စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်၊ မတရားဖမ်းဆီးခံရသူများစာရင်းနှင့် ကျဆုံးသူများစာရင်းထုတ်ပြန်ချက်

ရက်စွဲ မတ်လ ၁၈ ရက်၊ ၂၀၂၁ ခုနှစ်

ပြည်နယ်တိုင်းအလိုက်ကျဆုံးသူများစာရင်းအရေအတွက်

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)သည် ယနေ့တွင် ကျဆုံးသွားခဲ့သည့် စစ်ကိုင်းတိုင်း ဒေသကြီး မုံရွာမြို့၊ ရန်ကုန်တိုင်းဒေသကြီး မြောက်ဥက္ကလာပမြို့နယ်နှင့် ပဲခူးတိုင်းဒေသကြီး ပဲခူးမြို့တို့မှ အရပ်သားပြည်သူ (၃) ဦး၏ အချက်အလက်များကို ကောက်ယူရရှိနိုင်ခဲ့ပါသည်။ ထို့ပြင် ယခင်နေ့ရက်များတွင် ကျဆုံးသွားခဲ့ကြသည့် အရပ်သားပြည်သူ (၄) ဦး၏ အချက်အလက်များကို ထပ်မံရရှိသည့်အတွက် ယမန်နေ့အထိ ကျဆုံးသွားခဲ့သူ (၂၂၁) ဦးရှိခဲ့ပြီး ယနေ့အထိ စစ်အာဏာရှင်တော်လှန်ရေး (နွေဦးတော်လှန်ရေး)ကာလအတွင်း ကျဆုံးခဲ့ရသူစုစုပေါင်း (၂၂၄) ဦး ရှိခဲ့ပြီဖြစ်ပါသည်။ အဆိုပါ အရေအတွက်သည် AAPP မှ ကောက်ယူရရှိထားသည့် အရေအတွက်ဖြစ်ပြီး အမှန်တကယ်ကျဆုံးသူများမှာ အဆိုပါအရေအတွက်ထက် ပိုများနေနိုင်ပါသည်။ ထပ်မံကောက်ယူရရှိ လာပါက ဆက်လက် ဖော်ပြပေးသွားပါမည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ မတ်လ ၁၈ ရက်နေ့ထိ စုစုပေါင်း ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသူ (၂၂၅၈) ဦးထိရှိခဲ့ပြီ ဖြစ်သည်။ ၎င်းတို့အနက်မှ ထောင်ဒဏ်ချမှတ်ခြင်းခံထားရသူ (၁၅) ဦး၊ အမှုဖွင့်ခြင်းခံထားရပြီး ဖမ်းဝရမ်းထုတ်ခြင်းခံ ထားရသောကြောင့် တိမ်းရှောင်နေသူ (၇၇) ဦး နှင့် ပြန်လည် လွတ်မြောက်လာသူ (၃၂၀) ဦးရှိခဲ့သည်။ ထို့ကြောင့် လက်ရှိ အချိန်အထိ (၁၉၃၈) ဦးမှာ ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသည်။
ယနေ့ထုတ်ပြန်သည့်အဖမ်းအဆီးစာရင်းတွင် ဖမ်းဆီးခြင်းခံရသူ (၆၇) ဦး၏အမည်စာရင်းကိုရရှိခဲ့၍ ထည့်သွင်း မှတ်တမ်းပြုထားပါသည်။ ဖော်ပြပါအရေအတွက်ထက်ပိုသော ဖမ်းဆီးမှုများရှိသည်ဖြစ်ရာ ဖမ်းဆီးခံများ၏ အချက်အလက်များကို မိမိတို့အနေဖြင့် ဆက်လက်စုံစမ်းလျက်ရှိပြီး ရရှိလာသည့် အချက်အလက်များကို ထုတ်ပြန်ပေးသွားမည်ဖြစ်ပါသည်။
အာဏာသိမ်းစစ်အုပ်စု၏ လက်ပါးစေ ရဲ နှင့် စစ်သားများသည် နေ့ရော ညပါ လူနေရပ်ကွက်များအတွင်း စီးနင်းပစ်ခတ်ခြင်း၊ အတင်းအဓမ္မ အလုပ်ခိုင်းစေခြင်း၊ လုယက်ခြင်း၊ ပစ်သတ်ခြင်း၊ ညှင်းပန်းနှိပ်စက်ခြင်း၊ ပြည်သူပိုင်နှင့် ပုဂ္ဂလိကပိုင်ပစ္စည်းကို ဖျက်ဆီးခြင်း၊ အဖျက်အမှောင့်လုပ်ရပ်များကို ဖန်တီးခြင်းစသည့် အကြမ်းဖက်လုပ်ရပ်များကို ကျူးလွန်နေခြင်းအားဖြင့် ပြည်သူများအလွန်အမင်း ကြောက်ရွံ့စေရန် နှင့် ၎င်းတို့ကို ဆန့်ကျင်ခြင်းမပြုစေရန် ရည်ရွယ်လုပ်ဆောင်လျက်ရှိသည်။
ယနေ့ (မတ်လ ၁၈) တွင် ရန်ကုန်မြို့၊ တောင်ဥက္ကလာပ၊ သင်္ဃန်းကျွန်း၊ အလုံ နှင့် မရမ်းကုန်းမြို့နယ်များ၌ ရဲ နှင့် စစ်သားများမှ ပြည်သူများ အကာအကွယ်ပြုလုပ်ထားသော သဲအိတ်များ၊ အတားအဆီးများ နှင့် လမ်းများအတွင်း၌ ကပ်ထားသည့် စစ်အာဏာရှင်ဆန့်ကျင်ရေး စတစ်ကာများကို ဖယ်ရှားပေးရန် အရပ်သားပြည်သူများ နှင့် လမ်းသွားလမ်းလာ များကို အဓမ္မခိုင်းစေခဲ့သည်။ ထိုကဲ့သို့ခိုင်းစေရာ၌ ရဲ နှင့် စစ်သားများသည် အရပ်သားပြည်သူများအား သေနတ်များဖြင့်ချိန်ကာ ရိုင်းစိုင်းစွာ စော်ကားပြောဆို၍ ခိုင်းစေခြင်း ဖြစ်သည်။ ထိုမျှမက လမ်းဘေးတဘက်တချက်ရှိ ဆိုင်းဘုတ်များ၊ ဆိုင်ခန်းများ၊ ကား၊ ဆိုင်ကယ်များကိုလည်း ရဲနှင့်စစ်သားများမှ ရိုက်ခွဲ ဖျက်ဆီးခြင်းများကိုလည်း ပြုလုပ်ခဲ့ကြသည်။
ထို့ပြင် ညှင်းပန်းနှိပ်စက်ခြင်းနည်းကို လက်နက်သဖွယ် ကျင့်သုံးလာပြီး ဖမ်းဆီးစဉ်အတွင်း နှင့် ထိန်းသိမ်းချုပ်နှောင်ထားစဉ် အတွင်း ရုပ်ပိုင်း နှင့် စိတ်ပိုင်းဆိုင်ရာ ညှင်းပန်းမှုအမျိုးမျိုးကို ရည်ရွယ်ချက်ရှိရှိ ကျူးလွန်လျက်ရှိကြသည်။ ထို့ကြောင့် သေဆုံး၊ ဒဏ်ရာရရှိမှုများသည် တဖြည်းဖြည်း မြင့်တက်လာခဲ့သည်။ မတ်လ ၁၅ ရက်နေ့တွင် ဖမ်းဆီးခြင်းခံခဲ့ရပြီး အပြင်းအထန်ရိုက်နှက်ခြင်းခံခဲ့ရသောကြောင့် စစ်ကိုင်းတိုင်း၊ မုံရွာမြို့၊ သစ်တောဦးစီးဌာနမှ အာဏာဖီဆန်ရေးလှုပ်ရှားမှု (CDM) တွင် ပါဝင်သည့် တောခေါင်း (၁) ဦးသည် ယနေ့နံနက်ပိုင်းတွင် ကျဆုံးသွားခဲ့သည်။ ၎င်းပြင် ယနေ့ (မတ်လ ၁၈) တွင် အာဏာသိမ်းစစ်အုပ်စု၏ လက်ပါးစေ ရဲ နှင့် စစ်သားများက ရန်ကုန်တိုင်း၊ တာမွေ၊ မရမ်းကုန်း၊ ကျောက်မြောင်း၊ လှိုင်၊ လှိုင်သာယာမြို့နယ်များ၌ ဖြစ်ပွားခဲ့သော ဖြိုခွင်းမှုများ၊ ဖျက်ဆီးမှုများအတွင်း၌ အရပ်သားပြည်သူများ၊ လမ်းသွားလမ်းလာ ပြည်သူများ နှင့် ဈေးသည်များကို ဖမ်းဆီး၊ ရိုက်နှက်ခြင်း၊ လက်ကို ခေါင်းပေါ်တင်၍ ပုံစံထိုင်ခိုင်းကာ နေပူလှမ်းခြင်း၊ ဖားခုန် ခုန်ခိုင်းခြင်း၊ ဈေးသည်များ၏ စားသောက်ကုန်များကို သိမ်းဆည်းခြင်းများကို ကျူးလွန်လျက်ရှိသည်။ ထို့ပြင် ကျောက်မြောင်း ဖြိုခွင်းမှုအတွင်း အသက် (၁၃) နှစ်အရွယ် မိန်းကလေးငယ် (၁) ဦးသည် ကျည်ထိမှန်ကာ ဖမ်းဆီး၊ ခေါ်ဆောင်ခြင်းခံထားရသည်။ ထို့ပြင် ယမန်နေ့ (မတ်လ ၁၇)က တောင်ဥက္ကလာပမြို့နယ်၌ စားဝတ်နေရေးအဆင်မပြေ၍ ရွှေသွားရောင်းသည့် အမျိုးသား (၁) ဦးကို အကြောင်းမဲ့ပစ်ခတ်ခဲ့၍ ကျည်သင့်ဒဏ်ရာဖြင့် ခေါ်ဆောင်သွားခဲ့ပြီး ယနေ့တွင် သေဆုံးသည်ဟု အကြောင်းကြားလာသော်လည်း ရုပ်အလောင်း နှင့် ရွှေထည်များကို ပြန်လည်ပေးခြင်းမရှိသေးကြောင်း သိရှိရသည်။
စစ်အုပ်စုသည် ညှင်းပန်းနှိပ်စက်ခြင်းကို ၎င်းတို့၏ မူဝါဒတစ်ရပ်သဖွယ် ကိုင်စွဲထားသည်။ ဆယ်စုနှစ်များစွာတိုင်ဖြစ်ပွား လျက်ရှိသော ပဋိပက္ခများအတွင်း တိုင်းရင်းသားဒေသများတွင် နေထိုင်ကြသော ဌာနေတိုင်းရင်းသားများ နှင့် နိုင်ငံရေးအကျဉ်းသားများသည် ပြင်းထန်သော ညှင်းပန်း နှိပ်စက်မှုများကို ရင်ဆိုင်ခံစားခဲ့ကြရပြီး အသက်ဆုံးရှုံးခဲ့ရမှု များစွာ ရှိခဲ့သည်။ လက်ရှိဖြစ်ပွားလျက်ရှိသော ၎င်းတို့၏ အကြမ်းဖက်လုပ်ရပ်များကြောင့် ညှင်းပန်းနှိပ်စက်မှုများ ထပ်မံ ပေါ်ပေါက်လာမည်ဖြစ်၍ ပြည်သူများ၏ ဂုဏ်သိက္ခာရှိစွာ ရှင်သန်နေထိုင်ခွင့်မှာ အလွန်အမင်း ခြိမ်းခြောက်ခြင်းခံနေကြရ သည်။
ထို့ပြင် မြန်မာနိုင်ငံတွင်း သတင်းမီဒီယာ လွတ်လပ်ခွင့်မှာ လုံးဝကျဆင်းသွားခဲ့ပြီဖြစ်သည်။ အာဏာသိမ်းစစ်အုပ်စုသည် ပြည်တွင်း အခြေစိုက်သတင်းဌာန ငါးခုကို ထုတ်ဝေခွင့်လိုင်စင် ရုတ်သိမ်းခဲ့ပြီး သတင်းဌာနတချို့ကို ဝင်ရောက်စီးနင်းခဲ့ကာ သတင်းသမားတချို့ကို ဖမ်းဆီး၊ တရားစွဲဆိုခြင်းအပါအဝင် အမျိုးမျိုးဖိနှိပ်မှုများကို ပြုလုပ်လျက်ရှိခြင်းကြောင့် ပြည်တွင်းရှိ ပုဂ္ဂလိကပိုင် သတင်းဌာနအားလုံးသည် ထုတ်ဝေခွင့်များ အသီးသီးရပ်ဆိုင်းခဲ့ကြသည်မှာ ယမန်နေ့က နောက်ဆုံးဖြစ်သည်။ အာဏာသိမ်းစစ်အုပ်စုမှ ၎င်းတို့စီးနင်းသိမ်းယူထားသော ရုပ်သံဌာန နှင့် သတင်းစာတိုက်တို့သာ ၎င်းတို့၏ အာဘော်များ၊ လုပ်ကြံသတင်းများကို ဆက်လက်ဖော်ပြလျက်ရှိသည်။ ထိုကဲ့သို့ ရည်ရွယ်ချက်ရှိရှိ ဖိနှိပ်ခြင်းအားဖြင့် ပြည်တွင်း၌ သတင်းအမှောင်ချထားနိုင်ပြီး ၎င်းတို့၏ တရားမဲ့လုပ်ရပ်များ၊ အကြမ်းဖက်မှုများကို နိုင်ငံတကာအသိုက်အဝန်း၌ ဖုံးကွယ်ထားနိုင်ရန် သတင်းစီးဆင်းမှုကို ဖြတ်တောက်နေခြင်းဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ထိန်းသိမ်း၊ တရားစွဲဆိုခြင်းခံထားရသည်ကို သိရှိပါက အောက်ပါလိပ်စာများသို့ ဆက်သွယ်၍ အသိပေး၊ အကြောင်းကြား နိုင်ပါသည်။
ဥပဒေပိုင်းဆိုင်ရာအကူအညီလိုအပ်ပါကလည်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) မှ ကိုအောင်ကြီး၊ ဖုန်း – ဝ၉၄၅၁၅၂၉၀၀ဝ နှင့် တရားလွှတ်တော်ရှေ့နေ ဒေါ်ခင်သီတာလဲ့လဲ့ထွန်း၊ ဖုန်း – ဝ၉၇၇၄၀၈၁၅၈၅ တို့အား ဆက်သွယ်နိုင်ပါသည်။
“အရေးတော်ပုံအောင်ရမည်”

Email :   info@aappb.org

Facebook : https://web.facebook.com/burmapoliticalprisoners/

Twitter : https://twitter.com/aapp_Burma

နိုင်ငံရေးအကျဉ်းသားများကူညီစောင့်ရှောက်ရေးအသင်း

မတရားဖမ်းဆီးခံထားရသူများစာရင်းဒေါင်းလော့ရယူရန်Total Detention, Charge Lists (Last Updated on 18 March 2021)
နွေးဦးတော်လှန်ရေးအတွင်းကျဆုံးသူများစာရင်းTotal Fatality Lists (Last Updated on 18 March 2021)

နေ့စဉ်ထုတ်ပြန်ချက်ဒေါင်းလော့ရယူရန် 18-March-2021 Update (Information)