စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ ဧပြီလ ၁၂ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ယခင် နေ့ရက်များက ကျဆုံးသွားခဲ့သည့် ပြည်သူ (၄) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ကြောင့် ယမန်နေ့အထိ ကျဆုံးသွားခဲ့သူ (၇၁၀) ဦးရှိခဲ့သည်။ ယနေ့တွင် ကျဆုံးသွားခဲ့သူများကို အတည်ပြုနိုင်ခြင်း မရှိသေး သည့်အတွက် စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ ယနေ့အထိ (၇၁၀) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက် ဖြစ်ပြီး အမှန်တကယ် ကျဆုံးသွားသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံကောက်ယူ ရရှိလာပါ ကလည်း ဆက်လက် ထည့်သွင်း ဖော်ပြပေးသွားမည်ဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ ဧပြီလ ၁၂ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၃၀၈၀) ဦးရှိပြီး ၎င်းတို့အနက်မှ (၆၄) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၆၉၇) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ၎င်းတို့အနက် (၁၇) ဦးမှာ မျက်ကွယ် သေဒဏ်ချမှတ်ခြင်းခံထားရသူများဖြစ်ပြီး လက်ရှိ တွင် တိမ်းရှောင်နေဆဲဖြစ်သည်။ ပြန်လည်လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြုရန်လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
ယမန်နေ့ညတွင် စစ်အာဏာသိမ်းမှုအား လက်မခံကြောင်း ကောင်းကင်ကို မီးအလင်းရောင်များ ထိုးသည့် လှုပ်ရှားမှု (flashlight strike) ကို မြန်မာပြည်တဝှမ်း၌ ပြုလုပ်ခဲ့ကြသည်။ ဝေဟင်မှ မီးအလင်းရောင်များသည် ပြည်သူများ မည်မျှ ဆန့်ကျင်ကြောင်းကို ဖော်ပြလျက်ရှိသော ထင်ရှားသည့် ပုံရိပ်များဖြစ်သည်။ စစ်အုပ်စုသည် ထိုငြိမ်းချမ်းသော လှုပ်ရှားမှု ကိုပင် အကြမ်းဖက်ခြင်းပြုခဲ့သည်။ မန္တလေးတိုင်းဒေသကြီး၊ အောင်မြေသာစံမြို့နယ်တွင် ၎င်းတို့၏ အိမ်များမှနေပြီး မီးအလင်းရောင်များထိုး၍ လှုပ်ရှားခဲ့သော အရပ်သားများကို ရဲ နှင့် စစ်သားများမှ ဖမ်းဆီးသွားခဲ့ကြောင်း CCTV မှတ်တမ်းမှ သိရှိခဲ့ရသည်။ ထို့ပြင် တရုတ်နိုင်ငံထုတ်ပစ္စည်းများ နှင့် အသီးအနှံများကို သပိတ်မှောက်သောအားဖြင့်လည်းကောင်း၊ ပြည်တွင်းဖြစ်ကို အားပေးရေးအတွက်လည်းကောင်း “ဖရဲသီးလှုပ်ရှားမှု”ကို ယနေ့ (ဧပြီ ၁၂) တွင် မြို့တချို့၌ ပြုလုပ်ခဲ့ကြ သည်။ ထိုလှုပ်ရှားမှုသည် ဖရဲစိုက်တောင်သူများနှင့်အတူ ရပ်တည်ကြောင်း ပြသခြင်းလည်းဖြစ်ပြီး စစ်အုပ်စု၏ အကြမ်းဖက်မှုကို တိုက်ရိုက် ဝေဖန်ရန် ငြင်းဆိုမြဲဖြစ်သော တရုတ်အစိုးရအား ဆန့်ကျင်ကြောင်း ပြသခြင်းလည်းဖြစ်သည်။
ယနေ့ (ဧပြီ ၁၂) တွင် မြန်မာပြည်အနှံ့အပြားမှ ပြည်သူများသည် စစ်အာဏာရှင်ကို ဆက်လက် ဆန့်ကျင် ဆန္ဒထုတ်ဖော်ခဲ့ ကြသည်။ ဖြိုခွင်းမှုများအနေဖြင့် မန္တလေးတိုင်းဒေသကြီး၊ မန္တလေးမြို့တွင် တပ်ပေါင်းစု သပိတ်စစ်ကြောင်းကို သေနတ်ဖြင့် ပစ်ဖောက်၍ ဖြိုခွင်းခဲ့ပြီး ရှမ်းပြည်နယ်၊ ကျောက်မဲမြို့တွင် မျက်ရည်ယိုဗုံး၊ အသံဗုံးများဖြင့် ပစ်ခတ် ဖြိုခွင်းခဲ့သည်။ သို့သော်လည်း ထိခိုက်ဒဏ်ရာ နှင့် ဖမ်းဆီးခြင်းခံရမှု မရှိကြောင်း သိရှိရသည်။ ကယားပြည်နယ်၊ လွိုင်ကော်မြို့၊ နာနတ်တော ရပ်ကွက်တွင် ပြည်သူများ ကာရံထားသည့် အရံအတားများကို ဖြိုခွင်းခဲ့ပြီး ပြည်သူ ခုနှစ်ဦးကို ဖမ်းဆီးသွားခဲ့သည်။ အဆိုပါ ပြည်သူ ခုနှစ်ဦးအနက်မှ လေးဦး ပြန်လည် လွတ်မြောက်လာသည်ဟု သိရှိရသည်။
ဖြိုခွင်းမှုများလျော့နည်းလာသည်ဟု ထင်ရဟန်ရှိသော်လည်း အခြားတစ်ဖက်တွင် ပစ်ခတ် စီးနင်းမှုများ၊ ပစ်သတ်မှုများ၊ ညှဉ်းပန်းနှိပ်စက်မှုများ၊ ဖမ်းဆီးမှုများကို ဆက်တိုက်ဆိုသလို ပြုလုပ်လျက်ရှိသည်။ ယနေ့ နံနက်အစောပိုင်းကတည်းက စတင်ကာ အကြမ်းဖက်စစ်အုပ်စု၏ လက်ပါးစေ ရဲ နှင့် စစ်သားများက ​အင်အားအလုံးအရင်းသုံးပြီး စစ်ကိုင်းတိုင်း ဒေသကြီး၊ တမူးမြို့ နေရာအနှံ့ကို ဖြန့်ကြက်၍ ပြည်သူများ၏ ခံတပ်များကို ဖြိုခွင်းခြင်း၊ မိုင်းများခွဲခြင်း၊ တွေ့သမျှ အရပ်သားများကို ဖမ်းဆီး၍ ကြိုးချည်ထားခြင်း၊ သေနတ်များ ပစ်ဖောက်ပြီး အိမ်များအတွင်းဝင်၍ သံသယရှိသူများကို ဖမ်းဆီးခေါ်ဆောင် သွားခြင်းတို့ကို ပြုလုပ်ခဲ့ကြသည်။ တမူးမြို့ရှိ Grace ဆေးရုံအတွင်းသို့ အင်အားအလုံးအရင်းဖြင့် ဝင်ရောက်ပြီး သူနာပြုများအား ရိုက်နှက်ခြင်း၊ ပစ္စည်းလုခြင်းတို့အပြင် မက်သဒစ်ဘုရားကျောင်းဝန်းအတွင်းကို ဝင်ရောက်၍ ဆရာတော် နှင့် ကျောင်းဝင်းအတွင်းရှိ ပြည်သူများထံမှ ဖုန်း၊ ပိုက်ဆံ နှင့် ဝတ်ဆင်ထားသည့် ရွှေများကို လုယက်ယူငင်ခြင်းများ ပြုခဲ့သည်ဟု သိရှိရသည်။ ၎င်းပြင် ရပ်ကျေးအုပ်ချုပ်ရေးမှူးတစ်ဦး၏ နေအိမ်ကို ဝင်ရောက်သ သောင်းကျန်းကာ ပစ္စည်းများကို ဖျက်ဆီးသွားခဲ့သည်။ ထိုကဲ့သို့ စီးနင်း၊ ဖြိုခွင်းခဲ့ခြင်းကြောင့် အသက် ရ နှစ်အရွယ် ကလေးငယ် တစ်ဦးသည် ကျည်အစစ် ထိမှန်၍ ဒဏ်ရာရရှိခဲ့သည်ဟု ကနဦး သိရှိရသည်။ ထိုလုပ်ရပ်များကြောင့် ပြည်သူတချို့သည်လည်း အိုးအိမ်စွန့်ခွာ၍ ထွက်ပြေးနေကြရသည်။ ထိုကဲ့သို့ လက်နက်အားကိုး၍ မြို့တစ်ခုလုံးကို စီးနင်းထားပြီး အငြှိုးကြီးစွာ တိုက်ခိုက်ခြင်းမှာ ၎င်းတို့၏ ပြင်းထန်သော ပစ်ခတ်ဖြိုခွင်းမှုများကို အလေးမထားဘဲ စုစည်းစွာ ပြန်လည် ခုခံကာကွယ်သော မြို့များကို အပြီးသတ် ချေမှုန်းလို၍ ဖြစ်သည်။
ဖမ်းဆီးမည့်သူကို တွေ့ရှိခြင်းမရှိ၍ ၎င်း၏ မိသားစု၊ ဆွေမျိုး နှင့် မိတ်ဆွေများကို ဓားစာခံအဖြစ် ဖမ်းဆီး ခေါ်ဆောင် သွားခြင်းသည် အကြမ်းဖက်စစ်အုပ်စု၏ လုပ်ရိုးလုပ်စဉ် နည်းနာတစ်ခုဖြစ်လာသည်ကို တွေ့ရှိရသည်။ ၎င်းတို့ကို ဆန့်ကျင်၍ မည်သည့်လှုပ်ရှားမှုမဆို ပါဝင်ပါက အကျိုးဆက်အနေဖြင့် ထိုကဲ့သို့ ခေါ်ဆောင်ခြင်းခံရမည်ကို သွယ်ဝိုက် ခြိမ်းခြောက်ခြင်းဖြစ်သည်။ အာဏာဖီဆန်ရေးလှုပ်ရှားမှု (CDM) တွင် ပါဝင်သည့် ချင်းပြည်နယ်၊ တီးတိန်မြို့၊ သမဝါယမဦးစီးဌာနမှ အမျိုးသား တစ်ဦးကို ဖမ်းဆီးရမိခြင်းမရှိသဖြင့် ၎င်း၏ မိဘ နှစ်ပါးကို ဓားစာခံအဖြစ် ယမန်နေ့ညက ဖမ်းဆီး ခေါ်ဆောင်သွားခဲ့သည်။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုထား ချက်များအရ ဓားစာခံအဖြစ် ဖမ်းဆီး ခေါ်ဆောင်ခြင်းခံထားရသူ (၃၂) ဦးထိ ရှိလာခဲ့ပြီဖြစ်သည်။
ဖမ်းဆီးထားချိန်၌ ညှဉ်းပန်းနှိပ်စက်ခြင်းကြောင့် အသက်ဆုံးရှုံးသွားရခြင်း၊ လူမဆန်စွာ ရိုက်နှက်ညှဉ်းပန်းခြင်းများကို ရက်ဆက်ဆိုသလို ပြုလုပ်၍ ပြည်သူများ အကြောက်တရားဖြစ်ပေါ်လာစေရန် ဖန်တီးလျက်ရှိသည်။ စစ်ကိုင်းတိုင်း ဒေသကြီး၊ မုံရွာမြို့၌ ယမန်နေ့ညက ပြည်သူတစ်ဦးကို သံပုံးတီး၍ဟုဆိုကာ ဖမ်းဆီး၍ ရိုက်နှက် ခေါ်ဆောင်သွားခဲ့သည်။ ယနေ့တွင်လည်း ရန်ကုန်မြို့၌ ပစ္စည်းပို့သည့် အမျိုးသားတစ်ဦးသည် နှာခေါင်းစည်း (mask) အမဲရောင်တပ်ထား သည့်အတွက် ရိုက်နှက်ခြင်းခံခဲ့ရပြီး မျက်နှာတစ်ခုလုံး၌ ဖူးရောင် ဒဏ်ရာများ ရရှိသွားခဲ့သည်။ အာဏာရှင်စနစ်ကို အမြစ်ပြတ် ချေမှုန်းနိုင်မှသာလျှင် ညှဉ်းပန်းနှိပ်စက်မှုများကို အဆုံးသတ်နိုင်မည်ဖြစ်သည်။
ယင်းအပြင် အကြမ်းဖက်စစ်အုပ်စုမှ ဓားပြတိုက်သကဲ့သို့ လုယက်မှုများကိုလည်း ပြောင်ကျကျကျူးလွန်လာလျက်ရှိ သည်။ ဧပြီလ ၁ဝ ရက်နေ့တွင် ရန်ကုန်မြို့၊ မြောက်ဥက္ကလာပမြို့နယ်၊ နွယ်နီ ၁၃ လမ်းတွင် အမျိုးသား တစ်ဦး၏ အိမ်အတွင်းကို ဝင်ရောက်၍ ငွေကျပ် သိန်း ၁၈ဝ နှင့် အခြား အဖိုးတန်ပစ္စည်းများကို ယူဆောင်ကာ ထိုအမျိုးသားကို အကြောင်းမဲ့ ရိုက်နှက်ပြီး ဖမ်းဆီး ခေါ်ဆောင်သွားခဲ့သည်။ ဧပြီလ ၁ဝ ရက်နေ့တွင်ပင် မြောက်ဒဂုံမြို့နယ်၊ ဘေလီ တံတားထိပ်တွင် သွားဆရာဝန် တစ်ဦး မောင်းနှင်လာသော ကားကို တားဆီး၍ ကားတစ်စီးလုံးကို မွှေနှောက်ရှာဖွေပြီး အခမဲ့ဆေးကုသပေးသောကြောင့်ဟုဆိုကာ ပိုက်ဆံအိတ်အတွင်းမှ ငွေကျပ် တစ်သိန်း နှစ်သောင်းကို ဒဏ်ကြေးအဖြစ် ယူဆောင်သွားခဲ့သည်။ အိမ်တွင်း၊ အိမ်ပြင်ပပါမချန် ခိုး၊ဆိုး၊လုယက်၊ဖျက်ဆီးမှုများကြောင့် ပြည်သူများမှာ အသက်၊ အိုးအိမ်၊ စည်းစိမ်များ လုံခြုံမှုမရှိသော အခြေအနေများနှင့် နေ့စဉ် ရင်ဆိုင် ဖြတ်သန်းနေကြရသည်။
တိုင်းရင်းသားဒေသဖြစ်သည့် ကချင်ပြည်နယ်၊ မိုးမောက်မြို့နယ်အတွင်း၌ ကချင်လွတ်မြောက်ရေးတပ်မတော် (KIA) နှင့် အကြမ်းဖက်စစ်အုပ်စု၏ တပ်ဖွဲ့များကြား တိုက်ပွဲများ ပြင်းထန်စွာ ဖြစ်ပွားလျက်ရှိသည်။ ယမန်နေ့ညက စစ်အုပ်စု၏ တပ်ဖွဲ့မှ ပစ်ခတ်လိုက်သည့် လက်နက်ကြီးကျည်သည် ကျေးရွာများအတွင်း ကျရောက်ပေါက်ကွဲခဲ့ခြင်းကြောင့် အမျိုးသမီး တစ်ဦး နှင့် အမျိုးသား တစ်ဦး ကျဆုံးသွားခဲ့ပြီး အခြား ရွာသား တစ်ဦးမှာ ခြေထောက်ကို ကျည်ထိမှန် ဒဏ်ရာရရှိခဲ့သည်ဟု သိရှိရသည်။ ထို့ပြင် ယနေ့ နံနက်ပိုင်းမှစတင်ပြီး ကချင်လွတ်လပ်ရေးအဖွဲ့ချုပ်(KIO) ၏ ဗဟိုဌာနချုပ်နယ်မြေ အလောဘွမ် (Alaw Bum) သို့ အာဏာသိမ်းစစ်အုပ်စုမှ ဂျက်တိုက်လေယာဉ်များဖြင့် သွားရောက်ပစ်ခတ်နေကြောင်း သိရှိရသည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။

အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

ကျဆုံးသူများစာရင်းဒေါင်းလော့ရယူရန် Fatality list for April 11, 2021 (Burmese Final)KSM (Finaly) up
ဖမ်းဆီးထိန်းသိမ်းသူများစာရင်းဒေါင်းလော့ရယူရန်Under Detention List_Burmese (12-Apr-2021)_PYM
လွတ်မြောက်သူများစာရင်းဒေါင်းလော့ရယူရန်Release Lists_Burmese (12-Apr-2021)_PYM