စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်

 

ရက်စွဲ မတ်လ ၂၁ ရက်၊ ၂၀၂၁ ခုနှစ်
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)သည် ယနေ့တွင် ကျဆုံးသွားခဲ့သည့် စစ်ကိုင်းတိုင်း မုံရွာမြို့ နှင့် ရန်ကုန်တိုင်း မင်္ဂလာတောင်ညွန့်မြို့နယ်တို့မှ အရပ်သားပြည်သူ (၂) ဦး၏ အချက်အလက်များကို ကောက်ယူ ရရှိနိုင်ခဲ့ပါသည်။ ထို့ပြင် ယခင်နေ့ရက်များတွင် ကျဆုံးသွားခဲ့ကြသည့် အရပ်သားပြည်သူ (၁) ဦး၏ အချက်အလက်များကို ထပ်မံရရှိသည့်အတွက် ယမန်နေ့အထိ ကျဆုံးသွားခဲ့သူ (၂၄၈) ဦးရှိခဲ့ပြီး ယနေ့အထိ စစ်အာဏာရှင်တော်လှန်ရေး (နွေဦးတော်လှန်ရေး)ကာလအတွင်း ကျဆုံးခဲ့ရသူစုစုပေါင်း (၂၅၀) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူရရှိထားသည့် အရေအတွက်ဖြစ်ပြီး အမှန်တကယ် ကျဆုံးသူများမှာ အဆိုပါအရေအတွက်ထက် ပိုများနေနိုင်ပါသည်။ ထပ်မံကောက်ယူ ရရှိလာပါက ဆက်လက် ဖော်ပြပေးသွားပါမည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ မတ်လ ၂၁ ရက်နေ့ထိ စုစုပေါင်း ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသူ (၂၆၆၅) ဦးထိရှိခဲ့ပြီ ဖြစ်သည်။ ၎င်းတို့အနက်မှ ထောင်ဒဏ်ချမှတ်ခြင်းခံထားရသူ (၁၅) ဦး၊ အမှုဖွင့်ခြင်းခံထားရပြီး ဖမ်းဝရမ်းထုတ်ခြင်းခံထားရ သောကြောင့် တိမ်းရှောင်နေသူ (၁၀၉) ဦး နှင့် ပြန်လည် လွတ်မြောက်လာသူ (၃၇၅) ဦးရှိခဲ့သည်။ ထို့ကြောင့် လက်ရှိ အချိန်အထိ (၂၂၉၀) ဦးမှာ ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသည်။
ယနေ့ထုတ်ပြန်သည့်အဖမ်းအဆီးစာရင်းတွင် ဖမ်းဆီးခြင်းခံရသူ (၃၂၀) ဦး၏အမည်စာရင်းကိုရရှိခဲ့၍ ထည့်သွင်း မှတ်တမ်း ပြုထားပါသည်။ ဖော်ပြပါအရေအတွက်ထက်ပိုသော ဖမ်းဆီးမှုများရှိသည်ဖြစ်ရာ ဖမ်းဆီးခံများ၏ အချက်အလက်များကို မိမိတို့အနေဖြင့် ဆက်လက်စုံစမ်းလျက်ရှိပြီး ရရှိလာသည့် အချက်အလက်များကို ထုတ်ပြန်ပေးသွားမည်ဖြစ်ပါသည်။
အာဏာသိမ်းစစ်အုပ်စုမှ ငြိမ်းချမ်းစွာ ဆန္ဒထုတ်ဖော်သူများကို အကြမ်းဖက်ဖြိုခွင်းလျက်ရှိ၍ အသက်ပေါင်းများစွာ ဆုံးရှုံးခဲ့ရသော်လည်း ပြည်သူများသည် အသက်ဘေးအန္တရာယ်ထိခိုက်မည်ကို ရင်ဆိုင်ကာ ဆန္ဒထုတ်ဖော်ဆဲဖြစ်သည်။ ယနေ့ (မတ်လ ၂၁) တွင် နံနက်အစောပိုင်း သပိတ်၊ ပြောက်ကျားသပိတ်၊ လူမဲ့သပိတ်တို့ဖြင့် စစ်အာဏာရှင်၏ ရက်စက်မှုကို အံတု၍ ဆက်လက် ဆန္ဒထုတ်ဖော်ခဲ့ကြသည်။ ယနေ့တွင် မုံရွာမြို့၌ ဖြိုခွင်းမှုပြင်းထန်ခဲ့ပြီး ရဲနှင့် စစ်သားများမှ အတားအဆီးများကို ဖျက်ဆီးသဖြင့် လူထုက ကာကွယ်ရာ ကျည်အစစ်ဖြင့် ပစ်ခတ်ခဲ့၍ အမျိုးသား (၁) ဦးသည် ဦးခေါင်းကို ကျည်ထိမှန်၍ ပွဲချင်းပြီး သေဆုံးသွားခဲ့ပြီး အရပ်သားပြည်သူ (၃) ဦး ဒဏ်ရာရရှိခဲ့သည်။ ၎င်းပြင် မန္တလေး ချမ်းမြသာစည် မြို့နယ် အောင်ပင်လယ်အတွင်း၌ ရဲ နှင့် စစ်သားများသည် ရာဘာကျည်အပြင် ကျည်အစစ်များသုံး၍ ပစ်ခတ်သဖြင့် ကျည်ထိမှန် ဒဏ်ရာရသူများနှင့် ဖမ်းဆီးထားသူများ ရှိနေကြောင်း ကနဦး သိရှိရသည်။
အာဏာသိမ်းစစ်အုပ်စု၏ ခြိမ်းခြောက်မှုများကြောင့် ဒေသခံ လယ်သမားများမှာ နေအိမ်များကို စွန့်ခွာ၍ ထွက်ပြေးနေကြရ သည်။ မတ်လ ၁၈ ရက်နေ့တွင် ရဲနှစ်ဦးသတ်ဖြတ်ခံရပြီး ရဲအရာရှိတစ်ဦး ဒဏ်ရာရရှိခဲ့သည့် ပဋိပက္ခတွင် ပါဝင်ပတ်သက်သူ များကို စစ်အုပ်စုမှ လက်စားချေမည်ဟု ခြိမ်းခြောက်သောကြောင့် စစ်ကိုင်းတိုင်း ဒီပဲယင်းမြို့နယ်အတွင်းရှိ ရွာ ၅ ရွာမှ ထောင်နှင့်ချီသော လယ်သမားများသည် ၎င်းတို့၏ နေအိမ်များကို စွန့်ခွာ၍ ထွက်ပြေးသွားကြရသည်။
အာဏာသိမ်းစစ်အုပ်စုသည် ပရဟိတအဖွဲ့များ၊ အရပ်ဘက်အဖွဲ့အစည်းများ နှင့် စေတနာ့ဝန်ထမ်းများပါမကျန် အပြင်းအထန် ဖိနှိပ်၍ ဖမ်းဆီးခြင်း၊ ရုံးခန်းများကို ဝင်ရောက်စီးနင်းခြင်းများဆက်လက်ပြုလုပ်လျက်ရှိရာ ယနေ့တွင် ရန်ကုန်မြို့၊ မင်္ဂလာတောင်ညွန့်မြို့နယ်ရှိ We Love Yangon ရုံးခန်းကို ဝင်ရောက်စီးနင်းခဲ့ပြီး တံခါးကိုရိုက်ချိုးကာ အတွင်းရှိ ပစ္စည်းများကို ဖျက်ဆီးခြင်း၊ ယူငင်ခြင်းများကို ပြောင်ပြောင်တင်းတင်းကျူးလွန်ခဲ့သည်။ ထိုကဲ့သို့ စတင်စီးနင်းဝင်ရောက်စဉ် တွင် သေနတ်များဖြင့် ပစ်ဖောက်ခြောက်လှန့်ခဲ့သည့်အတွက် ရုံးခန်းရှိသည့် တိုက်အပေါ်ထပ်ငါးလွှာမှ အသက် ၃၅ နှစ်အရွယ် အမျိုးသမီး (၁) ဦးသည် သေနတ်ပစ်သံများ၊ တံခါးခေါက်သံများကြောင့် ထိတ်လန့်ကာ နောက်ဖက်လှေကားမှ ဆင်းပြေးစဉ် ငါးလွှာမှ ပြုတ်ကျသွားခဲ့၍ ဦးခေါင်းကွဲထွက်ကာ ကျဆုံးသွားခဲ့သည်။ လှိုင်သာယာမြို့နယ်ရှိ စားဝတ်နေရေး ခက်ခဲလျက်ရှိသူများကို အလှူလုပ်ရန်သွားစဉ် သုခကာရီအသင်း ဥက္ကဌ ဒေါ်ရွှေမှုန် နှင့် အသင်းသား နှစ်ဦးသည်လည်း ဖမ်းဆီးခြင်းခံခဲ့ရသည်။ ယမန်နေ့ (မတ်လ ၂၀) ရက်နေ့ညအချိန်၌ ပဲခူးတိုင်း ပြည်မြို့ရှိ မင်္ဂလာထွန်းသီရိရုပ်ရှင်ရုံ တံခါးများကို ရိုက်ချိုးပြီး ဝင်ရောက်စီးနင်းရှာဖွေခဲ့သည်။ ထို့ပြင် ရုပ်ရှင်ရုံမန်နေဂျာကို ရုပ်ရှင်ရုံပြန်ဖွင့်ရန် ညှိနှိုင်းရာ လက်ခံခြင်းမရှိ၍ အကြမ်းဖက် ဖမ်းဆီးခဲ့သလို ရုပ်ရှင်ရုံရှေ့ အိမ်များကိုလည်း လေးဂွများဖြင့်ပစ်၍ ခြိမ်းခြောက်မှုများ ပြုလုပ်ခဲ့ကြောင်း သိရှိရသည်။
ရဲ နှင့် စစ်သားများသည် ဖမ်းဆီးချိန်၌ ရက်ရက်စက်စက် ရိုက်နှက်ခြင်းများကို အလွယ်တကူကျူးလွန်လေ့ရှိသည်မှာ ၎င်းတို့၏ အလေ့အထတစ်ခုသဖွယ်ဖြစ်နေသည်။ ယနေ့တွင် ရှမ်းပြည်နယ်၊ တောင်ကြီးမြို့၊ ရတနာသီရိရပ်ကွက်အတွင်းကို ရဲများမှ ပစ်ခတ်၍ စီးနင်း ဝင်ရောက်ခဲ့ပြီး ဖမ်းဆီးရာ၌ လူငယျ (၁) ဦးကို အုပျစုဖှဲ့၍ အပွငျးအထနျရိုကျနှကျခဲ့သည်။
အာဏာသိမ်းစစ်အုပ်စုသည် နိုင်ငံသားများ၏ နိုင်ငံသား နှင့် နိုင်ငံရေးအခွင့်အရေးများကို နေ့စဉ်ချိုးဖောက်လျှက်ရှိပြီး ခိုး၊ ဆိုး၊ လုယက်၊ အကြမ်းဖက်၊ လူသတ်၊ အလောင်းဖျောက် စသည့် လူသားချင်း စာနာမှုကင်းမဲ့သည့် ရာဇဝတ်မှုများကို နေ့စဉ်နှင့်အမျှ မြို့လယ်ခေါင်တွင်ပါမချန် ပြောင်ပြောင်တင်းတင်း ကျူးလွန်လျက်ရှိသောကြောင့် အာဆီယံအပါအဝင် နိုင်ငံတကာ အသိုက်အဝိုင်းမှ ၎င်းတို့အား ထိရောက်သော အရေးယူမှုများကို အမြန်ဆုံးလုပ်ဆောင်ပေးပါရန် တိုက်တွန်းလိုပါသည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ထိန်းသိမ်း၊ တရားစွဲဆိုခြင်းခံထားရသည်ကို သိရှိပါက အောက်ပါလိပ်စာများသို့ ဆက်သွယ်၍ အသိပေး၊ အကြောင်းကြား နိုင်ပါသည်။
ဥပဒေပိုင်းဆိုင်ရာအကူအညီလိုအပ်ပါကလည်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) မှ ကိုအောင်ကြီး၊ ဖုန်း – ဝ၉၄၅၁၅၂၉၀၀ဝ နှင့် တရားလွှတ်တော်ရှေ့နေ ဒေါ်ခင်သီတာလဲ့လဲ့ထွန်း၊ ဖုန်း – ဝ၉၇၇၄၀၈၁၅၈၅ တို့အား ဆက်သွယ်နိုင်ပါသည်။
“အရေးတော်ပုံအောင်ရမည်”

Email :   info@aappb.org

Facebook : https://web.facebook.com/burmapoliticalprisoners/

Twitter : https://twitter.com/aapp_urma

နိုင်ငံရေးအကျဉ်းသားများကူညီစောင့်ရှောက်ရေးအသင်း

ကျဆုံးသွားသူများစာရင်းဒေါင်းလော့ရယူရန် Total Fatality Lists (Last Updated on 21 March 2021) KSO
ဖမ်းဆီးထိန်းသိမ်းခံထားရသူများစာရင်းဒေါင်းလော့ရယူရန်Total Detention, Charge Lists (Last Updated on 21 March 2021)