ကန္တာရမိုင်တိုင်များ (အေအေပီပီ ၁၀ နှစ်မြောက်မှတ်တမ်း)

စကားဦး
နိုင်ငံရေးအကျဉ်းသားဆိုသည်မှာ စစ်အာဏာရှင်ခေတ်အဆက်ဆက် အငြင်းအပွားရဆုံး စကားလုံးတလုံးဖြစ်သည်။ မြန်မာပြည်တွင် ရှစ်လေးလုံးအရေးတော်ပုံနောက်ပိုင်းမှ နိုင်ငံရေးအကျဉ်းသား ရှိခဲ့ခြင်းမဟုတ်ပါ။ ရှစ်လေးလုံးအရေးတော်ပုံ ရှေ့ပိုင်းတလျှောက်လုံးလည်း အကျဉ်းထောင်များတွင် နိုင်ငံရေးအကျဉ်းသားများ အမြဲမပြတ်ရှိခဲ့ပါသည်။ သို့သော် ဖိနှိပ်အုပ်ချုပ်သူများက လူထုကို နိုင်ငံရေးနှင့် အဆက်ဖြတ်ထားခဲ့ရာ နံရံလေးဘက်အတွင်း ယုံကြည်ချက်ကြောင့် ချုပ်နှောင်ခံထားရသူများ၏ ပုံရိပ်မှာ လူမသိသူမသိသာ ရှိခဲ့ပါသည်။ ရှစ်လေးလုံးအရေးတော်ပုံကြောင့် လူထုအတွင်း နိုင်ငံရေးအသိစိတ်ဓာတ်များ ပြန်လည်နိုးကြားလာခဲ့သည်။ သာမန်လူထုများကိုယ်တိုင် ဖိနှိပ်ချုပ်ချယ်သော ပုဒ်မအမျိုးမျိုးဖြင့် ထောင်ထဲအထည့်ခံကြရသည်။ ထိုအခါ နိုင်ငံရေးအကျဉ်းသားများကိစ္စမှာ မြန်မာ့နိုင်ငံရေးပြဿနာတွင် ရှေ့တန်းမှရောက်လာခဲ့ပါသည်။
လူထု၏နိုင်ငံရေးအသိအမြင်ကို ချိုးနှိမ်ရာတွင် ဖိနှိပ်သူများက ထောင်ကိုကောင်းကောင်း အသုံးချကြပါသည်။ လူထုခေါင်းဆောင်များကို ထောင်ထဲထည့်သည်။ တက်ကြွလှုပ်ရှားသူများကို ထောင်ထဲထည့်သည်။ ငြင်းဆန်ကန့်ကွက်သူများကို ထောင်ထဲထည့်သည်။ စောဒကတက်သူများ၊ မကျိုးနွံ မနာခံသူများကို ထောင်ထဲထည့်သည်။ နောက်ဆုံးဆွေမျိုး ညီအကိုမောင်နှမသားချင်းများ၊ ထမင်းကျွေး ရေတိုက် လက်ခုပ်တီးမိသူများကိုပါ ထောင်ထဲထည့်သည်။ ထောင်ကိုလက်ကိုင်ထားကာ လူထုကို မလှုပ်ဝံ့အောင် လုပ်ခြင်းပင်။
ထိုအခါ လူထု၏ နိုင်ငံရေးအသိအမြင်ကို ပြန်လည်မြှင့်တင်ရန် ထောင်မကြောက်တရား ဟောဖိုလိုလာသည်။ လက်တွေ့အနေဖြင့်လည်း ရှေ့မှနေကာ ထောင်ကိုဝင်လိုက်ထွက်လိုက် လုပ်ပြသည်။ တတိုင်းတပြည်လုံးသည်ပင် အကျဉ်းထောင်ကြီးတခုဖြစ်ကြောင်း လူထုကိုအသိပေးသည်။ ထောင်ထဲမှာ ဘယ်သို့သော ညှင်းပမ်းမှုနှင့် နှိပ်စက်မှုများရှိရှိ ဘယ်လိုပုံရင်ဆိုင်ကာ ဘယ်သို့တိုက်ပွဲဝင်ခဲ့ကြောင်း အများသိအောင် ထုတ်ဖော်သည်။ ထောင်နဲ့ခြောက်တာကို လူတွေကမကြောက်တော့ဘူးဆိုသည့်တနေ့ ဖိနှပ်သူတို့ ဘာဆက်လုပ်မည်နည်း။ ဒါသည်ပင် အဖိနှိပ်ခံတို့၏ နှလုံးရည် အရင်းခံသော အကောင်းဆုံးတိုက်ပွဲနည်းလမ်းတခု ဖြစ်လာပေလိမ့်မည်။
ထိုယုံကြည်ချက်ဖြင့် နိုင်ငံရေးအကျဉ်းသားဟောင်းများစုစည်းကာ နိုင်ငံရေးအကျဉ်းသားများ ကူညီစောင့်ရှောက်ရေးအသင်းကို ၂၀၀၀ ခုနှစ် မတ်လတွင် ဖွဲ့စည်းခဲ့သည်။ ယခုအခါ ဆယ်နှစ်တိုင်ခဲ့ပြီ။ တကယ်တော့ နိုင်ငံရေးအကျဉ်းသားဟူသည်မှာ ကိုယ်ယုံကြည်ရာကို ထောင်မကြောက်တန်းမကြောက် လုပ်ခဲ့သူများဖြစ်သည်။ ဘယ်သူကူတာကယ်တာကိုမှ မျှော်လင့်ကြတာမဟုတ်။ ကူညီစောင့်ရှောက်သည်ဆိုသည့် စကားက တကယ်တော့ သူတို့ကို စိတ်ပိုင်း၊ ရုပ်ပိုင်းဆိုင်ရာအရ အားပေးထောက်ခံခြင်းကို ဆိုလိုသည်။ ဆယ်နှစ်အတွင်း ယုံကြည်ချက်ကြောင့် အကျဉ်းကျနေသူများ၏ ဂုဏ်သတ္တိကို ပြည်တွင်းကော နိုင်ငံတကာကပါ အာရုံစိုက်အလေးဂရုပြုလာခဲ့သည်ဟုဆိုလျှင် ဒါက မိမိတို့မီးမောင်းထိုးပြခဲ့မှုကြောင့် သက်သက်တော့မဟုတ်။ သူတို့၏အနစ်နာခံ စွန့်လွှတ်မှုများကိုက ထွန်းပြောင်နေခြင်းကြောင့် ဖြစ်သည်ဟုဆိုချင်သည်။
နိုင်ငံတနိုင်ငံတွင် ယုံကြည်ချက်ကြောင့် လူအများထောင်သွင်းအကျဉ်းကျခံနေရသည်ဟုဆိုလျှင် ထိုနိုင်ငံကို အုပ်ချုပ်သူတို့သည် တိုင်းသူပြည်သားများ၏ လူ့အခွင့်အရေး၊ နိုင်ငံသားအခွင့်အရေးများကို ချိုးဖောက်နေကြောင်း ထင်ရှားသည်။ ထို့အပြင် ထိုဖမ်းဆီးခံရသူများအား စိတ်ပိုင်းဆိုင်ရာနှင့်တကွ မိသားစုများ၏ဘဝအခြေအနေများကိုပါ ရည်ရွယ်ချက်ရှိရှိ ပျက်ပြားအောင်ပြုမူနေသည်ဆိုလျှင်တော့ ပြည်တွင်းပြည်ပ တရားဥပဒေများနှင့် နိုင်ငံတကာဥပဒေစနစ်များပါ ချိုးဖောက်နေခြင်းဖြစ်သည်မှာ ငြင်းကွယ်မရပေ။ ဆယ်နှစ်အတွင်း မိမိတို့အေအေပီပီသည် ထိုချိုးဖောက်မှုများကို အသေးစိတ်ကော၊ ကိစ္စတခုချင်းပါ သတင်းထုတ်ပြန်ချက်များ အစီရင်ခံစာများ နေ့စဉ်တွေ့ဆုံဖြေကြားမှုများလုပ်ကာ အဆက်မပြတ် ဖော်ထုတ်တင်ပြခဲ့ပါသည်။
အစိုးရကောင်းတရပ် လူထုလက်ခံသော အစိုးရတရပ် ဟုတ်မဟုတ်ကို တိုင်းတာရန် နိုင်ငံရေးအကျဉ်းသားများ၏ အခြေအနေသည် အကောင်းဆုံးပေတံတချောင်းဖြစ်ပါသည်။ တိုင်းပြည်တွင်ဖြစ်ပေါ်နေသည့် နိုင်ငံရေးပြဿနာများ၏ အတိမ်အနက်ကိုလည်း နိုင်ငံရေးအကျဉ်းသားများ၏ အခြေအနေကဖော်ပြနေပါသည်။ နိုင်ငံရေးအကျဉ်းသားများ အားလုံးလွတ်မြောက်ရေးကို မိမိတို့ အမြဲမပြတ်ကြိုးစားသွားမည်သာ ဖြစ်သည်။ အများအကျိုးအတွက် တိုက်ပွဲဝင်နေသူများ နံရံလေးဘက်နောက်မှာ ရှိနေသရွေ့ မင်္ဂလာရှိသော လူ့အဖွဲ့အစည်းတခု ဖြစ်မလာနိုင်ဟု ယုံကြည်သောကြောင့် ဖြစ်ပါသည်။ တနည်းနိုင်ငံရေးအကျဉ်းသားများ လွတ်မြောက်သောနေ့သည် ပြည်သူအားလုံး လွတ်မြောက်သောနေ့ဟုလည်း ဆိုနိုင်ပါသည်။
နောက်ဆုံးအနေဖြင့် မိမိတို့၏ ရင်တွင်းစကားတခုကို ပြောပြချင်ပါသည်။
မြန်မာပြည်တွင် ပြည်သူများ အဖိနှိပ်ခံနေရသောကြောင့် နိုင်ငံရေးအကျဉ်းသားများ ရှိနေခြင်းဖြစ်သည်။ နိုင်ငံရေးအကျဉ်းသားများ ရှိနေခြင်းကြောင့် အေအေပီပီရှိနေခြင်းဖြစ်သည်။ ဆယ်နှစ်ပြည့်အောင် ရပ်တည်နိုင်ခဲ့သည်ကို ဂုဏ်ယူစရာဟုမထင်ပါ။ ဖြစ်နိုင်လျှင် ဒီကနေ့ညနေမှာပင် အေအေပီပီကို ဖျက်သိမ်းပစ်ချင်ပါသည်။ နိုင်ငံရေးအကျဉ်းသားများ အမြန်ဆုံးလွတ်မြောက်ပါစေ။ ပြည်သူလူထု လွတ်မြောက်ပါစေ။

ဒေါင်းလော့ရယူနိုင်ရန်AAPP_10th_Year_Book