စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ ဧပြီလ ၂၃ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ယမန်နေ့များက ကျဆုံးသွားခဲ့သည့် မန္တလေးတိုင်းဒေသကြီး၊ မိုးကုတ်မြို့မှ အပြစ်မဲ့ ပြည်သူ (၄) ဦး နှင့် မကွေးတိုင်း ဒေသကြီး၊ ပခုက္ကူမြို့မှ အပြစ်မဲ့ ပြည်သူ (၁) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ကြောင့် ယမန်နေ့အထိ ကျဆုံးသွားခဲ့သူ (၇၄၅) ဦးရှိခဲ့သည်။ ယနေ့တွင် ကျဆုံးသွားခဲ့သူများကို အတည်ပြုနိုင်ခြင်းမရှိသေးသည့် အတွက် စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယနေ့အထိ (၇၄၅)ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက် ဖြစ်ပြီး အမှန်တကယ် ကျဆုံးသွားသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံ ကောက်ယူ ရရှိလာပါကလည်း ဆက်လက် ထည့်သွင်း ဖော်ပြပေးသွား မည်ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ ဧပြီလ ၂၃ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၃၇၁) ဦးရှိပြီး ၎င်းတို့အနက်မှ (၇၉) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၁၁၈) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက်မှ (၂၀) ဦးမှာ မျက်ကွယ် သေဒဏ်နှင့် (၁၄) ဦးမှာ အလုပ်ကြမ်း နှင့် ထောင်ဒဏ် သုံးနှစ်စီ မျက်ကွယ် ထောင်ဒဏ်ချမှတ်ခြင်းခံထားရကာ လက်ရှိတွင် တိမ်းရှောင်နေဆဲ ဖြစ်သည်။ ပြန်လည် လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြု ရန် လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
အကြမ်းဖက်စစ်အုပ်စုသည် ၎င်းတို့ကို ဆန့်ကျင်သူများအား ရက်စက်စွာ ညှဉ်းပန်း၍ ပြင်းပြင်းထန်ထန် ဖိနှိပ်လျက်ရှိရာ ယခုအခါ အမျိုးသမီးများအပေါ်တွင်လည်း ပစ်မှတ်ထားလာပြီဖြစ်သည်။ အကြမ်းဖက်စစ်အုပ်စုသည် အမျိုးသမီးများ အပေါ် လိင်ပိုင်းဆိုင်ရာ ထိပါး နှောင့်ယှက်ခြင်း၊ အကြမ်းဖက်၍ ပြင်းထန်စွာ ညှဉ်းပန်း နှိပ်စက်ခြင်း (စိတ်ပိုင်း နှင့် ရုပ်ပိုင်း) တို့ကို ရည်ရွယ်ချက်ရှိရှိ ကျူးလွန်လျက်ရှိသည်ကို တွေ့ရှိလာရသည်။
ရန်ကုန်တိုင်းဒေသကြီး၊ စမ်းချောင်းမြို့နယ်၌ ဖမ်းဆီးခြင်းခံခဲ့ရပြီး ရွှေပြည်သာစစ်ကြောရေးစခန်းမှ ပြန်လည် လွတ်မြောက် လာခဲ့သော အသက် ၁ရ နှစ်အရွယ် မိန်းကလေး တစ်ဦးမှ စမ်းချောင်း အမှတ် ၂၄ ရဲစခန်းတွင် ရဲတပ်သား တစ်ဦးမှ ၎င်းအား နှုတ်ဖြင့် ထိကပါး၊ ရိကပါး ပြောဆိုခဲ့သည်သာမက ပုခုံးအား ပုတ်ခြင်း၊ သေနတ်ပြ၍ ခြိမ်းခြောက်အော်ဟစ်ခြင်းတို့ဖြင့် ကြမ်းကြမ်းတမ်းတမ်း ပြုမူခဲ့ကြောင်း၊ ရွှေပြည်သာစစ်ကြောရေးစခန်း၌ ရန်ကင်းမြို့နယ် ဗုံးပေါက်ကွဲမှုနှင့်ဆက်စပ်၍ ဖမ်းဆီးခြင်းခံထားရသော အမျိုးသမီး နှစ်ဦးသည် ပြင်းထန်စွာ ရိုက်နှက် နှိပ်စက်ခြင်းခံထားရကြောင်း၊ အမျိုးသမီးတစ်ဦးကို မူ ပို၍ ဆိုးရွားစွာ ညှဉ်းပန်းနှိပ်စက်ထားပြီး ရက်စက်စွာ ကန်ကျောက်၍ သံပိုက်ဖြင့် ရိုက်နှက်ခြင်း၊ ပုခုံးပေါ်ကို တက်ခွ၍ ဆံပင်ဆွဲခြင်း၊ နှုတ်ဖြင့် လိင်ပိုင်းဆိုင်ရာ စော်ကားသည်သာမက လိင်အင်္ဂါကိုလည်း ပြင်းထန်စွာ ရိုက်နှက် နှိပ်စက်ကြောင်း၊ ဆေးကုသခံယူခွင့်လည်း မပေးကြောင်း စသည်တို့ကို ပြန်လည် ပြောကြားခဲ့သည်ဟု သိရှိရသည်။
ထိုအခြင်းအရာများသည် အလွန်အမင်း ပြင်းထန် ရက်စက်သော လူ့အခွင့်အရေးချိုးဖောက်မှု နှင့် ရာဇဝတ်မှုများဖြစ်ပြီး အကြမ်းဖက်စစ်အုပ်စု၏ အမျိုးသမီးများအပေါ် လူမဆန်၍ ကြမ်းတမ်းရက်စက်မှုကို ဖော်ပြလျက်ရှိသည်။ စစ်ဆေး မေးမြန်းချိန်၌လည်း အမျိုးသမီး ရဲမေများမှ မစစ်ဆေးဘဲ အများအားဖြင့် စစ်သားများကသာ စစ်ဆေး မေးမြန်း၍ ရိုက်နှက်ခဲ့ကြသည်။ ညှဉ်းပန်းနှိပ်စက်ပြီးနောက် ဆေးကုသခံယူခွင့်မပေးခြင်းကလည်း အသက်အန္တရာယ် ခြိမ်းခြောက်မှုကို ဖြစ်စေသည်။ ထို့ပြင် စစ်ကြောရေး၌ စစ်သားများကသာ စောင့်ကြပ်ခြင်းကြောင့် အမျိုးသမီးများအတွက် စိတ်ပိုင်း နှင့် ရုပ်ပိုင်းဆိုင်ရာ မလုံခြုံမှုကို ဖြစ်စေပြီး အချိန်မရွေး လိင်ပိုင်းဆိုင်ရာ ထိပါးနှောင့်ယှက်မှုများလည်း ဖြစ်ပေါ်စေနိုင်သည်။ မြန်မာနိုင်ငံသည် အမျိုးသမီးများအား နည်းမျိုးစုံဖြင့် ခွဲခြားဆက်ဆံမှု ပပျောက်ရေး သဘောတူစာချုပ် (CEDAW) ကို အတည်ပြု လက်မှတ် ရေးထိုးပြီးသည့် နိုင်ငံဖြစ်သည့်အလျှောက် ကမာ္ဘ့ကုလသမဂ္ဂ အမျိုးသမီးအဖွဲ့အစည်း၊ လူ့အခွင့်အရေးအဖွဲ့အစည်းများ အပါအဝင် ကမာ္ဘ့အသိုင်းအဝိုင်းမှ လျစ်လျူရှူ မနေသင့်ဘဲ ထိရောက်သော အရေးယူဆောင်ရွက်မှုများကို လုပ်ဆောင်ကြပါရန် တိုက်တွန်းအပ်ပါသည်။
ပဲခူးတိုင်း​ဒေသကြီး၊ ပန်းတောင်းမြို့နယ်ရှိ ပန်းတောင်းရဲကင်းမီးရှို့ခံရခြင်းနှင့်ပတ်သက်ပြီး ဧပြီလ ၂၂ ရက်နေ့ နံနက် အစောပိုင်းအချိန်၌ အသက် နှစ်နှစ်ခွဲအရွယ် ကလေး တစ်ဦးအပါအဝင် ကလေး၏ အဖေ နှင့် အဖိုးဖြစ်သူကို ဖမ်းဆီးသွား ကာ ကလေး၏ရှေ့၌ နှိပ်စက်၍ မေးခြင်းခြင်းကြောင့် ကလေးအား သနား၍ ဝန်ခံခဲ့ရပြီး ကလေးပြန်လာခေါ်သော မိခင်ဖြစ်သူအားလည်း ကြံရာပါအဖြစ် ဖမ်းဆီးသွားခဲ့သည်။ ထိုဖြစ်စဉ်နှင့်ပတ်သက်၍ ရွာသား တချို့ကိုလည်း ဖမ်းဆီး ၍ မတရား ညှဉ်းပန်းနှိပ်စက်သောကြောင့် ဝန်ခံခဲ့ရသည်ဟု သိရှိရသည်။
ဧပြီလ ၂၂ ရက်နေ့တွင် စစ်ကိုင်းတိုင်းဒေသကြီး၊ တမူးမြို့၌ ကမော္ဘဇဘဏ်ဝန်ထမ်း အမျိုးသား တစ်ဦးကို နောက်ယောင်ခံ လိုက်ပြီး တဲအတွင်း၌ စကားပြောစက် လေးလုံး တွေ့ရှိ၍ ဦးခေါင်းကို ပြင်းပြင်းထန်ထန်ရိုက်နှက်ခြင်း၊ လက်အရိုးများ ထွက်သည်အထိ ရိုက်စစ်ခြင်းကြောင့် သွေးအလွန်အကျွံ ထွက်သည့်အပြင် ခန္ဓာကိုယ်ပေါ်တွင် အဝတ်အစား ပေးမဝတ်ဘဲ အတွင်းခံတစ်ခုသာ ဝတ်ခိုင်းထားသည်ဟု သိရှိရသည်။ ထိုအမျိုးသားသည် အသက်အန္တရာယ် စိုးရိမ်ရသော အခြေအနေရှိသည်ဟု သိရှိရသည်။
အကြမ်းဖက် စစ်အုပ်စုသည် ပြင်းထန်သော ညှဉ်းပန်းနှိပ်စက်မှုများကို ကျူးလွန်ခဲ့ကြပြီး ဖြစ်ပြီး ယခုအခါ ပို၍ ပြင်းထန် ဆိုးရွားလာသည်ကို တွေ့ရှိရသည်။ ကလေးငယ်များသည်လည်း ၎င်းတို့၏ အကြမ်းဖက်မှုများ၌ ဓားစာခံအဖြစ် အသုံးပြုခြင်းခံနေရပြီဖြစ်သည်။ ထိုသို့ အကြမ်းဖက် စစ်အုပ်စုက လူ့ဂုဏ်သိက္ခာ၊ လူ့ကျင့်ဝတ်များ ကင်းမဲ့ကာ တရားဥပဒေမဲ့ ကျူးလွန်ခြင်း၊ တရားဥပဒေ စိုးမိုးမှုမရှိအောင် ဖန်တီး ကျူးလွန်လျှက်ရှိခြင်းတို့ကြောင့် ကလေးသူငယ်၊ အမျိုးသမီးနှင့် သက်ကြီးရွယ်အိုများ အပါအဝင် ပြည်သူများမှာ အကူအညီမဲ့ကာ လုံခြုံမှုကင်းမဲ့လျက်ရှိသော အခြေအနေသို့ ရောက်ရှိနေပြီ ဖြစ်သည်။
ယနေ့ (ဧပြီ ၂၃) နံနက်အစောပိုင်းတွင် ကယားပြည်နယ်၊ လွိုင်ကော်မြို့၊ ရှမ်းပိုင်းရပ်ကွက်တွင် အရုဏ်ဦးသပိတ်ကို ပစ်ခတ်ဖြိုခွဲစဉ် အမျိုးသားတစ်ဦးမှာ ဘီလူးချောင်းအတွင်း ခုန်ချထွက်ပြေးရာမှ ပျောက်ဆုံးသွားခဲ့သည်။ မကွေးတိုင်း ဒေသကြီး၊ သရက်မြို့၌လည်း အကြမ်းဖက်စစ်အုပ်စု၏ တပ်ဖွဲ့ နှင့် ပြည်သူများ အပြန်အလှန်ပစ်ခတ်မှု ဖြစ်ပွားခဲ့သည်။
ဧပြီလ ၂၄ ရက်နေ့တွင် ကျင်းပမည့် အာဆီယံထိပ်သီးအစည်းအဝေးသို့ အကြမ်းဖက် အာဏာသိမ်း စစ်ခေါင်းဆောင် လာရောက်ချိန်တွင် ဖမ်းဆီးပေးရန် အမျိုးသားညီညွတ်ရေးအစိုးရ (NUG) မှ အပြည်ပြည်ဆိုင်ရာ မှုခင်းရဲတပ်ဖွဲ့ (INTERPOL) အထွေထွေအတွင်းရေးမှူးထံသို့ အကြောင်းကြားစာပေးပို့ခဲ့သည်။ မြန်မာနိုင်ငံတွင်း ပြည်တွင်းရေးလွန်စွာ ဆိုးရွားအောင် ပြုလုပ်လျက်ရှိသော အဓိက တရားခံတစ်ဦးဖြစ်သည့် အကြမ်းဖက် စစ်ခေါင်းဆောင်ကို ဖမ်းဆီး အရေးယူနိုင်ရေးအတွက် နိုင်ငံတကာမှ အမြန်ဆုံး လုပ်ဆောင်ပါရန် တိုက်တွန်းအပ်ပါသည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”

Email :   info@aappb.org

Facebook : https://web.facebook.com/burmapoliticalprisoners/

Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

မတရားဖမ်းဆီးထိန်းသိမ်းခံထားရသူများစာရင်း Under Detention List_Burmese (23-Apr-2021)
ကျဆုံးသူများစာရင်းဒေါင်းလော့ယူရန် Fatality List for April 23, 2021 (Burmese)
လွတ်မြောက်သူများစာရင်း Release Lists_Burmese (23-Apr-2021)