်ပြီး အမှန်တကယ် ကျဆုံးသွားသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံ ကောက်ယူ ရရှိလာပါကလည်း ဆက်လက် ထည့်သွင်း ဖော်ပြပေးသွား မည်ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ ဧပြီလ ၂၅ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၄၃၁) ဦးရှိပြီး ၎င်းတို့အနက်မှ (၇၉) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၁၅၉) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက်မှ (၂၀) ဦးမှာ မျက်ကွယ် သေဒဏ်နှင့် (၁၄) ဦးမှာ အလုပ်ကြမ်း နှင့် ထောင်ဒဏ် သုံးနှစ်စီ မျက်ကွယ် ထောင်ဒဏ်ချမှတ်ခြင်းခံထားရကာ လက်ရှိတွင် တိမ်းရှောင်နေဆဲ ဖြစ်သည်။ ပြန်လည် လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြု ရန် လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
ယနေ့ (ဧပြီ ၂၅) တွင် မြန်မာနိုင်ငံတဝှမ်းလုံးရှိ ပြည်သူများသည် တင်းကြပ်သည့် အမျိုးမျိုးသော ဖိနှိပ်မှုများကြားမှ စစ်အာဏာရှင်ကို ဆက်လက် ဆန့်ကျင် ဆန္ဒထုတ်ဖော်ခဲ့ကြသည်။ “အကြမ်းဖက်မှုများကို ချက်ချင်းရပ်တန့်ရန်” ဆိုသည့် အာဆီယံထိပ်သီးအစည်းအဝေးမှ ထုတ်ပြန်သည့် ဘုံသဘောတူညီချက်သည် ရှင်းလင်းပြတ်သားမှုမရှိဘဲ ယျေဘုယျဆန် သော ထုတ်ပြန်ချက်မျှသာဖြစ်သည်။ အစည်းအဝေးတွင် ဆွေးနွေး၊ တောင်းဆို၊ အကြုံမှုများ အတိုင်းအတာ တစ်ခုအထိ အားကောင်းခဲ့သော်လည်း ထုတ်ပြန်ချက်တွင်ပါရှိသည့် အခြားသော အချက်များသည်လည်း ဝေဝါးပြီး ပြည်သူများ လိုလားတောင်းဆိုနေသည့် လူ့အခွင့်အရေး၊ ဒီမိုကရေစီရေးနှင့် ငြိမ်းချမ်းရေးတို့ကို မျက်ကွယ်ပြုထားသည့် ဘုံသဘောတူညီချက်များသာ ဖြစ်ကြောင်း တွေ့ရှိရသည်။ ယနေ့ ပြည်သူများက နိုင်ငံတကာသို့ တောင်းဆိုနေသည်မှာ လူသားချင်းစာနာသည့် အကူအညီများမဟုတ်ဘဲ အမှန်တရားဘက်မှ နိုင်ငံရေးအရ ရပ်တည်ပေးရန်ပင်ဖြစ်သည်။
ထိုထုတ်ပြန်ကြေညာချက်သည် လက်နက်မဲ့ ပြည်သူလူထုအား လက်နက် ကြီး/ငယ်ဖြင့် အကြမ်းဖက်မှုများ နေ့စဉ် ကျူးလွန်နေသည့် စစ်အုပ်စုအား ထိရောက်သည့် တားဆီးမှု မပြုနိုင်ခဲ့ပေ။
ယမန်နေ့ (ဧပြီ ၂၄) အာဆီယံ ထိပ်သီး အစည်းအဝေးပြီးဆုံးသည့် ညတွင်ပင်လျှင် အကြမ်းဖက် စစ်အုပ်စု၏ လက်ပါးစေ ရဲ နှင့် စစ်သားများသည် အမျိုးသမီးများ အပါအဝင် ပြည်သူများအပေါ် လူ့ဂုဏ်သိက္ခာ၊ လူ့ကျင့်ဝတ်နှင့်မညီဘဲ လူ့အခွင့်အရေးချိုးဖောက်မှုများကို လူမြင်ကွင်း၌ မရှောင် ကျူးလွန်ခဲ့သည်။
ယမန်နေ့ ညအချိန်က ရန်ကုန်မြို့၊ မရမ်းကုန်းမြို့နယ်တွင် သံပုံးတီးသူများကို အိမ်ပေါ်ထိ လိုက်လံဖမ်းဆီးကာ လမ်းမထက်၌ သံပုံးတီးခိုင်းပြီး အမျိုးသမီးတချို့ကို ကခိုင်း၍ ၎င်းတို့မှ ဝိုင်းကြည့်ကာ လှောင်ရီခဲ့သည်။ သံပုံးတီးခြင်းကို ရပ်လျှင် ဆဲဆိုရိုက်နှက်ခဲ့သည်။ ထို့ပြင် သံပုံးတီးသည့် အိမ်များကို ခဲများဖြင့်ပစ်ခြင်း၊ အသက် ငယ်ရွယ်သည့် အမျိုးသားများကို နှိပ်စက်ခြင်းများပြုလုပ်ပြီး ကားအပြည့်ဖမ်းဆီးသွားသည်ဟု သိရှိရသည်။ လူမြင်ကွင်းရှေ့တွင် အမျိုးသမီးများကို ကာယအိန္ဒြေပျက်ပြားအောင် လက်နက်အားကိုး၍ အတင်းအကျပ်ခိုင်းစေခြင်း၊ ပြည်သူများအပေါ် ရန်သူသဖွယ် အငြိုးထား ၍ ပြုမူဆက်ဆံခြင်းသည် ရက်စက် ယုတ်မာသော လုပ်ရပ်ဖြစ်ပြီး တရားမဲ့လုပ်ရပ်များကို အတားအဆီးမရှိ ကျူးလွန်လျက် ရှိသည်။
ယမန်နေ့ (ဧပြီ ၂၄) တွင် ကရင်ပြည်နယ်၊ ဘုရားသုံးဆူမြို့တွင် ဆိုင်ကယ်သပိတ်စစ်ကြောင်းအား သေနတ် ခြောက်ချက်ပစ်ဖောက်ပြီး ကားဖြင့်တိုက်ကာ ဖြိုခွင်းခဲ့သည်။ ထို့ပြင် သပိတ်စစ်ကြောင်းတွင် ပါဝင်သည့် ပြည်သူ ငါးဦးအား ကားဖြင့် နောက်မှ ဝင်တိုက်ကာ ဖမ်းဆီးခဲ့၍ အမျိုးသမီး တစ်ဦး ဆိုးရွားစွာ ထိခိုက် ဒဏ်ရာရရှိခဲ့သည်။
စစ်ကိုင်းတိုင်းဒေသကြီး၊ ယင်းမာပင်မြို့နယ်၊ သပြေအေးကျေးရွာ၌ သပြေအေးကျောင်း ဆရာတော်ကို ဖမ်းဆီးရန် ယမန်နေ့ နေ့လယ်ပိုင်းတွင် သပြေအေးကျောင်းတိုက်ကို အင်အားအလုံးအရင်းဖြင့် ဝင်ရောက် စီးနင်း၍ ကျောင်းဆောင် တစ်ဆောင် ကို ဖျက်ဆီးကာ လက်ကိုင်ကွန်ပျူတာ အလုံး ၂ဝ ကို ယူဆောင်သွားခဲ့သည်။ အကြမ်းဖက် စစ်အုပ်စုသည် ၎င်းတို့၏ လက်ပါးစေ ရဲ နှင့် စစ်သားများက လုယက်မှုများကို ပေါ်ပေါ်တင်တင် ကျူးလွန်လျက်ရှိသော်လည်း မျက်ကွယ်ပြု၍ ၎င်းတို့ အာဏာတည်မြဲရေးအတွက် ပြည်တွင်းရေး မငြိမ်မသက်ဖြစ်စေရန်သာ ဖန်တီးလျက်ရှိသည်။
ဧပြီလ ၂၄ ရက်နေ့ ညနေပိုင်း၌ စစ်ကိုင်းတိုင်းဒေသကြီး၊ မြောင်မြို့တွင် အမျိုးသမီး တစ်ဦးသည် ဖမ်းဆီးခြင်းခံခဲ့ရပြီးနောက် မိနစ်ပိုင်းအကြာ၌ သေဆုံးသွားခဲ့သည်။ ရောဂါအခံကြောင့် သေဆုံးသွားသည်ဟုဆိုသော်လည်း အပြစ်မဲ့ အရပ်သားများကို လက်လွတ်စပယ် ဖမ်းဆီးခြင်းကြောင့်သာ မလိုလားအပ်သော ဆိုးကျိုးများဖြစ်ပေါ်လာခြင်းဖြစ်သည်။
အကြမ်းဖက် စစ်အုပ်စု၏ ရမ်းကား ရက်စက်မှုများကြောင့် ပြည်သူများမှာ နေ့စဉ်နှင့်အမျှ အလွန်အမင်း ထိခိုက် ဆုံးရှုံးမှု များကို ရင်ဆိုင်ခဲ့ကြရပြီး ဖြစ်သည်။ သို့ဖြစ်၍ အကြမ်းဖက် စစ်အုပ်စု နှင့် ပြည်သူများကြား စေ့စပ်၍ ရနိုင်တော့မည့် အခြေအနေသည် ဖြစ်ပေါ်လာနိုင်တော့မည် မဟုတ်ပါ။ စေ့စပ် ညှိနှိုင်ရေးလမ်းစဉ်သည် စစ်အုပ်စု၏ အာဏာ သက်ဆိုးရှည်ရေးကို တဘက်လှည့်ဖြင့် ပံ့ပိုးပေးစေနိုင်သည်။ ထို့ကြောင့် လျစ်လျူရှုခံ ပြည်သူများ ယခုထက်ပို၍ နစ်နာ ဆုံးရှုံးမှုများ မရှိစေရေးအတွက် ထိရောက်သော အရေးယူမှုများကို အမြန်ဆုံး လုပ်ဆောင်ရန် လိုအပ်လျက်ရှိ သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

ကျဆုံးသူများစာရင်းဒေါင်းလော့ရယူရန် Fatality List for April 25, 2021 (Burmese)
မတရားဖမ်းဆီးထိန်းသိမ်းခရသူများစာရင်းဒေါင်းလော့ရယူရန် Under Detention List_Burmese (25-Apr-2021)
ပြန်လည်လွတ်မြောက်သူများစာရင်းဒေါင်းရန်Release Lists_Burmese (25-Apr-2021)