စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ ဧပြီလ ၂၁ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ယမန်နေ့များက ကျဆုံးသွားခဲ့သည့် စစ်ကိုင်းတိုင်းဒေသကြီး၊ မြောင်မြို့နယ်မှ အပြစ်မဲ့ ပြည်သူ (၁) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ကြောင့် ယမန်နေ့အထိ ကျဆုံးသွားခဲ့သူ (၇၃၉) ဦးရှိခဲ့သည်။ ယနေ့တွင် ကျဆုံးသွားခဲ့သူများကို အတည်ပြုနိုင်ခြင်း မရှိသေးသည့်အတွက် စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယနေ့အထိ (၇၃၉) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက် ဖြစ်ပြီး အမှန်တကယ် ကျဆုံးသွားသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံ ကောက်ယူ ရရှိလာပါကလည်း ဆက်လက် ထည့်သွင်း ဖော်ပြပေးသွား မည်ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ ဧပြီလ ၂၁ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၃၃၁) ဦးရှိပြီး ၎င်းတို့အနက်မှ (၇၆) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၁၀၅၉) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက်မှ (၂၀) ဦးမှာ မျက်ကွယ် သေဒဏ်နှင့် (၁၄) ဦးမှာ အလုပ်ကြမ်း နှင့် ထောင်ဒဏ် သုံးနှစ်စီ မျက်ကွယ် ထောင်ဒဏ်ချမှတ်ခြင်းခံထားရကာ လက်ရှိတွင် တိမ်းရှောင်နေဆဲ ဖြစ်သည်။ ပြန်လည် လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြု ရန် လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
ဧပြီလ ၂၁ ရက်နေ့တွင် ကျရောက်သော သတင်းစာဆရာကြီး ဟံသာဝတီ ဦးဝင်းတင် ကွယ်လွန်ခြင်း (၇) နှစ်ပြည့် မြောက် သည့်နေ့၌ ဦးဝင်းတင်အား ဂုဏ်ပြုသောအားဖြင့် မြန်မာနိုင်ငံအတွင်းရှိ ဆန္ဒထုတ်ဖော်သူများအပါအဝင် ပြည်တွင်း၊ ပြည်ပရှိ အလွှာအသီးသီးမှ ပြည်သူများသည် အပြာရောင်အကျႌ ဝတ်ဆင်၍ နိုင်ငံရေးအကျဉ်းသားများကို ခြွင်းချက်မရှိ လွှတ်ပေးရေးအတွက် တောင်းဆိုခဲ့ကြသည်။ အာဏာသိမ်းပြီးသည့်နောက် နိုင်ငံရေးအကျဉ်းသားဦးရေ အဆမတန် မြင့်တက်လာခဲ့ပြီး ပျောက်ဆုံးသွားသူများ၊ ဝရမ်းထုတ်ခြင်းခံရ၍ ထွက်ပြေးတိမ်းရှောင်နေကြရသူများလည်း အများအပြား ရှိလာခဲ့ပြီး ဖြစ်သည်။ ထို့ကြောင့် စစ်အာဏာရှင်၏ အပြင်းအထန် ဖိနှိပ်မှုများအောက်၌ ထိန်းသိမ်း ချုပ်နှောင်ခြင်းခံထားရ သော နိုင်ငံရေးအကျဉ်းသားများ၏ အခြေအနေမှာ စိုးရိမ်ဖွယ်ရာဖြစ်ပြီး ၎င်းတို့ တရားဥပဒေရှေ့မှောက်၌ တန်းတူညီခွင့်၊ ဆေးကုခံယူခွင့်၊ ညှဉ်းပန်းနှိပ်စက်မှုမှ ကင်းလွတ်ခွင့် တို့ဆိုသည်မှာ မသေချာသော အခြေအနေဖြစ်သည်။ ထို့ကြောင့် အပြာရောင်ဝတ်ဆင်သည့် လှုပ်ရှားမှု (Blue Shirt Campaign) ပြုလုပ်သည့် ယနေ့တွင် မိမိတို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ နိုင်ငံရေးအကျဉ်းသားများကို အမြန်ဆုံးလွှတ်ပေးရန်အတွက် ဒေသတွင်း အာဆီယံ အပါအဝင် နိုင်ငံတကာအသိုင်းအဝိုင်းမှ နှောင့်နှေးမှုမရှိသော လုပ်ဆောင်မှုများဖြင့် အမြန်ဆုံး အကောင်အထည် ဖော်ပါရန် တိုက်တွန်းအပ်ပါသည်။
ယနေ့ (ဧပြီ ၂၁) တွင် တနင်္သာရီတိုင်းဒေသကြီး၊ ထားဝယ်မြို့သပိတ်စစ်ကြောင်းကို အသံဗုံးများ၊ ကျည်အစစ်များဖြင့် လိုက်လံပစ်ခတ်ဖြိုခွင်းခဲ့ပြီး အသက် ၁၆ နှစ်အရွယ် ကျောင်းသား တစ်ဦးအပါအဝင် ငါးဦးကို ရိုက်နှက် ဖမ်းဆီး ခေါ်ဆောင် သွားခဲ့သည်။ ထို့ပြင် ဖမ်းဆီးခြင်းခံရသူ ငါးဦးအနက် လူငယ် တစ်ဦးမှာ ကျည်ထိမှန် ဒဏ်ရာရရှိခဲ့သည်ဟု သိရှိရ၍ အချိန်မီ ဆေးကုသခံယူခွင့်ရရှိရန်မှာလည်း အလွန်အမင်း လိုအပ်လျက်ရှိသည်။ စစ်အာဏာရှင်တို့က ၎င်းတို့ကို ဆန့်ကျင်သူများကို အငြိုးထားခြင်းကြောင့် ဆေးကုသခွင့်ဆိုသည်မှာလည်း ကင်းမဲ့လျှက်ရှိပြီး ကျဆုံးသွားသူများ တိုးလာခဲ့ပြီ ဖြစ်သည်။
၎င်းပြင် တနင်္သာရီတိုင်းဒေသကြီး၊ လောင်းလုံးမြို့ ပင်မသပိတ်စစ်ကြောင်းအား ဖြိုခွင်းရန်ကြိုးစားခဲ့ပြီး ဖမ်းဆီးခံရခြင်း မရှိသော်လည်း ဆိုင်ကယ်နှစ်စီး သိမ်းဆည်းခြင်းခံခဲ့ရကြောင်း သိရှိရသည်။
ယမန်နေ့ (ဧပြီ ၂၀) တွင် စစ်ကိုင်းတိုင်းဒေသကြီး၊ ယင်းမာပင်မြို့နယ်ရှိ သီးကုန်းရွာနှင့် ကပိုင်ရွာအကြား၌ အကြမ်းဖက် စစ်အုပ်စု၏ တပ်ဖွဲ့ဝင်များမှ အင်အား ၂၀ဝ ကျော်ဖြင့် လာရောက်တပ်စွဲနေသဖြင့် အာဏာသိမ်းမှုကို ဆန့်ကျင်သည့် ဒေသခံများမှ ပြန်လည်ခုခံရာ တိုက်ပွဲဖြစ်ပွားခဲ့ပြီး ဒေသခံ ရွာသားငါးဦး ကျဆုံးသွားသည်ဟု သိရှိရသောကြောင့် အတည်ပြု နိုင်ရန်အတွက် ဆက်လက် စုံစမ်းလျက်ရှိသည်။ စစ်အုပ်စုမှ ရွာသားများ၏ တည်နေရာကို ဒရုန်းများအသုံးပြု၍ စုံစမ်းခဲ့ပြီး လက်နက်ကြီးဖြင့် ပစ်ခတ်ခဲ့ခြင်းဖြစ်သည်ဟု သိရှိရသည်။
အကြမ်းဖက်စစ်အုပ်စုသည် ယခုရက်ပိုင်းအတွင်း နေအိမ်များကို စီးနင်း၍ အဖမ်းအဆီးများကို ပိုက်စိပ်တိုက် ပြုလုပ်လာ သည်ကို တွေ့ရှိရသည့်အပြင် ဓားဓာခံအဖြစ် ဖမ်းဆီးမှုများကိုလည်း ဆက်တိုက်ပြုလုပ်လာခဲ့သည်။ ဧပြီလ ၁၉ ရက်နေ့တွင် မန္တလေးတိုင်းဒေသကြီး၊ ကျောက်ဆည်မြို့နယ် အမျိုးသားဒီမိုကရေစီအဖွဲ့ချုပ် ပါတီဝင် နှစ်ဦးကို ၎င်းတို့၏ နေအိမ်များ၌ ဖမ်းဆီးရာ မတွေ့ရှိသဖြင့် ၎င်းတို့၏ ဖခင် (အမြင်အာရုံချို့တဲ့သူ တစ်ဦးအပါအဝင်) အသက်အရွယ် ကြီးရင့်သူ နှစ်ဦးကို ဖမ်းဆီးသွားခဲ့သည်။ ၎င်းပြင် မွန်ပြည်နယ်၊ သံဖြူဇရပ်မြို့၌ အာဏာဖီဆန်ရေးလှုပ်ရှားမှု (CDM) ၌ ပါဝင်သည့်အတွက် ရာဇသတ်ကြီးပုဒ်မ ၅၀၅(က) ဖြင့် အမှုဖွင့်ခြင်းခံထားရသည့် ကျောင်းဆရာမ တစ်ဦးကို တွေ့ရှိခြင်းမရှိ၍ ၎င်း၏ မိသားစုဝင် သုံးဦးကို ဧပြီလ ၁၉ ရက်နေ့၌ ဖမ်းဆီးသွားခဲ့သည်။ ထိုသို့ ဓားစာခံအဖြစ် ဖမ်းဆီးခေါ်ဆောင်မှုသည် စစ်အုပ်စုက ကြီးမားသည့် ရာဇဝတ်မှုကို ကျူးလွန်နေခြင်းပင်ဖြစ်ပြီး ပြည်သူများ၏ လုံခြုံမှုမှာ တနေ့တခြား ပို၍ ကင်းမဲ့ လာနေပေသည်။
ယခုရက်ပိုင်းအတွင်း အကြမ်းဖက် စစ်အုပ်စုသည် ပြည်သူများကို နည်းလမ်း မျိုးစုံသုံး၍ တင်းကျပ်စွာ ဖိနှိပ်လာခဲ့သည်ကို တွေ့ရှိရသည်။ လက်နက်မဲ့ ပြည်သူများမှာ အာဏာဖီဆန်ရေးလှုပ်ရှားမှု (CDM)၊ ဆန္ဒထုတ်ဖော်မှု စသည့် ငြိမ်းချမ်းသော လှုပ်ရှားမှုများဖြင့် စစ်အာဏာရှင်၏ အုပ်ချုပ်ရေးယန္တရား လည်ပတ်နိုင်ခြင်းမရှိစေရန်အတွက် ဆန့်ကျင် တုံ့ပြန်ခဲ့ကြသည်။ အကြမ်းဖက် စစ်အုပ်စုက ရက်စက်စွာ တုံ့ပြန်ဖြိုခွဲမှုများကြောင့် ပြည်သူများမှာ အလွန်အမင်း ထိခိုက်၊ ဆုံးရှုံးမှုများကို ရင်ဆိုင်ခဲ့ကြရပြီ ဖြစ်သည်။ နိုင်ငံတကာအသိုင်းအဝိုင်းမှ ပြင်းထန်သည့် ဖိအားပေးမှုများ နှင့် အရေးယူဆောင်ရွက်မှုများ ဆောင်ရွက်မှသာလျှင် အကြမ်းဖက် စစ်အာဏာရှင်စနစ် ချုပ်ငြိမ်းနိုင်မည် ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”

Email :   info@aappb.org

Facebook : https://web.facebook.com/burmapoliticalprisoners/

Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

ကျဆုံးသူများစာရင်းဒေါင်းလော့ရယူရန်Fatality List for April 21, 2021 (Burmese)
ဖမ်းဆီးထိန်းသိမ်းခံထားရသူများစာရင်း Under Detention List_Burmese (21-Apr-2021)
လွတ်မြောက်စာရင်းဒေါင်းလော့ရယူရန် Release Lists_Burmese (21-Apr-2021)