စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ ဧပြီလ ၁ရ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ကျဆုံးသွားခဲ့သည့် မန္တလေးတိုင်း၊ မိုးကုတ်မြို့မှ အပြစ်မဲ့ ပြည်သူ (၂) ဦး၏ အချက်အလက်များကို ကောက်ယူရရှိနိုင်ခဲ့ပါ သည်။
ထို့ကြောင့် ယမန်နေ့အထိ ကျဆုံးသွားခဲ့သူ (၇၂၈) ဦးရှိခဲ့ပြီး ယနေ့တွင် ပြည်သူ (၂) ဦး ကျဆုံးခဲ့ရာ စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ယနေ့အထိ ကျဆုံးခဲ့ရသူစုစုပေါင်း (၇၃၀) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက်ဖြစ်ပြီး အမှန်တကယ် ကျဆုံးသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံကောက်ယူ ရရှိလာပါကလည်း ဆက်လက် ဖော်ပြ ပေးသွားပါမည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ ဧပြီလ ၁ရ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၁၅၂) ဦးရှိပြီး ၎င်းတို့အနက်မှ (၇၅) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၈၇၁) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက်မှ (၂၀) ဦးမှာ မျက်ကွယ် သေဒဏ်နှင့် (၁၄) ဦးမှာ အလုပ်ကြမ်း နှင့် ထောင်ဒဏ် သုံးနှစ်စီ မျက်ကွယ် ထောင်ဒဏ်ချမှတ်ခြင်းခံထားရကာ လက်ရှိတွင် တိမ်းရှောင်နေဆဲ ဖြစ်သည်။ ပြန်လည် လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြု ရန် လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
ယနေ့ကျရောက်သော မြန်မာနှစ်ဆန်း ၁ ရက်နေ့တွင် အကြမ်းဖက် စစ်အုပ်စုသည် မြန်မာနိုင်ငံတဝှမ်းလုံးရှိ အကျဉ်းထောင် အသီးသီးမှ အကျဉ်းသား (၂၃၄၀၇) ဦးကို လွတ်ငြိမ်းချမ်းသာခွင့်ဖြင့် ပြန်လည် လွှတ်ပေးခဲ့သည်ဟု ကြေညာထားသည်။ သို့သော်လည်း အာဏာသိမ်းပြီးသည့်နောက် ဖမ်းဆီး ချုပ်နှောင်ထားသူများ လွတ်မြောက်လာခြင်း မရှိပါ။
ယနေ့လွတ်မြောက်လာသူများတွင် အာဏာမသိမ်းမီကတည်းက ပြစ်ဒဏ်ချမှတ်ခြင်းခံထားရသည့် နိုင်ငံရေးအကျဉ်းသား ကိုးဦး ပါဝင်ခဲ့သည်ဟု ကနဦး သိရှိရသည်။ ၎င်းတို့သည် အင်းစိန်အကျဉ်းထောင် နှင့် အိုးဘိုအကျဉ်းထောင်တို့တွင် ထောင်ဒဏ်အသီးသီးချမှတ်ခြင်းခံထားရသော ဒေါင်းတို့မျိုးဆက်သံချပ် အဖွဲ့ဝင် သုံးဦး နှင့် ဗကသ ကျောင်းသား ခြောက်ဦးတို့ ဖြစ်ကြသည်။ ဗကသကျောင်းသား ခြောက်ဦးမှာ ယခုနှစ်တွင် ပြစ်ဒဏ်စေ့၍ လွတ်မြောက်လာမည့်သူများ ဖြစ်ကြသည်။
အာဏာရှင်အဆက်ဆက် ၎င်းတို့ကို ဆန့်ကျင်သူများကို နှစ်ရှည်ထောင်ဒဏ်များ ချမှတ်၍ ကာလကြာရှည်စွာ ထိန်းသိမ်းထား ရန်သာ ရည်ရွယ်ခဲ့ပြီး လွတ်ငြိမ်းသက်သာခွင့်များပေးသည့်အခါများတွင်လည်း လွတ်ရက်နီးနေပြီဖြစ်သော နိုင်ငံရေး အကျဉ်းသားအနည်းငယ်ကိုသာ ထည့်သွင်းလွှတ်ပေးလေ့ရှိသည်။ ကျန်သည့်အကျဉ်းသား အများအပြားကို လွှတ်ပေးခြင်း မှာ နိုင်ငံရေးအကျဉ်းသားများကို ထပ်မံ၍ ဖမ်းဆီးရန်အတွက် နေရာလွတ်များရှိစေရန် လွှတ်ပေးခြင်း ဖြစ်နိုင်သလို လွှတ်ပေးလိုက်သည့် အကျဉ်းသားများကို အသုံးချ၍ အဖျက်အမှောင့် လုပ်ရပ်များကို ထပ်မံ ဖန်တီးလို၍လည်း ဖြစ်နိုင်သည်။ ဖေဖော်ဝါရီလ ၁၂ ရက်နေ့တွင် အကြမ်းဖက် စစ်အုပ်စုမှ အကျဉ်းသားအများအပြားကို လွှတ်ပေးခဲ့ပြီးသည့် နောက်တနေ့တွင် မြန်မာနိုင်ငံအနှံ့အပြား၌ မီးကွင်းပစ်မှုများ၊ ဆူပူအောင် လှုံ့ဆော်မှုများ ပြုလုပ်ခဲ့သည်ကို တွေ့ရှိခဲ့ရပြီး ဖြစ်သည်။ ပြည်တွင်းရေးအခြေအနေများ အလွန်အမင်း မငြိမ်မသက်ဖြစ်နေချိန်တွင် ယခုကဲ့သို့ အကျဉ်းသားများကို လွှတ်ပေးခြင်းမှာ စိုးရိမ်ဖွယ်ရာ အခြေအနေ တစ်ရပ်ကို ဖော်ဆောင်လျက်ရှိသည်။
ယနေ့ မြန်မာနှစ်ဆန်းတစ်ရက်နေ့တွင်လည်း စစ်အာဏာသိမ်းမှုကို ဆန့်ကျင်လှုပ်ရှားမှုများ ဒေသအတော်များများတွင် ပုံသဏ္ဍန်အမျိုးမျိုးဖြင့် ဆက်လက် လှုပ်ရှားလျက်ရှိသည်ကို တွေ့ရှိရသည်။
ယနေ့ (ဧပြီ ၁၇) တွင် တနင်္သာရီတိုင်းဒေသကြီး၊ လောင်းလုံမြို့နယ်၊ အင်းဇောက်ကျေးရွာ သပိတ်စစ်ကြောင်းသည် ဆိုင်ကယ်ဖြင့် စီတန်း လှည့်လည်နေစဉ် သပိတ်‌စစ်ကြောင်းအနောက်ဘက်တွင် ကျန်နေခဲ့သည့် ဆိုင်ကယ်တစ်စီးကို အရပ်ဝတ်‌ သေနတ်ကိုင်များက အိမ်စီးကားဖြင့်ဝင်တိုက်ခဲ့ပြီး ဆိုင်ကယ်ပေါ်ပါ အမျိုးသား တစ်ဦးကို ဖမ်းဆီးသွားခဲ့သည်ဟု သိရှိရ သည်။
ယနေ့တွင် မန္တလေးတိုင်းဒေသကြီး၊ မိုးကုတ်မြို့တွင် ဆန္ဒထုတ်ဖော်မှုအပြီး လူစုခွဲချိန်၌ ပြည်သူများကာရံထားသော အတားအဆီးကို ဖယ်ရှား၍ အပြင်းအထန်ဖြိုခွင်းခဲ့သောကြောင့် အရပ်သား နှစ်ဦး ကျဆုံးသွားခဲ့ပြီး လေးဦး ဒဏ်ရာရရှိခဲ့ သည်ဟု ကနဦး သိရှိရသည်။ ထိုကဲ့သို့ပစ်ခတ်ဖြိုခွင်းနေစဉ်အတွင်း အကြမ်းဖက်စစ်အုပ်စု၏ တပ်ဖွဲ့ဝင် အရာရှိတစ်ဦးမှ ၎င်း၏ တပ်သားများအား “အသေပဲလိုချင်တယ်၊ ကြားတယ်နော်” ဟုဆိုသော အမိန့်ပေးသည့် ဗွီဒီယိုဖိုင် တစ်ခု လူမှုကွန်ရက် စာမျက်နှာတွင် ပျံ့နှံ့လျက်ရှိသည်။ ထိုအခြင်းအရာသည် ၎င်းတို့၏ ဥပဒေမဲ့ သတ်ဖြတ်မှုများကို တိုက်ရိုက်ဖော်ပြနေသော သက်သေများအနက် ခိုင်မာသည့် သက်သေတစ်ခု ဖြစ်ပြီး အပြစ်မဲ့ အရပ်သားများ၏ အသက်အန္တရာယ် လုံခြုံရေးအတွက် အထူး စိုးရိမ်ဖွယ်ရာ အခြေအနေ တစ်ရပ်ကို ဖော်ဆောင်နေသည်။
မြန်မာနိုင်ငံတွင်း နေ့စဉ်နှင့်အမျှ အလားတူသော ရက်စက်သည့် လူ့အခွင့်အရေးချိုးဖောက်မှုများ နှင့် ရာဇဝတ်မှုများကို အကြမ်းဖက် စစ်အုပ်စုမှ ကျူးလွန်လျက်ရှိပြီး ၎င်းတို့၏ လုပ်ရပ်များမှာ တနေ့ထက် တနေ့ ပို၍ ဆိုးရွားလာသည်ကိုသာ တွေ့ရှိရသည်။ စစ်အာဏာရှင်မှ တိုင်းပြည်ကို လက်နက်အားကိုးဖြင့် လိုသလို ခြယ်လှယ်လျက်ရှိသောကြောင့် ပြည်သူများ မှာ မည်သည့် ကာကွယ်စောင့်ရှောက်မှုမျှ မရရှိတော့ဘဲ အသက်ဘေးအန္တရာယ်အပါအဝင် ခြိမ်းခြောက်မှု အမျိုးမျိုးကြား၌ လုံခြုံမှုကင်းမဲ့စွာ ရှင်သန်နေထိုင်ကြရသည်။
တိုင်းရင်းသားဒေသများတွင် အကြမ်းဖက် စစ်အုပ်စုမှ ဒေသခံဌာနေတိုင်းရင်းသားများကို ပစ်မှတ်ထားလာသည်ကို တွေ့ရှိရ သည်။ ထို့ပြင် ကလေးငယ်များတွင်လည်း ထိခိုက်မှုများရှိလာခဲ့ပြီးဖြစ်သည်။ ဧပြီလ ၁၂ ရက်နေ့ နံနက်ပိုင်းတွင် အကြမ်းဖက်စစ်အုပ်စု၏ တပ်ဖွဲ့ဝင်များမှ ကရင်ပြည်နယ်၊ ဖာပွန်ခရိုင်ရှိ ဝါ့သိုးခိုကျေးရွာအတွင်းသို့ သေနတ်ဖြင့် ပစ်ခတ်ခဲ့ ခြင်းကြောင့် အသက် (၃) နှင့် (၁၄) နှစ်အရွယ် ကလေး နှစ်ဦးသည် ကျည်အစစ် ထိမှန်၍ ဒဏ်ရာရရှိခဲ့သည်။ ဆယ်စုနှစ် များစွာ ဖြစ်ပွားခဲ့သော လက်နက်ကိုင်ပဋိပက္ခများအတွင်း ကလေးငယ်များအပါအဝင် ဒေသခံတိုင်းရင်းသားများမှာ ပြည်တွင်းစစ်၏ မြေစာပင်များဖြစ်ခဲ့ကြရပြီးဖြစ်သည်။ ယခုတဖန်ပြန်၍ ဖြစ်ပွားလာသော တိုက်ပွဲများအတွင်း ဒေသခံ တိုင်းရင်းသားများသည် အလားတူဖြစ်ရပ်များကို ထပ်မံခံစားနေကြရပြီဖြစ်သည်။ စစ်အုပ်စု၏ ရက်စက်သော လူ့အခွင့်အရေးချိုးဖောက်မှုများကို တားဆီးနိုင်ရန်အတွက် ထိရောက်သော အရေးယူဆောင်ရွက်မှုများပြုလုပ်ရန်မှာ အာဆီယံဒေသတွင်း နိုင်ငံများအပါအဝင် နိုင်ငံတကာအသိုင်းအဝိုင်းပေါ်တွင်လည်း များစွာ မူတည်လျက်ရှိသည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

ဖမ်းဆီးထိန်းသိမ်းခံရသူများစာရင်းဒေါင်းလော့ရယူရန်Under Detention List_Burmese (17-Apr-2021)
ကျဆုံးသူများစာရင်းဒေါင်းလော့ရယူရန်Fatality list for April 17, 2021 (Burmese Final)KSM (Finaly) up
လွတ်မြောက်သူများစာရင်းဒေါင်းလော့ရယူရန်Release Lists_Burmese (17-Apr-2021)