စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

ရက်စွဲ ဧပြီလ ရ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)မှ ကောက်ခံရရှိသည့် မှတ်တမ်းများအရ ယနေ့တွင် ကျဆုံးသွားခဲ့သည့် ပြည်သူ (၁၂) ဦးနှင့် ယခင်နေ့ရက်များတွင် ကျဆုံးခဲ့သည့် ပြည်သူ (၅) ဦးတို့၏ အချက်အလက်များကို ကောက်ယူရရှိနိုင်ခဲ့ပါသည်။ ကျဆုံးသူအရေအတွက်မှာ တိုးလာနေဆဲဖြစ်ပြီး ကျဆုံးသူများ၏ အချက်အလက်များကို ထပ်မံကောက်ယူရရှိလာပါက ဆက်လက်ထည့်သွင်း ဖော်ပြပေးသွားမည်ဖြစ်သည်။
ထို့ပြင် ယခင်နေ့ရက်များတွင် ကျဆုံးသွားခဲ့ကြသည့် အရပ်သားပြည်သူ (၅) ဦး၏ အချက်အလက်များကို ထပ်မံ ရရှိသည့် အတွက် ယမန်နေ့အထိ ကျဆုံးသွားခဲ့သူ (၅၈၆) ဦးရှိခဲ့ပြီး ယနေ့တွင် ကျဆုံးသူ (၁၂) ဦးရှိခဲ့ရာ စစ်အာဏာရှင် တော်လှန်ရေး (နွေဦးတော်လှန်ရေး) ကာလအတွင်း ယနေ့အထိ ကျဆုံးခဲ့ရသူစုစုပေါင်း (၅၉၈) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူ ရရှိထားသည့် အရေအတွက်ဖြစ်ပြီး အမှန်တကယ် ကျဆုံးသူများမှာ အဆိုပါ အရေအတွက်ထက် ပိုများနေနိုင်ပါသည်။ ထပ်မံကောက်ယူ ရရှိလာပါကလည်း ဆက်လက် ဖော်ပြပေးသွားပါမည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ ယနေ့ ဧပြီလ ရ ရက်နေ့ထိတိုင် ဖမ်းဆီးချုပ်နှောင်ခြင်းခံထားရသူ စုစုပေါင်း (၂၈၄၇) ဦးရှိပြီး ၎င်းတို့အနက်မှ (၃၈) ဦးမှာ ထောင်ဒဏ်ချမှတ်ခြင်းခံထားရသည်။
ထို့အပြင် ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၄၈၁) ဦး၏ အမည်စာရင်းကိုလည်း သီးခြား မှတ်တမ်းပြု၍ ဖော်ပြထားသည်။ ပြန်လည်လွတ်မြောက်လာသူများ၏ အမည်စာရင်းမှာ ချက်ချင်းရရှိရန် လက်လှမ်းမမီ နိုင်သည့်အတွက် ယခုစာရင်းတွင် အတည်ပြုရန်လိုအပ်နေဆဲဖြစ်ပြီး အတည်ပြုနိုင်သည့်အမည်စာရင်းများကို ဆက်လက် ဖော်ပြသွားပါမည်။
ယနေ့ (ဧပြီလ ရ ရက်) တွင် ဆန္ဒထုတ်ဖော်မှုများ ဆက်လက်ရှိနေဆဲဖြစ်ပြီး မြို့ကြီးများ၌ ဖြိုခွင်းမှုအချို့သာရှိကာ အတန်ငယ် ငြိမ်သက်လျှက်ရှိသည်။ ထိုအခြင်းအရာမှာ မြို့ပြမဟုတ်သော ဒေသများကို အဓိကထား ဖိနှိပ်လို၍ ဖြစ်သည်။ ယနေ့ နံနက်အစောပိုင်းကတည်းက စစ်ကိုင်းတိုင်း၊ ကလေးမြို့ရှိ တာဟန်းခံတပ်ကို အကြမ်းဖက် စစ်အုပ်စုမှ စစ်မြေပြင် သဖွယ် လက်နက်ကြီး၊ လက်ပစ်ဗုံး နှင့် စက်သေနတ်များဖြင့် အင်အားအလုံးအရင်းသုံး၍ ဖြိုခွင်းခဲ့သောကြောင့် ပြည်သူ (၈) ဦး ထက်မနည်းကျဆုံးခဲ့ပြီး လက်ပြတ်သွားသည့် ပြည်သူ (၁) ဦးအပါအဝင် ဒဏ်ရာရရှိသူ (၂၀) ဦးခန့်ရှိကာ ဖမ်းဆီးခြင်း ခံရသူ (၁၀) ဦးကျော်ရှိသည်ဟု ကနဦး သိရှိရသည်။ ပစ်ခတ်ဖြိုခွဲမှုအတွင်း လူနေအိမ်များအတွင်းသို့ ပစ်ခတ်ခြင်း၊ ရပ်ကွက် ဆေးခန်းများကို ဝင်ရောက်စီးနင်း၍ ရှာဖွေခြင်းများကိုလည်း ပြုလုပ်ခဲ့သည်။ ၎င်းပြင် စစ်ကိုင်းတိုင်း၊ တန့်ဆည်မြို့၌လည်း ပြည်သူ (၁) ဦးကျဆုံးခဲ့ကာ (၂၀) ဦးထက်မနည်း ဒဏ်ရာရရှိခဲ့ပြီး ၎င်းတို့အနက်မှ (၃) ဦးသည် စိုးရိမ်ရသည့်အခြေအနေရှိ သည်ဟု သိရှိရသည်။ ထို့ပြင် စစ်ကိုင်းတိုင်း၊ ရွှေဘိုမြို့၊ ငါးဆူကုန်းရွာသပိတ်တွင် ပလိုင်းကျေးရွာသား (၁) ဦးသည် ယနေ့ ညနေပိုင်းအချိန်က ကျဆုံးသွားခဲ့သည်ဟု သိရှိရသည်။ ပဲခူးတိုင်း၊ ပဲခူးမြို့၊ ကျောက်ကြီးစုရပ်ကွက်အတွင်းသို့လည်း အကြောင်းမဲ့ ဝင်ရောက်ပစ်ခတ်မှုကြောင့် အမျိုးသား (၂) ဦး ကျဆုံးသွားခဲ့ပြီး (၃) ဦးထက်မနည်း ဒဏ်ရာရရှိခဲ့သည်။
ယမန်နေ့ (ဧပြီလ ၆ ရက်) ညအချိန်၌ စစ်အုပ်စု၏ လက်ပါးစေ ရဲ နှင့် စစ်သားများမှ လက်နက်အားကိုးဖြင့် အကြမ်းဖက် ပစ်ခတ်ခဲ့သောကြောင့် ကျဆုံး နှင့် ဒဏ်ရာရရှိသူ တချို့ရှိခဲ့သည်။ ရှမ်းပြည်နယ်၊ ညောင်ရွှေမြို့၌ ပစ်ခတ်ဖြိုခွင်းခဲ့မှုကြောင့် လူငယ် (၁) ဦးသည် ဦးခေါင်းကို ကျည်ထိမှန်၍ ကျဆုံးသွားခဲ့သည်။ ယင်းအပြင် မန္တလေးတိုင်း၊ မြင်းခြံမြို့၌ ရပ်ကွက်များ အတွင်း အထိ ဝင်ရောက်ပစ်ခတ်ခဲ့ပြီး ကျည်ဆန်ထိမှန်၍ ဒဏ်ရာရရှိသူများရှိသည်ဟု သိရှိရသည်။
ဖမ်းဆီးထားချိန်၌ ညှဉ်းပန်းနှိပ်စက်ခြင်းခံရ၍ ကျဆုံးမှုများသည် နေ့စဉ်ရက်ဆက် ဖြစ်ပေါ်လျက်ရှိသည်။ ဧပြီလ ၄ ရက်နေ့ ညအချိန်တွင် ရှမ်းပြည်နယ်၊ တောင်ကြီးမြို့ရှိ ညောင်ဖြူရပ်ကွက်အုပ်ချုပ်ရေးမှူးရုံး မီးလောင်နေချိန် မီးငြှိမ်းသတ်ရန် ရေပုံးနှင့်ထွက်လာသည့် လူငယ် (၁) ဦးကို ရဲ နှင့် စစ်သားများက ဖမ်းဆီးသွားခဲ့ပြီး နှစ်ရက်အကြာတွင် ဦးခေါင်းခွံ ကွဲအက် သည့် ဒဏ်ရာ၊ နားရွက်တစ်ဖက် ပြတ်လုနီးနီးလှီးဖြတ်ခြင်းခံထားရသည့် ဒဏ်ရာ၊ အမျိုးသားလိင်အင်္ဂါ ဖြတ်ထားခြင်း ခံရသည့် ဒဏ်ရာ၊ နောက်ကျောကို ဓါးဖြင့်ခုတ်ထားသည့် ဒဏ်ရာ နှင့် အခြားသေစေလောက်သည့် ဒဏ်ရာများ ရရှိထား သော ရုပ်အလောင်းကို မိသားစုထံ ပြန်လည် ပေးအပ်ခဲ့သည်။ အဆိုပါ လူငယ်သည် အပြင်းအထန် ညှဉ်းပန်း နှိပ်စက်ခြင်း ခံရ၍ ကွယ်လွန်သွားသော်လည်း အကြမ်းဖက်စစ်အုပ်စုမှ မီးသတ်ကားတိုက်၍ သေဆုံးခြင်း ဖြစ်သည်ဟု ငြင်းဆိုထား ကြောင်း သိရှိရသည်။ ထို့ပြင် တနင်္သာရီတိုင်း၊ ကော့သောင်းမြို့၌ ဖမ်းဆီးခြင်းခံခဲ့ရသည့် လူငယ် (၁) ဦး၏ ရုပ်အလောင်းကို ပြန်လာယူရန် ရဲတပ်ဖွဲ့မှ မိသားစုထံ ဧပြီလ ၅ ရက်နေ့က အကြောင်းကြားခဲ့သည်။ အကြမ်းဖက် စစ်အုပ်စုမှ ထိုကဲ့သို့ အလွန်ဆိုးရွားသော ရက်စက်မှုများကို တရားမဲ့ ကျူးလွန်၍ အကြောက်တရားဝန်းကျင်ကို တည်ဆောက်လာလျက်ရှိ သောကြောင့် ပြည်သူများမှာ နေ့စဉ်နှင့်အမျှ အသက်အန္တရာယ် ခြိမ်းခြောက်မှုများကို ရင်ဆိုင်နေကြရသည်။
အကြမ်းဖက်စစ်အုပ်စုသည် မြို့များ၊ ရွာများ၊ လမ်းများပါမကျန် ပြည်သူပိုင်ပစ္စည်း နှင့် အများပိုင်ပစ္စည်းများကို ဖျက်ဆီး ခြင်းသာမက ယခုအခါ အိမ်များ၊ စားသောက်ဆိုင်များအတွင်းကိုပါ အလားတူ ကျူးလွန်လာလျက်ရှိသည်ကို တွေ့ရှိလာရ ပါသည်။၊ စစ်ကိုင်းတိုင်း၊ ခင်ဦးမြို့နယ်အတွင်း၌လည်း ဝင်ရောက် စီးနင်းမှုများရှိခဲ့ပြီး ယမန်နေ့က ကံသစ်ကျေးရွာရှိ ကျဆုံးသွားသည့် ပြည်သူ (၁) ဦး၏ အိမ်မှ ဘီဒို နှင့် သေတ္တာများကို ရိုက်ဖျက်၍ ရှာဖွေခဲ့သည်။ ထို့ပြင် အင်းပတ်ကွေ့ ကုန်စိမ်းတန်းရှိ စားသောက်ဆိုင် တစ်ဆိုင်ကို ဝင်ရောက် ရိုက်ခွဲဖျက်ဆီး၍ ငွေကျပ် (၁၁) သိန်းကျော်ကို ယူငင်သွားကာ အကြော်ဆရာ (၁) ဦး နှင့် မိဘမဲ့ လူငယ် (၁) ဦးကို ဖမ်းဆီးသွားခဲ့သည်။
တိုင်းရင်းသားဒေသများ၌လည်း တိုက်ပွဲများ ဆက်လက်ဖြစ်ပွားဆဲဖြစ်သည်။ ယနေ့နံနက်အစောပိုင်းတွင် အကြမ်းဖက် စစ်အုပ်စု၏ ခလရ-၂၉၉ မှ ကရင်ပြည်နယ်၊ ဒူးပလာယာခရိုင်၊ ဝင်းရေးမြို့နယ်၊ မာန်အောင်ရွာ ချောင်းဖျားရှိ နေရာများကို လက်နက်ကြီးများဖြင့် ပစ်ခတ်ခဲ့သည်ဟု သိရှိရသည်။ ထို့အပြင် ယမန်နေ့ညက မာန်အောင်ရွာအနီး၌ စစ်တပ် နှင့် ကရင်အမျိုးသားလွတ်မြောက်ရေးတပ်မတော် (KNLA) တို့ကြား တိုက်ပွဲဖြစ်ပွားခဲ့ခြင်းကြောင့် ရွာသား (၁) ဦး ကျဆုံး သွားခဲ့ပြီး (၁) ဦး ဒဏ်ရာရရှိခဲ့ကာ ဒေသခံများ ထွက်ပြေးနေကြရသည်။ စစ်အုပ်စုမှ ရွာသားများကို ပစ်ခတ်ခြင်း၊ ရွာသား များကို အကာအကွယ်ယူ၍ စစ်ရေးလှုပ်ရှားခြင်းများ ပြုလုပ်လျှက်ရှိသည်ဟု သိရှိရသည်။
မြန်မာနိုင်ငံတဝှမ်းလုံးတွင် တည်ငြိမ်မှုနှင့် အေးချမ်းမှုသည် လုံးဝကွယ်ပျောက်နေပြီဖြစ်သည်။ ပြည်သူများ၏ဘဝသည် ကဏ္ဍတိုင်းတွင် လုံခြုံမှုမရှိတော့ဘဲ စစ်အုပ်စု၏ အကြောင်းမဲ့ အကြမ်းဖက် အနိုင်ကျင့်မှုကို မိနစ်မလပ် ကြုံတွေ့နေရပြီ ဖြစ်သည်။
ထိုသို့ စစ်အုပ်စု၏ အကြမ်းဖက်မှုများအား လျစ်လျူရှူထားခြင်းသည် ၎င်းတို့၏ လုပ်ရပ်များကို ပို၍ ပြင်းထန်လာစေပြီး ဒေသတစ်ခုလုံး၏ ငြိမ်းချမ်းရေးကို ခြိမ်းခြောက်လာမည်ဖြစ်သည်။ အာဆီယံချာတာ၌ ဒေသဆိုင်ရာ ငြိမ်းချမ်းရေး၊ လုံခြုံရေး နှင့် သာယာဝပြောရေးကို ပိုမိုအားကောင်းလာစေရန် အတူတကွ သန္နိဌာန်ချမှတ်ဆောင်ရွက်ခြင်း နှင့် စုပေါင်း တာဝန်ယူမှုရှိခြင်းဟု ကတိပြုထားသည်။ ကရင်ပြည်နယ်၌ အရပ်သားများကို လေယာဉ်ဖြင့် ဗုံးကြဲခြင်း နှင့် ထိုးစစ်ဆင်လာ ခြင်းသည် အခြားအာဆီယံနိုင်ငံများကိုပါ သက်ရောက်မှုရှိလာပြီဖြစ်သည်။ စိန်ခေါ်မှုများကို အရေးယူဆောင်ရွက်ရန် ပျက်ကွက်ခြင်းသည် ထိုချာတာနှင့် ကိုက်ညီမှုမရှိပါ။ ကြားဝင် စွက်ဖက်မှုမရှိခြင်းသည် အာဆီယံအဖွဲ့ဝင်နိုင်ငံများ၏ ငြိမ်းချမ်းရေး၊ အချုပ်အခြာအာဏာ နှင့် လုံခြုံရေးတို့ကို တိုက်ရိုက် စိန်ခေါ်မှုဖြစ်စေသည်။ ယနေ့၌ အိန္ဒိယနိုင်ငံနှင့် နယ်မြေခြင်း နီးကပ်လျှက်ရှိသော စစ်ကိုင်းတိုင်းဒေသကြီး၊ ကလေးမြို့၌ အင်အား အလွန်အကျွံ သုံး၍ ဖြိုခွင်းခဲ့သည်။ စစ်အုပ်စု၏ အကြမ်းဖက်လုပ်ရပ်ကို ပြည်တွင်းရေး ကိစ္စဖြစ်သည်ဟု ရှုမြင်၍ မရနိုင်တော့ပါ။ ထိုအခြင်းအရာသည် အာဆီယံ ပြည်သူအားလုံး၏ ငြိမ်းချမ်းရေး နှင့် လုံခြုံရေးကို ခြိမ်းခြောက်နေခြင်းဖြစ်ပြီး ဒေသတစ်ခုလုံး၏ တည်ငြိမ်ရေး ကိုပါ ပျက်ပြားစေနိုင်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထားရ ခြင်းများနှင့် နွေဦးတော်လှန်ရေးကာလအတွင်း ကျဆုံးသွားသူများ၏ အချက်အလက်များကို သိရှိပါက အောက်ပါလိပ်စာ များသို့ ဆက်သွယ်၍ အသိပေး၊ အကြောင်းကြား နိုင်ပါသည်။
ဥပဒေပိုင်းဆိုင်ရာအကူအညီလိုအပ်ပါကလည်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) မှ ကိုအောင်ကြီး၊ ဖုန်း – ဝ၉၄၅၁၅၂၉၀၀ဝ နှင့် တရားလွှတ်တော်ရှေ့နေ ဒေါ်ခင်သီတာလဲ့လဲ့ထွန်း၊ ဖုန်း – ဝ၉၇၇၄၀၈၁၅၈၅ တို့အား ဆက်သွယ်နိုင်ပါသည်။
“အရေးတော်ပုံအောင်ရမည်”
Email : info@aappb.org
Facebook : https://web.facebook.com/burmapoliticalprisoners/
Twitter : https://twitter.com/aapp_burma
နိုင်ငံရေးအကျဉ်းသားများကူညီစောင့်ရှောက်ရေးအသင်း

ဖမ်းဆီးထိန်းသိမ်းထားသူများစာရင်းဒေါင်းလော့ရယူရန်Total Detention, Charge _Burmese (Last Updated on 7 April 2021)
ကျဆုံးသူများစာရင်းဒေါင်းလော့ရယူရန်Fatality list for April 7, 2021 (Burmese Final)KSM (Finaly) up
လွတ်မြောက်သူများစာရင်းဒေါင်းလော့ရယူရန်Total Released Lists_Burmese (Last Updated on 7 April 2021)