စစ်အာဏာသိမ်းပြီးနောက် လတ်တလောဖြစ်ပေါ်လျက်ရှိသော အခြေအနေများနှင့်ပတ်သက်၍ နေ့စဉ်ထုတ်ပြန်ချက် အကျဉ်းချုပ်၊မတရားဖမ်းဆီးခံရသူများစာရင်းနှင့် ကျဆုံးသူများစာရင်းထုတ်ပြန်ချက်

ရက်စွဲ မတ်လ ၁၂ ရက်၊ ၂၀၂၁ ခုနှစ်
အာဏာရှင်စနစ်ချုပ်ငြိမ်းရေး၊ ဒီမိုကရေစီရေးနှင့် လူ့အခွင့်အရေးတို့အတွက် အသက်ခန္ဓာရင်း၍ တိုက်ပွဲဝင်ရင်း ကျဆုံးသွားခဲ့ သော သူရဲကောင်းများအား မိမိတို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ အလေးအနက် မှတ်တမ်းတင်ဂုဏ်ပြုအပ်ပါသည်။ ဖေဖော်ဝါရီလ ၁ ရက်နေ့မှ ယနေ့ထိတိုင် မတရားအကြမ်းဖက် ဖြိုခွင်းခြင်းခံခဲ့ရ၍ ကျဆုံးသွားခဲ့သူ အနည်းဆုံး (၇၀) ကျော်ရှိခဲ့ပြီဖြစ်သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မှတ်တမ်းပြုချက်များအရ ဖေဖော်ဝါရီလ ၁ ရက်နေ့မှ မတ်လ ၁၂ ရက်နေ့ထိ စုစုပေါင်း ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသူ (၂၀၉၂) ဦးထိရှိခဲ့ပြီ ဖြစ်သည်။ ၎င်းတို့အနက်မှ ထောင်ဒဏ်ချမှတ်ခြင်းခံထားရသူ (၃) ဦး၊ အမှုဖွင့်ခြင်းခံထားရပြီး ဖမ်းဝရမ်းထုတ်ခြင်းခံထားရသောကြောင့် တိမ်းရှောင်နေသူ (၇၃) ဦး နှင့် ပြန်လည် လွတ်မြောက်လာသူ (၃၁၉) ဦးရှိခဲ့သည်။ ထို့ကြောင့် လက်ရှိ အချိန်အထိ (၁၇၇၃) ဦးမှာ ဖမ်းဆီး၊ တရားစွဲဆို၊ ပြစ်ဒဏ်ချမှတ်ခြင်းခံထားရသည်။
ယနေ့အဖမ်းအဆီးစာရင်းတွင် မိမိတို့အနေဖြင့် ယခုအချိန်အထိ ဖမ်းဆီးခြင်းခံရသူ (၄၇) ဦး၏အမည်စာရင်းကိုရရှိခဲ့၍ မှတ်တမ်းပြုထားပါသည်။ သို့သော်လည်း ဆန္ဒပြကျောင်းသား လူငယ်များအပါအဝင် လူဦးရေ (၁၀၀) နီးပါးသည် ယနေ့ တွင် ဖမ်းဆီးခြင်းခံခဲ့ရသည်ဟု သိရှိရပါသည်။ မိမိတို့အနေဖြင့် ဆက်လက်စုံစမ်းလျက်ရှိပြီး ရရှိလာသည့် အချက်အလက် များကို ဆက်လက် ထုတ်ပြန်ပေးသွားမည်ဖြစ်ပါသည်။
မတ်လ ၁ဝ ရက်နေ့တွင် မြန်မာနိုင်ငံဆိုင်ရာ ပြင်သစ်သံအမတ်ကြီးမှ ဖမ်းဆီးခြင်းခံထားရသည့် ရာပေါင်းများစွာသော ကျောင်းသားများ၊ ဆန္ဒပြသူများ၏ မိဘများနှင့်တွေ့ဆုံရန် နှင့် ၎င်းတို့လွတ်မြောက်ရေးအတွက် တောင်းဆိုရန် အင်းစိန် အကျဉ်းထောင်သို့ သွားရောက်ခဲ့ပြီးနောက် ယနေ့တွင်လည်း အမေရိကန်သံအရာရှိမှ ဖမ်းဆီး၊အမှုဖွင့်ခြင်းခံထားရသည့် သတင်းထောက် ငါးဦး၏ ဗွီဒီယိုကွန်ဖရန့်ဖြင့်ပြုလုပ်သော ရုံးချိန်းရှိသည့် ကမာရွတ်မြို့နယ်တရားရုံးကို သွားရောက်ခဲ့ပြီး သတင်းမီဒီယာများ၊ ဒီမိုကရေစီထောက်ခံသူများနှင့် တွေ့ဆုံခဲ့သည်။ အမေရိကန်အစိုးရမှ အာဏာသိမ်းစစ်အုပ်စု ခေါင်းဆောင်၏ သား နှင့် သမီးကို အမည်ပျက်စာရင်းသွင်း၍ စီးပွားရေးကို ပိတ်ဆို့ထားလိုက်သော်လည်း ထိုထက်ပို၍ စစ်အုပ်စု နှင့် ၎င်းတို့လုပ်ကိုင်လျက်ရှိသော စီးပွားရေးလုပ်ငန်းများကိုပါ ပို၍ ကျယ်ပြန့်ပြီး စနစ်ကျစွာ အရေးယူပေး ရန်လည်း တောင်းဆိုအပ်ပါသည်။ မတ်လ ၁၁ ရက်နေ့တွင် မြန်မာနိုင်ငံဆိုင်ရာ ကုလသမဂ္ဂ၏ လူ့အခွင့်အရေးအထူး ကိုယ်စားလှယ် Thomas H. Andrews မှ အကြမ်းဖက်အာဏာသိမ်းစစ်အုပ်စု၏ ရည်ရွယ်ချက်ရှိရှိ ဖမ်းဆီးခြင်း၊ လုယက်ခြင်း၊ ညင်းပန်းနှိပ်စက်ခြင်း နှင့် သတ်ဖြတ်ခြင်းတို့နှင့်ပတ်သက်၍ ကုလသမဂ္ဂလူ့အခွင့်အရေးကောင်စီ၌ အထူးအလေးပေး၍ အစီရင်ခံတင်ပြခဲ့သည်။ စစ်အုပ်စုသည် လူသားချင်းစာနာမှုကင်းမဲ့သည့် ရာဇဝတ်မှုများကို ကျူးလွန်လျက်ရှိခြင်း နှင့် ဆက်လက်၍လည်း ကျူးလွန်လိမ့်မည်ဖြစ်ကြောင်းကိုလည်း ပြောကြားခဲ့သည်။ အဆိုပါ ရာဇဝတ်မှုများသည် သီးခြားရှိသော အဖြစ်အပျက်များမဟုတ်ဘဲ အစီအစဉ်တကျ ဆောင်ရွက်ထားခြင်းဖြစ်ပြီး လက်နက်မဲ့ ပြည်သူများအား ရည်ရွယ်ချက်ရှိရှိဖြင့် အကျယ်တပြန့် သို့မဟုတ် စနစ်ကျကျပစ်မှတ်ထားခြင်း နှင့် ရာထူးမြင့်သော အရာရှိများမှ အမိန့်ပေး၊ ညွှန်ကြားနေခြင်းဖြစ်ကြောင်း ပြောကြားခဲ့သည်။ ၎င်းသည် မဟာမိတ်နိုင်ငံများအား မြန်မာနိုင်ငံ နှင့်ပတ်သက်၍ လကျငငျးဆောငျရှကျမှု လုပျငနျးစဉျ (၅) ရပျလုပ်ဆောင်ရန် တိုက်တွန်းခဲ့သည်။ အဆိုပါ တိုက်တွန်းချက်များကို ကြိုဆိုပြီး ယခုထက်ပို၍ ထိရောက်သော အရေးယူဆောင်ရွက်မှုများကို တင်းကျပ်စွာ ဆောင်ရွက်ပါ ရန် တိုက်တွန်းအပ်ပါသည်။
ယမန်နေ့က အာဏာသိမ်းစစ်အုပ်စု၏ အကြမ်းဖက်ဖြိုခွင်းခဲ့ခြင်းကြောင့် အရပ်သား ပြည်သူ (၁၂) ဦး ကျဆုံးသွားခဲ့ သော်လည်း ပြည်သူများသည် အကြောက်တရားကို တွန်းလှန်၍ ငြိမ်းချမ်းစွာ ဆန္ဒထုတ်ဖော်မှုများကို ဆက်လက် ပြုလုပ် လျက်ရှိသည်။ ယနေ့တွင် ရန်ကုန်တိုင်းတွင် တောင်ဥက္ကလာပ၊ သင်္ဃန်းကျွန်း၊ ကျောက်မြောင်း၊ လမ်းမတော်၊ စမ်းချောင်း၊ အင်းစိန် မြို့နယ်များ၊ သန်လျင်၊ သုံးခွ နှင့် တွံတေးမြို့များ၊ ပဲခူးတိုင်းတွင် ပဲခူးမြို့၊ မန္တလေးတိုင်းတွင် မန္တလေးမြို့ နှင့် မိုးကုတ်မြို့ တနင်္သာရီတိုင်းတွင် ထားဝယ်မြို့၊ ကယားပြည်နယ်တွင် လွိုင်ကော်မြို့၊ ရှမ်းပြည်နယ်တွင် သီပေါ နှင့် ကွတ်ခိုင်မြို့ တို့၌ အကြမ်းဖက် ဖြိုခွင်းခြင်းကို ခံခဲ့ရသည်။ အထူးသဖြင့် တွံတေးမြို့၌ ရာဘာကျည်၊ ကျည်အစစ်များဖြင့် ပစ်ခတ်သောကြောင့် (၂) ဦး ဒဏ်ရာရရှိခဲ့ပြီး (၅) ဦးထက် မနည်းဖမ်းဆီးခြင်းခံခဲ့ရသည်။ မန္တလေးမြို့၌ (၁) ဦး ရာဘာကျည်သင့် ဒဏ်ရာရရှိခဲ့ပြီး လူငယ် (၃) ဦး ဖမ်းဆီးခြင်းခံခဲ့ရသည်။ မိုးကုတ်မြို့၌ (၆) ဦး ဖမ်းဆီးခြင်းခံခဲ့ရပြီး (၄) ဦးကို ပြန်လည် လွှတ်ပေးခဲ့ကြောင်း သိရှိရသည်။ တောင်ဥက္ကလာပမြို့နယ်၊ ပဒေသာလမ်းဆုံရှိ ထိုင်သပိတ်ကိုလည်း နှစ်ဖက်ပိတ်ညှပ်၍ ဖြိုခွင်းခဲ့ပြီး လမ်းများအတွင်းထိပါ လိုက်လံဖမ်းဆီးမှုများပြုခဲ့သည်။ သင်္ဃန်းကျွန်းမြို့နယ်၌ အနည်းဆုံး (၁၀) ဦးခန့် နှင့် သန်လျင်မြို့၌ (၈) ဦးအထိ ဖမ်းဆီးခြင်းခံခဲ့ရပြီး အင်းစိန်မြို့နယ်၌ (၃) ဦး ဒဏ်ရာရရှိခဲ့ကာ (၁၀) ဦးကျော် ဖမ်းဆီးခြင်းခံခဲ့ရသည်။ မြောင်းမြမြို့၌လည်း ဓာတ်ဆီဆိုင်၌ ဆီထည့်ပြီး ပြန်ထွက်လာသည့် လူငယ်တစ်ဦးကို အမေးမြန်း မရှိဘဲ ရင်ဝကို ရာဘာကျည်ဖြင့် ပစ်ခတ်ခဲ့ရာ လက်ကိုထိမှန်ခဲ့ပြီး လေးချက်ထက်မနည်း ဒဏ်ရာရရှိခဲ့သည်။ တနင်္သာရီတိုင်း၊ ထားဝယ်မြို့၌လည်း ယမန်နေ့ညက ကျဆုံးသွားသူများအတွက် ဆုတောင်းပွဲပြုလုပ်ပြီးနောက် စစ်တပ်က လာရောက် အကြမ်းဖက်ကာ သေနတ်ဖြင့် ပစ်ဖောက်ခဲ့ခြင်းကြောင့် သေနတ်ထိမှန်သူများရှိသည်ဟု သိရှိရသည်။
အာဏာသိမ်းစစ်အုပ်သည် နေ့အချိန်၌ အပြင်းအထန်ဖြိုခွင်းခဲ့သည်သာမက ညအချိန်၌လည်း ၎င်းတို့ကို ဆန့်ကျင်သူများ နှုတ်ဆိတ်သွားစေရန် ပစ်ခတ်ဖြိုခွင်းမှုများ၊ စီးနင်းဝင်ရောက်မှုများ၊ ဖျက်ဆီးမှုများကို ဆက်လက်ကျူးလွန်လျက်ရှိသည်။ အထူးသဖြင့် ဆန္ဒထုတ်ဖော်မှုများကို အင်တိုက်အားတိုက် ပြုလုပ်လျက်ရှိသည့် မြို့များကို အငြိုးထား၍ တိုက်ခိုက်လျက်ရှိ သည်ကို တွေ့ရှိရသည်။ ယမန်နေ့ည ၉:၃၅ မိနစ်အချိန်ခန့်မှစတင်၍ တနင်္သာရီတိုင်း၊ ထားဝယ်မြို့၊ ကြက်စားပြင် ရပ်ကွက်ကို ရဲ နှင့် စစ်တပ်တို့မှ အင်အား အများအပြားဖြင့် လာရောက်ခဲ့ပြီး ကျည်အစစ်ဖြင့် ပစ်ခတ်ခဲ့သောကြောင့် ဒေသခံ (၁) ဦးသည် အပြင်းအထန်ဒဏ်ရာရရှိကာ ကျဆုံးသွားခဲ့ပြီး (၂) ဦး ဒဏ်ရာရရှိခဲ့သည်။ ရန်ကုန်မြို့၊ မင်္ဂလာဒုံမြို့နယ်၊ မြသီတာ ရပ်ကွက်ကို လည်း ယနေ့ နံနက် ၁ နာရီအချိန်ခန့် အင်တာနက်ပြတ်တောက်ချိန်၌ ဝင်ရောက်စီးနင်းမှုပြုခဲ့ပြီး ကျည်အစစ်ဖြင့် ပစ်ခတ်ခဲ့၍ အရပ်သား (၁) ဦးကျဆုံသွားခဲ့သည်။ နောက်ထပ် ကင်းသမားတစ်ဦးမှာ ကျည်ထိမှန်၍ ပုန်းနေစဉ် စစ်တပ်က ဆွဲထုတ်၍ ပစ်သတ်ကာ အလောင်းကို ယူဆောင်သွားခဲ့ကြောင်း၊ ကျည်ခွံများကို ပြန်လည် ကောက်ယူသွားပြီး သွေးများ ကိုလည်း ရေဖြင့်ဆေးချသွားကြောင်း၊ အရပ်သား (၅) ဦး ကျည်ထိမှန်ဒဏ်ရာရရှိခဲ့ကြောင်း သိရှိရသည်။ ထို့ပြင် ယမန်နေ့ည သန်းခေါင်ယံအချိန်၌ မန္တလေးမြို့ရှိ ရှမ်းဝိုင်း ရပ်ကွက်အတွင်းကို စစ်သားအင်အား ၂၀ဝ ကျော်မှ ရာဘာကျည်၊ လေးခွတို့ဖြင့် ပစ်ခတ်၍ ဝင်ရောက်လာခဲ့ပြီး နေအိမ် အလုံး သုံးဆယ်နီးပါး နှင့် ရပ်ကွက်အတွင်းရှိ ပစ္စည်းများကို ရိုက်ခွဲ ဖျက်ဆီးသွားခဲ့ကာ နောက်ထပ်လည်း မီးရှို့ဦး မည်ဖြစ်ကြောင်း ခြိမ်းခြောက်ပြောဆိုခဲ့သည်။
ထို့ပြင် လွှတ်တော်ကိုယ်စားလှယ်များ၏ နေအိမ်များကိုလည်း ညစဉ်စီးနင်းမှုများပြုလုပ်လျက်ရှိပြီး ယမန်နေ့ညအချိန်၌ မုံရွာ မြို့နယ် တိုင်းဒေသကြီးလွှတ်တော်ကိုယ်စားလှယ် ဒေါ်အောင်ကြည်အိမ်ကိုလည်း ဝင်ရောက်စီးနင်းကာ သော့များကို ချိုးဖျက်၍ အိမ်အတွင်းကို ဝင်ရောက်ရှာဖွေကာ Laptop Computer တစ်လုံး နှင့် CCTV Hard Disk များကို ယူဆောင် သွားခဲ့သည်။ ထိုမျှသာမက ရန်ကုန်တိုင်း၊ ကွမ်းခြံကုန်းမြို့နယ်၊ မန်းကလိပ်ရွာတွင်နေထိုင်သည့် တိုင်းဒေသကြီး(၁) လွှတ်တော်ကိုယ်စားလှယ် မန်းအောင်ကိုမင်း ကို ဖမ်းဆီးရန်လာရောက်စဉ် မန်းကလိပ်ရွာနှင့်တစ်ဆက်တည်းရှိသည့် တံခွန်တိုင်ရွာသားများက သံပုံးတီး၍ အချက်ပေးခဲ့ ကြသဖြင့် အဆိုပါရွာကို စီးနင်း၍ပစ်ခတ်ခဲ့ကာ အမျိုးသား (၁) ဦးသည် ရာဘာကျည် ခုနှစ်ချက်ထိမှန်ခဲ့သည်။ ၎င်းပြင် ဧရာဝတီတိုင်း၊ ပြင်ခရိုင်အုပ်စု ၊ ငပုတောမြို့၊ NLD ပါတီဥက္ကဋ္ဌ ဦးဌေးနိုင်သည်လည်း ယနေ့တွင် ဖမ်းဆီးခြင်းခံခဲ့ရသည်။
ထို့ပြင် အာဏာဖီဆန်ရေးလှုပ်ရှားမှု (CDM) တွင် ပါဝင်သည့် ဝန်ထမ်းများသည်လည်း အပြင်းအထန် နှိပ်ကွပ်ခြင်းကို ခံနေကြရသည်။ ယမန်နေ့ ည ၁၁ နာရီအချိန်၌ အင်အားအများအပြားပါဝင်သည့် ရဲ နှင့်စစ်တပ်သည် သာကေတမြို့နယ်၊ အမှတ်(၆) နှင့် အမှတ် (၈) ရပ်ကွက်များရှိ CDM လှုပ်ရှားမှုတွင် ပါဝင်သည့် ရပ်ကွက်အုပ်ချုပ်ရေးမှူးများကို လာရောက် ရှာဖွေခဲ့ပြီး ရပ်ကွက်လမ်းကျဉ်းကျဉ်းလေးအတွင်း၌ပင် အသံဗုံး နှင့် သေနတ်များကို ဆက်တိုက်ပစ်ခြင်းများ ပြုလုပ်ခဲ့ သည်ဟု သိရှိရသည်။ ကယားပြည်နယ်တွင် ရဲ နှင့် စစ်တပ်ကို ၎င်းတို့၏ တက္ကသိုလ်၊ ကျောင်းဝန်းများအတွင်း တပ်စွဲခွင့်မပြု သည့်အတွက် နည်းပညာတက္ကသိုလ် (လွိုင်ကော်) ပါမောက္ခချုပ်၊ ကွန်ပျူတာ တက္ကသိုလ်(လွိုင်ကော်) ပါမောက္ခချုပ် နှင့် အစိုးရစက်မှုလက်မှုသိပ္ပံ(လွိုင်ကော်) ကျောင်းအုပ်ဆရာကြီးတို့သည် မတ်လ ၁ဝ ရက်နေ့ကတည်းက ဖမ်းဆီးခြင်းခံခဲ့ရပြီး ရာဇသတ်ကြီးပုဒ်မ ၅၀၅(က)ဖြင့် တရားစွဲဆိုခြင်းခံထားရသည်။
အာဏာသိမ်းစစ်အုပ်စုသည် ပြည်တွင်းသာမက ပြည်ပသတင်းမီဒီယာများ အပေါ်၌လည်း ပြင်းထန်စွာ အကြမ်းဖက်၍ ဖမ်းဆီးမှုများပြုလုပ်လျက်ရှိသည်။ ယမန်နေ့က ပိုလန်နိုင်ငံသား ဓာတ်ပုံသတင်းထောက် Robert Biciaga သည် တောင်ကြီး မြို့၌ သတင်းဓာတ်ပုံရယူနေစဉ် ပြင်းထန်စွာ ရိုက်နှက် ဖမ်းဆီးခြင်းခံထားရသည်။
လူသားချင်းစာနာမှုကင်းမဲ့သည့် ပြင်းထန်သော လူ့အခွင့်အရေးချိုးဖောက်မှုများကို နေ့စဉ်နှင့်အမျှ တရားလက်လွတ် ကျူးလွန်လျက်ရှိသည့် အာဏာသိမ်းစစ်အုပ်စုကို နိုင်ငံတကာဥပဒေဆိုင်ရာ တရားစွဲဆိုမှုများ ပြုလုပ်ရန် မြန်မာနိုင်ငံသည် CRPH မှတစ်ဆင့် နိုင်ငံတကာ ဥပဒေအကြံပေးကုမ္ပဏီ Volterra Fietta ကို တရားဝင်ဆက်သွယ် ဌားရမ်းမှု ပြုလုပ်ခဲ့ပြီးဖြစ်ကြောင်း ယနေ့တွင် ထုတ်ပြန် ကြေညာခဲ့သည်။ အဆိုပါ ထုတ်ပြန်ချက်ကို မိမိတို့ နိုင်ငံရေးအကျဉ်းသားများ ကူညီ စောင့်ရှောက်ရေးအသင်း (အေအေပီပီ) မှလည်း ကြိုဆိုပါသည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ လက်ရှိအခြေအနေများကို နေ့စဉ် စောင့်ကြည့် မှတ်တမ်းတင်သွားမည်ဖြစ်ပြီး စစ်အာဏာသိမ်းမှုနှင့်ပတ်သက်၍ ဖမ်းဆီး၊တရားစွဲဆို၊ ပြစ်ဒဏ် ချမှတ်ခြင်းခံထားရသူများ၏ စာရင်းကို နေ့စဉ်ထုတ်ပြန်သွားမည်ဖြစ်သည်။
အရပ်ဘက်အဖွဲ့အစည်းမှ ခေါင်းဆောင်များ၊ အရပ်သားများ၊ တက်ကြွလှုပ်ရှားသူများ၊ သတင်းသမားများ၊ CDM လှုပ်ရှားနေသည့် ဝန်ထမ်းများစသည့် နယ်ပယ်အသီးသီးမှ မည်သူမဆို ဖမ်းဆီး၊ထိန်းသိမ်း၊ တရားစွဲဆိုခြင်းခံထားရသည်ကို သိရှိပါက အောက်ပါလိပ်စာများသို့ ဆက်သွယ်၍ အသိပေး၊ အကြောင်းကြား နိုင်ပါသည်။
ဥပဒေပိုင်းဆိုင်ရာအကူအညီလိုအပ်ပါကလည်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) မှ ကိုအောင်ကြီး၊ ဖုန်း – ဝ၉၄၅၁၅၂၉၀၀ဝ နှင့် တရားလွှတ်တော်ရှေ့နေ ဒေါ်ခင်သီတာလဲ့လဲ့ထွန်း၊ ဖုန်း – ဝ၉၇၇၄၀၈၁၅၈၅ တို့အား ဆက်သွယ်နိုင်ပါသည်။
“အရေးတော်ပုံအောင်ရမည်”

Email :   info@aappb.org

Facebook : https://web.facebook.com/burmapoliticalprisoners/

Twitter : https://twitter.com/aapp_burma

နိုင်ငံရေးအကျဉ်းသားများကူညီစောင့်ရှောက်ရေးအသင်း

မတရားဖမ်းဆီးခံရသူများစာရင်းRecent Arrest List (Last Updated on 12 March 2021)
ဖမ်းဆီးခံအမျိုးသမီးများစာရင်းRecent womenlist (Last Updated on 12 March 2021)
ကျဆုံးသူများစာရင်းဒေါင်းလော့ရယူရန်Recent fatalitylist (Last Updated on 12 March 2021)
နေ့စဉ်ထုတ်ပြန်ချက်ဒေါင်းလော့ရယူရန်  12-March-2021 Update (Information)